Abahinzi bagaragarijwe inyungu iri mu gukoresha IKOFI ya Banki ya Kigali mu kugura inyongeramusaruro

Yanditswe na Iradukunda Regis
Kuya 5 Kanama 2020 saa 08:56
Yasuwe :
0 0

Banki ya Kigali (BK) ku bufatanye n’Ikigo cy’igihugu gishinzwe ubuhinzi (RAB), yatangiye guhugura abafashamyumvire b’ubuhinzi ku buryo bwo gukoresha gahunda ya ‘Smart Nkunganire’, bakabasha gusaba inguzanyo yo kugura imbuto, ifumbire, imiti n’ibindi bikenewe mu buhinzi.

Aya mahugurwa yatangiye kuri uyu wa Kabiri tariki 4 Kanama 2020, azamara iminsi 15 abera mu Mujyi wa Kigali. Yateguriwe abahinzi ariko binyuze mu bafashamyumvire bagera kuri 62.

Bazahugurwa ku gukangurira abahinzi kwiyandikisha muri gahunda ya Nkunganire (Smart Nkunganire), uburyo abacuruzi b’inyongeramusaruro bazajya bacuruza, ndetse n’uburyo bwo kwishyurana hifashishijwe ikoranabuhanga rya Ikofi ya Banki ya Kigali. Byose bigamije korohereza umuhinzi kubona inyongeramusaruro n’ifumbire hadakoreshejwe impapuro.

Umuyobozi ushinzwe gahunda ya Nkunganire muri RAB, Gatabazi Egide, yavuze ko nyuma y’iki gikorwa abafashamyumvire na bo bazahugura abashinzwe ubuhinzi ku mirenge hirya no hino mu gihugu, abashizwe inyongeramusaruro, abashizwe iterambere ry’ubukungu mu tugari ndetse n’umujyanama w’ubuhinzi ku rwego rw’umudugudu.

Yakomeje avuga ko mu gihe abahinzi bakwitabira ubu buryo bwa Nkunganire, byabafasha kubona ibikenerwa mu buhinzi bwa kijyambere mu buryo bworoshye.

Kwiyandikisha muri Nkunganire ndetse no kwishyura hakoreshejwe ikoranabuhanga rya Ikofi ya Banki ya Kigali, bizafasha mu kwirinda icyorezo cya Coronavirus kuko hatazabaho guhererekanya amafaranga mu ntoki kandi binagabanye ingendo nyinshi.

Umuyobozi muri Banki ya Kigali ushinzwe kwamamaza, Nshuti Thierry, yavuze ko bafatanyije na RAB muri iki gikorwa kugira ngo iyi banki ikomeje kugira uruhare mu iterambere ry’ubuhinzi bwa kijyambere.

Nshuti yagaragaje ko hari inyungu nyinshi ziri mu gukoresha IKOFI ya Banki ya Kigali mu kugura inyongeramusaruro harimo no guhabwa inguzanyo ako kanya.

Ati "Uburyo bwa "Smart Nkunganire", MOPA ikoreshwa mu kugura ifumbire ndetse na Ikofi ya BK, biduha ishusho nyayo y’igishoro cy’umuhinzi ndetse tukaba twanamenya ibyo ashobora kuzeza, kuko tuba tuzi ubuso ahingaho, ifumbire agiye gukoresha n’imbuto biba bizwi umusaruro bigiye gutanga".

Yakomeje avuga ko "Nka banki, icyo gihe ntabwo twagira ubwoba bwo gushora amafaranga mu buhinzi, tuguriza umuhinzi ibyo kugura ifumbire, imbuto n’izindi nyongeramusaruro kugira ngo azashobore kweza byinshi anasagurire isoko, abashe no kutwishyura ".

Nshuti asobanura ko iyi inguzanyo itangwa ako kanya, nta mpapuro umuhinzi asabwe kuzuza ahubwo igihe ahagaze imbere y’umucuruzi w’inyongeramusaruro, akanda kuri telefone ye amafaranga agahita aza, agahita yishyura uwo mucuruzi inyongeramusaruro yasabye.

Umwe mu bahuguwe, Egide Ahishakiye, yavuze ko na bo babona ari ibintu bizafasha urwego rw’ubuhinzi kugendana n’iterambere.

Ati “Ikintu cy’ingenzi ku muhinzi ni ukugendana n’ibigezweho. Ubuhinzi gakondo bwo bugomba kurangira, abaturage twariyongereye. Abaturage bagomba kujya muri gahunda ya Nkunganire bakanakoresha Ikofi mu kwishyura, kugira ngo igiciro kigabanuke kandi ibyo baguze bibagerereho ku gihe.”

Kugeza ubu gahunda ya Smart Nkunganire ifasha abahinzi kubona ifumbire n’inyongeramusaruro imaze kugeramo abasaga miliyoni 1.5.

Abitabiriye amahugurwa bigishijwe uburyo bwose buzakoreshwa kugira ngo ubuhinzi bukorwe hakoreshejwe ikoranabuhanga.
Aya mahugurwa yitabiriwe n'abafashamyumvire bagera kuri 62
Umuyobozi muri Banki ya Kigali ushinzwe kwamamaza, Nshuti Thierry yavuze ko hari byinshi umuhinzi yungukira mu gukoresha Ikofi agura inyongeramusaruro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .