Itorero “The universal church of the kingdom of God” rikorera mu Karere ka Nyarugenge mu Murenge wa Nyamirambo, ku bufatanye n’amabanki n’ibigo bitandukanye birimo iby’ubwinshingizi ryahaye amahugurwa abagore bo muri uwo Murenge, abashishikariza kuzigama, kwitinyuka no gukora imishinga ibyara inyungu.
Kuri uyu wa 6 Nyakanga 2013, abagore basaga 70 bo mu Murenge wa Nyamirambo mu karere ka Nyarugenge bahuriye ku cyicaro cy’ Itorero ”The universal church of God “ bahabwa amahugurwa mu rwego rwo gushishikarizwa kuzigama ndetse no gutinyuka kwaka inguzanyo hamwe no gukora imishinga ibyara inyungu.
Ibi biganiro byatanzwe n’abayobozi batandukanye barimo umuyobozi w’Umujyi wa Kigali wungirije ushinzwe imibereho myiza, Hope Tumukunde, Umuyobozi w’Akarere ka Nyarugenge, Solange Mukasonga, abahagarariye amabanki, ibigo by’ubwishingizi hamwe n’abavuye mu kigo cy’Igihugu gishinzwe kwihutisha iterambere RDB.
Umuyobozi wa “The universal church of God “ Pasiteri Ezekiel Motsoeneng yatangaje ko, iyo wigishije umugore uba wigishije umuryango, ndetse n’iguhugu muri rusange.
Pasiteri Ezekiel yagize ati “Iyo wigishije umugore kwiteza imbere uba urimo guteza igihugu imbere, ukaba utanze urufunguzo rw’iterambere kuko uba wubatse umuryango.”
Kabanyana Leoncie, witabiriye aya mahugurwa avuga ko yungutse byinshi, ati “Hari ibyo nungutse bijanye no kwiteza imbere, najyaga nitinya nkumva ko ntajya kwaka inguzanyo muri banki, ariko badutinyuye, sinajyaga mbitsa kuko numvaga ko habitsa abafite amafaranga menshi, ariko batubwiye ko n’amacye nayo bayabika.”
Itorero “The universal church of God” ryahaye Umurenge wa Nyamirambo inkunga y’ibihumbi 300.000, byo kwishyurira abaturage batishoboye ubwisungane mu kwivuza.
Iri torero ryageze mu Rwanda mu mwaka wa 2008. rifite amashami mu bihugu bitandukanye byo ku Isi, ryarashinzwe mu mwaka 1977 muri Brezil.
TANGA IGITEKEREZO