Abagore ibihumbi 65 bagiye kwinjizwa muri VUP bafashe byihariye gukumira igwingira ry’abana

Yanditswe na Evariste Nsengimana
Kuya 30 Mutarama 2020 saa 12:55
Yasuwe :
0 0

Umuryango Imbuto Foundation ku bufatanye n’Ikigo cy’igihugu gishinzwe guteza imbere ibikorwa by’iterambere mu nzego z’ibanze (LODA), batangije umushinga wo kwinjiza gahunda mbonezamikurire y’abana bato mu yindi y’imirimo igamije gukura abaturage mu bukene izwi nka VUP.

Iyi gahunda yatangijwe ku mugaragaro kuri uyu wa 30 Mutarama 2020 nyuma y’igerageza ryakorewe mu Karere ka Gasabo, Gatsibo na Kayonza, biteganyijwe ko izafasha abagore ibihumbi 65 kubona akazi bahemberwa nk’uko umuntu ukora muri VUP ahemberwa umurimo yakoze.

Uyu mushinga washyizwemo miliyoni109$ utangirijwe mu Mirenge 150 mu gihugu ariko ukazarangira mu 2021 ugejejwe mu mirenge 300.

Aba bagore bazajya bita ku bana bari hagati y’imyaka ibiri n’itandatu ku marerero 2500 yo ku rwego rw’umudugudu azatoranywa mu ngo cyangwa inyubako ziri hirya no hino mu gihugu ariko ukazarangira zigeze ku 5000.

Urugo mbonezamikurire abo bagore bazajya bitaho, rumwe ruzajya rwakira abana bari hagati ya 10-15, nibura 50% babarizwa mu cyiciro cya mbere cy’ubudehe.

Urugo rumwe ruzajya rukurikiranwa nibura n’ababyeyi babiri, rukore amasaha hagati 5-6 ku munsi

Umuyobozi mukuru wa Imbuto Foundation, Umutoni Sandrine, yavuze ko mu bikorwa byinshi bijyanye n’uburezi uyu muryango ukora wita cyane ku mbonezamikurire y’abana bato kuko ari ryo shingiro ry’ubukungu bw’igihugu.

Umutoni yifashishije imvugo y’abahanga mu mitekerereze avuga ko urubuto rutewe mu gitaka giteguwe neza, rukuhirwa neza kandi rugahabwa iby’ingenzi byose rukura rukavamo igiti cy’inganzamarumbo.

Ati “Nta mubyeyi utakwifuza gutera urwo rubuto kandi ngo arubone rukura, rukavamo icyo giti. Urwo rubuto ni abana bacu. Bimwe mu bikorwa tuzakora muri uyu mushinga ni ukongera ubushobozi no guhugura abafashamyumvire bagera ku bihumbi 65 ku gutanga serivisi z’imbonezamukurire y’abana bato mu buryo bukomatanyije.”

Izo serivisi zikomatanyije zikubiye mu bikorwa bigamije gusigasira uburezi, imirire, isuku n’umutekano by’umwana.

Ati “Iyi gahunda rero yo kubaka ubushobozi tuzayigeraho tubinyujije mu gutegura imfashanyigisho y’amahugurwa izifashishwa mu guhugura abafashamyumvire bazafasha muri iyi gahunda.”

Umutoni yasabye abayobozi b’inzego z’ibanze ubufatanye n’izindi nzego zirimo abajyanama b’ubuzima, inshuti z’umuryango n’abandi kugira ngo zibonemo ibashe gutanga umusaruro mu guhangana n’ibibazo by’igwingira mu bana.

Igenzura ryakozwe ku rwego rw’ubuzima bw’abaturage mu Rwanda mu 2015 ryerekanye ko 38% by’abana bari munsi y’imyaka itanu bafite ikibazo cyo kugwingira bavuye kuri 44% mu 2010.

Umuyobozi wa LODA, Nyinawagaga Claudine, yavuze ko iyi gahunda igamije gutegura ejo hazaza heza h’abana b’u Rwanda.

Ati “Twiteguye gukora ibishoboka byose kugira ngo iyi gahunda igende neza.”

Yavuze ko igamije kwita ku bana bato bari mu myaka ibiri kugeza kuri itandatu gufasha gukemura ikibazo cy’igwingira ry’abana kimaze iminsi gihangayikishije u Rwanda no guhanga akazi.

Ati “Binajyana no kongera ubushobozi duha ababyeyi bwo kwita ku mwana no guhindura imyumvire mu muryango.”

Gahunda ya VUP yatangijwe mu 2008 igamije gukura abaturage mu bukene ariko igenda yagurwa kugira ngo irusheho gutanga umusaruro. Uretse guha akazi abantu binyuze mu mirimo y’amaboko hari na gahunda y’ingoboka igamije gufasha abatishoboye gukora imishinga ibafasha kwikura mu bukene.

Imbuto Foundation imaze igihe ikora ibikorwa byo gufasha imbonezamikurire y’abana bato, aho kuva mu 2013 kugeza ubu imaze kuzigeza ku bana barenga ibihumbi 20 n’imiryango irenga ibihumbi 18 mu gihe abafashamyumvire bamaze guhugurwa barenga 1005.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza