Abakora ubuhinzi n’ubworozi bw’umwimerere basabye koroherezwa kubona icyangombwa cyo gukora kinyamwuga

Yanditswe na Tuyishimire Raymond
Kuya 10 Ukuboza 2020 saa 07:00
Yasuwe :
0 0

Abakora ubuhinzi n’ubworozi by’umwimerere basabye Minisiteri y’Ubuhinzi n’Ubworozi kubunganira mu gukemura ibibazo bitandukanye bakigorwa nabyo birimo no kubona icyangombwa cyo gukora kinyamwuga.

Ubu busabe babutangiye mu imurikagurisha ry’umunsi umwe ryiswe ’Mardi-Bio Meet the Farmer, know the source’, ryateguwe n’Umuryango Nyarwanda uteza imbere Ubuhinzi bw’umwimerere butangiza ubutaka, ibinyabuzima n’ibibukomokaho, Rwanda Organic Agriculture Movement (ROAM).

Iri murikagurisha ryitabiriwe n’abafatanyabikorwa bagera kuri 25 bamuritse ibihingwa byabo byiganjemo imboga n’imbuto baturutse mu turere dutandukanye tw’igihugu.

Kugira ngo ibihingwa byemerwe ko ari umwimerere, ni uko byemezwa n’ibigo bishinzwe gutanga icyangombwa kigaragaza umwihariko wabyo, iyo ubigereranya n’ibindi.

Bimwe mu byo abahinzi bagaragaje nk’imbogamizi harimo ko kubona icyo cyangombwa cyo gukora kinyamwuga bigoranye kuko bica mu nzira ndende cyane ko kiva mu mahanga.

Umuhinzi wa Kawa na avoka wabigize umwuga ukomoka mu Karere ka Huye mu Ntara y’Amajyepfo, Manirakiza Damien, yavuze ko nk’abahinzi bakigorwa n’icyo cyangombwa.

Yagize ati "Kugeza ubu ikibazo twari dufite gikomeye, isoko riraboneka ariko kugira ngo twemerwe ko ibihingwa byacu ari umwimerere, haba hari ibyangombwa bisabwa by’ubuziranenge, igihe cyose nta cyangombwa cy’ubuziranenge gihari, umuhinzi w’ibihingwa by’umwimerere agurisha bisanzwe.”

Mu bindi agaragaza nk’imbogamizi, harimo ko leta nta nkunganire y’imbuto n’ifumbire ibagenera nk’abahinzi b’ibihingwa by’Umwimerere.

Ati "Nta nkunga leta iha abahinzi mu rwego rw’amafumbire cyangwa imbuto bakazigura kuri make bunganirwa na leta."

Uyu muhinzi yasabye ko ubuhinzi bw’ibihingwa by’umwimerere bwashyigikirwa na bwo bugahama.

Ati "Turasaba ko umwimerere warushaho gushinga imizi ndetse ntabwo ari Minisiteri y’Ubuhinzi gusa, nkeka na Minisiteri y’Ibidukikije irebwa n’ibi kuko iyo dufashe umwimerere tuba dufasha n’ibidukikije.”

Umuyobozi wa ROAM, Dusabe Lise Chantal, yavuze ko abahinzi bakiri bato bigoye kubona icyo cyangombwa kuko kiba gihenze.

Ati "Ntabwo umuhinzi muto icyo cyangombwa yapfa kukibona ariko nka ROAM turi guteza imbere uburyo abahinzi bishyira hamwe bakanagenzurana hagati yabo."

Yakomeje agira ati "Ariko iyo hagiyemo gusaba icyangombwa bisaba ko haboneka abagenzuzi, noneho n’ababitanga bava hanze muri Amerika n’u Burayi niyo mpamvu igiciro gihenda cyane."

Dusabe yishimira ko umusaruro w’ibihingwa by’umwimerere bifite isoko cyane hanze y’u Rwanda ariko agasaba ko n’Abanyarwanda babyitabira.

Iri murikagurisha ryari rigamije kwamamaza ubuhinzi bw’umwimerere nk’uburyo bwo kwihaza mu biribwa (nutritious and safe food) burengera ubuzima bw’abantu n’ibidukikije, kumenyesha abaguzi ibyiza by’ubuhinzi bw’umwimerere n’ibibukomokaho bikorerwa mu Rwanda. Guhuza abaguzi n’abagurisha mu rwego rwo guha imbaraga isoko ry’ibikomoka ku buhinzi bw’umwimerere.

Kugeza ubu ROAM ikorana n’abahinzi barenga 5000 bibumbiye mu makoperative ari mu bice bitandukanye by’igihugu, ikaba ifite intego yo gukomeza guteza imbere ibihingwa by’umwimerere.

Hamuritswe ibihingwa bitandukanye by'umwimerere
Imurikagurisha ry'umunsi umwe ryari rigamije kumenyekanisha ibihingwa by'umwimerere
Iri murikagurishwa ryitabiriwe n'abantu baturutse mu ntara zitandukanye zigize igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .