Abakozi babiri b’Akarere ka Kirehe barafunzwe

Yanditswe na Hakizimana Jean Paul
Kuya 14 Ugushyingo 2019 saa 07:29
Yasuwe :
0 0

Abakozi babiri bakora muri serivise ishinzwe gutanga ibyangombwa by’ubutaka mu Karere ka Kirehe, barafunzwe nyuma yo gukekwaho kugambirira nkana kunyereza umutungo wa leta biciye mu gushaka gutangisha leta ingurane inshuro ebyiri ku muturage ndetse no gusinyira rwiyemezamirimo ko yazanye ibikoresho kandi atari byo.

Aba bakozi batawe muri yombi kuwa Kabiri tariki 12 Ugushyingo, abatawe muri yombi ni Kazimiri Kaberuka na Uwihanganye Jean Pierre.

Umuyobozi w’Akarere ka Kirehe wungirije ushinzwe Iterambere ry’Ubukungu Nsengiyumva Jean Damascène, yabwiye IGIHE ko abo bakozi batawe muri yombi nyuma yo gusanga baragambiriye nkana kunyereza umutungo wa leta.

Yagize ati “Yego nibyo barafunzwe, bakurikiranyweho kugambirira nkana kunyereza umutungo wa leta. Buri wese afite icyaha yakoze cyihariye, umwe yafatanyije n’umuturage kurigisa ubutaka bwa leta yari yarishyuweho nk’ingurane ahakorwaga umuhanda Cyunuzi. Yamufashije kubona icyangombwa cya kabiri ku kugabanyamo ubutaka kabiri kugira ngo agire bumwe atwara kandi bwose bwari bwarishyuwe.”

Yakomeje agira ati “Undi we arazira ko yasinyiye rwiyemezamirimo ko yazanye ibikoresho byagombaga kujya mu mudugudu w’icyitegererezo kandi harimo byinshi bitaje we amusinyira ko byose byaje, undi ahera kuri iyo nyandiko ajya kwishyuza ariko twabitahuye atarishyurwa.”

Uyu muyobozi yasabye abakozi bashinzwe gutanga serivise mu bigo bya leta kwitwararika bakareka kurarikira ibitari ibyabo kuko serivisi baha abaturage izishyurwa n’izitangirwa ubuntu ziba zizwi, bityo uzajya abirengaho agakora amakosa azajya abihanirwa.

Muri Nzeri uyu mwaka ubwo Guverineri w’Intara y’Iburasirazuba Mufulukye Fred, yagiranaga inama n’abayobozi bo mu turere twa Kayonza, Ngoma na Kirehe igamije gukebura imikorere n’imyitwarire ya bamwe muri bo, yatunze agatoki cyane abayobozi bakora muri serivise zijyanye n’ubutaka bitewe n’imikorere mibi ikunda kubaranga.

Kuri ubu aba bakozi bafungiye kuri Sitasiyo ya Polisi ya Kirehe mu gihe iperereza rigikomeje.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza