00:00:00 IGIHE NETWORK KN KINYARWANDA EN ENGLISH FR FRANCAIS

Abanyarwanda 48 bacurujwe mu bihugu by’amahanga mu 2022

Yanditswe na Kanamugire Emmanuel
Kuya 4 Mutarama 2023 saa 01:49
Yasuwe :

“Birababaza iyo ubona umuntu w’imyaka 30 wagiye ku ishuri agurishwa nk’itungo cyangwa igicuruzwa runaka kandi yaragiriwe inama.” Iyi ni imvugo y’Umuvugizi w’Urwego rw’Ubugenzacyaha (RIB), Dr Murangira B. Thierry, ugaragaza ko mu bakorerwa icuruzwa ry’abantu harimo n’abantu bakuru.

Icuruzwa ry’abantu ni kimwe mu byaha by’inzaduka n’ibindi byihariye bigira ingaruka zikomeye ku buzima bw’abaturage. Ku rutonde hiyongeraho ibikoreshejwe ikoranabuhanga, iterabwoba n’iyezandonke.

Urwego rw’Ubugenzacyaha ruvuga ko ibyaha by’icuruzwa ry’abantu bigihari nubwo imbaraga zo kubihashya zigenda ziyongera ku bufatanye bw’u Rwanda n’ibindi bihugu.

Ubushinjacyaha Bukuru bwo buvuga ko nko mu mwaka ushize wa 2021/2022 bwakiriye amadosiye 10 yari akurikiranywemo abantu 16 barimo abagore 10. Dosiye imwe ni yo yaregewe inkiko; abiri arashyingurwa mu gihe andi abiri acyigwa.

Dr Murangira ubwo yari mu kiganiro kuri Televiziyo y’u Rwanda mu gitondo cyo kuri uyu wa 4 Mutarama 2023, yavuze ko mu mwaka ushize abantu 48 ari bo bacurujwe mu bihugu by’amahanga.

Asobanura uburyo iki cyaha gikorwamo, Dr Murangira yavuze ko abantu bajyanwa mu mahanga bashyizweho amayeri ku buryo bataba bazi ko bagiye gucuruzwa.

Ibyo bituma ababikorerwa babihisha bagendeye ku magambo baba babwiwe bakizera ko bagiye gukora akazi keza.

Ibikorwa 33 ni by’icuruzwa ry’abantu ni byo byabayeho ugereranyije na 27 mu mwaka wabanje aho 66 ari bo bacurujwe mu gihe mu mwaka ushize (2021) nabwo bari 48.

Dr Murangira yakomeje avuga ko abantu 19 ari bo bagaruwe bakuwe mu bihugu bya Aziya no muri Afurika y’Iburengerazuba aho bari barajyanywe gucuruzwa. Abandi 11 batangiriwe bageze ku Kibuga cy’Indege nyuma y’aho bigaragaye ko nta makuru y’aho bagiye bari bafite.

Ikintu gikomeye yasobanuye ni uko mu bagaruwe mu gihugu bakuwe aho bari barajyanwe gucuruzwa harimo abari barakumiriwe nyuma bashaka ubundi buryo bwo kugenda bakaza gusanga ibyo babwirwaga ari byo, bakabona gutabaza.

Ati “Urabibabuza ejo ukongera kuko basigaye bashaka abajya gukora akazi mu bindi bihugu hifashishijwe internet n’imbuga nkoranyambaga ku buryo umuntu umubona ku kibuga cy’indege ari umuntu usobanutse ugiye ahantu hazwi kuko aba bantu bacuruzwa ntabwo ari abana, harimo n’abantu b’imyaka 30 basobanutse ariko kubera ko bakozwe ku marangamutima ugasanga baguye muri uwo mutego.”

Uwabashije gutanga amakuru y’ahantu aherereye ni we ubasha gutabarwa ariko bisaba ubufatanye bw’inzego z’u Rwanda n’iz’ibindi bihugu nk’uko Umuvugizi wa RIB yakomeje abisobanura.

Mu bagwa mu mutego wo gucuruzwa harimo n’ababeshywa buruse cyangwa ubukwe bateretaniye kuri internet bakohererezwa amatike.

Ati “Hari abasigaye babeshywa buruse, hari n’ababeshywa ko bagiye gushyingirwa ari umuntu wamubwiye ngo ni umukunzi we babonaniye ku mbuga nkoranyambaga bagateretana umuntu akava mu bye kubera ko undi amwoherereje amadolari. Aho ngaho aba ari kugira ngo umugirire icyizere yarangiza akakoherereza itike ukamusangayo ya yandi akayagaruza ndetse akanakungukamo.”

Abakora ibyo byaha inshuro nyinshi baba batari no mu Rwanda kandi ngo bagerageza guhisha ibimenyetso ku buryo no kubakurikirana biba bigoye kuko bisaba imikoranire y’ibihugu.

Hari abafatwa bagahanirwa mu bihugu by’iwabo ariko hari n’abataboneka bikaba bisaba uruhare rw’uwakoreweho icyaha nyamara akenshi iyo atarahura n’ingaruka aba arwanya inzego z’iperereza azifata nk’izigamije kumuvutsa amahirwe.

Itegeko risobanura icuruzwa ry’abantu nk’igikorwa cyose gikozwe n’umuntu hagamijwe gushaka inyungu, uha cyangwa ushakira undi akazi, utwara, wimura, uhisha cyangwa wakira undi muntu, hakoreshejwe ibikangisho, imbaraga cyangwa ubundi buryo bwose bw’agahato.

Rivuga kandi ko bishobora kuba ishimuta, uburiganya, ubushukanyi, kumubonerana kubera ububasha umufiteho cyangwa kubera ko ari umunyantege nke, gutanga cyangwa kwakira ubwishyu cyangwa inyungu kugira ngo umuntu ufite ububasha ku wundi muntu yemere.

Umuvugizi w’Urwego rw’Ubugenzacyaha (RIB), Dr Murangira B. Thierry

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .