Abangavu bagaragaje ko kutumvwa n’ababyeyi bituma babahisha ko basambanyijwe

Yanditswe na Prudence Kwizera
Kuya 13 Ukuboza 2018 saa 04:22
Yasuwe :
0 0

Mu Rwanda hagenda hafatwa ingamba zitandukanye zo gukumira inda z’imburagihe ziterwa abangavu ariko imibare y’abazitwara ikomeje kwiyongera.

Bamwe mu bangavu bo mu turere dutandukanye two mu Ntara y’Amajyepfo, bavuga ko hari ubwo bahoboterwa bagatinya kubibwira ababyeyi babo kuko batabumva.

Babigaragaje mu bikorwa by’ubukangurambaga bugamije kurwanya ihohoterwa rishingiye ku gitsina no gukumira inda ziterwa abangavu, buri kubera mu turere twa Nyanza na Huye.

Mu Karere ka Huye mu cyumweru gishize, Impuzamiryango Pro-Femmes Twese Hamwe, yaganirije urubyiruko rwiganjemo abangavu batwaye inda z’imburagihe barimo abahetse abana n’abatwite.

Bamwe mu batewe inda bagaragaje ko akenshi batinya kubwira ababyeyi babo ko bahohotewe.

Umwe ati “Natwaye inda muri 2016 mfite imyaka 16 bituma mva mu ishuri. Ababyeyi banjye natinye kubibabwira kuko hari bari kunyica; nahise mva mu rugo ndabahunga njya kwa masenge aba ari we mbibwira.”

Umukozi ushinzwe ibikorwa by’ubuvugizi muri Pro-Femmes Twese Hamwe, Niragire Erneste, asaba ababyeyi kugira abana babo inshuti.

Ati “Umubyeyi niwe ufite uruhare rwa mbere mu guha umwana uburere; icyo tumusaba ni ukugira umwana we inshuti akajya amuha umwanya kandi akamutinyura kujya amubwira ibyamubayeho byose.”

Ibyo bikorwa byabereye no Mu Karere ka Nyanza aho Umuryango mpuzamahanga nterankunga, ActionAid Rwanda wahuguye abangavu 78 mu gihe cy’imini itatu ku buzima bw’imyororokere n’ihohoterwa rishingiye rikorerwa abagore no gusambanya abana.

Umwe mu bangavu yagaragaje ko yatewe inda n’umugabo ariko atinya kubibwira ababyeyi be kubera ko bamwimaga umwanya wo kuganira no kubisanzuraho.

Ati “Natinye kubibwira ababyeyi kuko batajyaga banyumva, icyo nashakaga kubabwira cyose bahitaga bantuka. Nabibwiye umwana w’inshuti yanjye ajya kubibumvisha maze uwo mugabo wanteye inda baramufata.”

Umukozi muri ActionAid mu Karere ka Nyanza, Murungi Jeanette, avuga ko mu byo bateganya gukora harimo no guhugura ababyeyi bakajya batinyuka kuganiriza abana ku buzima bw’imyororokere no kubatinyura kuvuga ibibazo bahuye nabo.

Ati “Turaza kujya dukorana n’ababyeyi cyane birushijeho kugira ngo bagire uruhare ku kuganira n’abana kuko iyo utaganiriye n’umwana ntumenya icyamubayeho.”

Hirya no hino mu turere hakomeje ibikorwa byo kubarura abangavu batewe inda no gushakisha abazibateye.

Imibare iheruka ya Minisiteri y’Uburinganire n’Iterambere ry’Umuryango (Migeprof) yo muri 2016 igaragaza ko habaruwe abangavu batewe inda barenga ibihumbi 17.

Abanagavu basabwe kujya batamaza abagabo babashukashuka n'abashaka kubahohotera
Abangavu bagaragaje ko haba ubwo bahohotewe bagatinya kubibwira ababyeyi babo kuko batabumva
Umwe mu bangavu bo mu Karere ka Huye atanga igitekerezo
Abangavu bo mu Karere ka Nyanza baganirijwe ku buzima bw'imyororokere no kwirinda ihohoterwa
Umukozi muri ActionAid mu Karere ka Nyanza, Murungi Jeannette, avuga ko mu byo bateganya gukora harimo no guhugura ababyeyi bakajya batinyuka kuganiriza abana ku buzima bw’imyororokere
Umukozi ushinzwe ibikorwa by’ubuvugizi muri Pro-Femmes Twese Hamwe, Niragire Erneste, asaba ababyeyi kugira abana babo inshuti

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza