Abagera kuri 304 barangije amasomo muri Akilah bibukijwe ko ubuzima atari umurongo ugororotse

Yanditswe na Iradukunda Serge
Kuya 14 Ugushyingo 2019 saa 05:56
Yasuwe :
0 0

Abanyeshuri 304 barangije amasomo yabo y’icyiciro cya mbere cya Kaminuza ’diploma’ mu Ishuri Rikuru ryigisha abari n’abategarugori rya Akilah Institute for Women, bahawe impanuro zizabafasha mu buzima bagiyemo zirimo no kumenya ko ubuzima atari umurongo ugororotse.

Izi mpanuro zitandukanye zagarutsweho kuri uyu Kane n’abayobozi b’iri shuri, mu muhango wo gushyikiriza impamyabushobozi abagera kuri 304 basoje amasomo yabo mu bijyanye no kwakira neza abakiiya (Hospitality Management), icungamari no kwihangira Imirimo (Business Management and Entrepreneurship) no mu Ikoranabuhanga no guhererekanya amakuru (Information Systems).

Umuyobozi uhagarariye Akilah Institute For Women mu Rwanda, Aline Kabanda, yasangije abarangije amasomo yabo ubuzima yanyuzemo mu myaka 15 ishize ubwo yarangizaga kwiga amasomo y’icyiciro cya mbere cya kaminuza burimo kumva ko ibintu bizagenda nk’uko yabitekerezaga.

Ati “Imyaka 15 ishize narangije amasomo yanjye y’icyiciro cya kabiri cya kaminuza, nari nejejwe cyane n’uko ntazongera gufata note [amasomo], gukora ibizamini ndetse nyuma y’imyaka itatu nari ngiye gutangira akazi kanjye ka mbere, nari mfite gahunda mu mutwe wanjye n’ibitekerezo y’uko ibintu bizagenda neza nk’uko nabyifuzaga”.

Kabanda yavuze ko gutekereza gutya yabiterwaga n’uko hari ibyo atabwiwe ubwo yarangizaga amasomo.

Ati “Mbere na mbere iyo nza kuba narabwiwe ko ubuzima atari umurongo ugororotse kubera ko amahirwe yaje mu buzima bwanjye ntago ari ayo natekerezaga”.

Nyuma y’izi mpanuro Kabanda yasabye abarangije amasomo yabo nabo kugira ibyo bazirikana birimo n’iri hame ry’uko ubuzima atari umurongo ugororotse.

Yagize ati “Muzibuke ko ubuzima atari inzira igororotse, mufunguke, mwakire ibintu kuko amahirwe azaza mu buryo butandukanye n’ubwo mwayateganyaga”.

Abarangije amasomo banasabwe kubera abandi umugisha babinyuza mu gukemura ibibazo byugarije sosiyete nyarwanda ndetse no kubera abandi bakobwa icyitegererezo cyane cyane abakiri bato, nabo bemera ko ibi bazabishyira mu bikorwa.

Mbabazi Esther uri mu barangije amasomo yabo uyu munsi yavuze ko impanuro bahawe uyu munsi n’ubumenyi yakuye muri Akilah buzamufasha mu buzima bwo hanze agiyemo cyane cyane ashyira ibyo yize mu bikorwa.

Yagize ati “Icyo nize uyu munsi ni uko, dukeneye kwimenyekanisha, dukeneye kuba abo turi bo twaratojwe, twahawe imbaraga igisigaye ni uko twe dufata inshingano zo kugenda tukaba ku ruhembe rw’ibibera mu muryango kuko ubu turi ijisho ry’igihugu cyacu, umuryango ndetse n’ibigo byacu. Ni ukugenda tukaba ba ambasaderi beza tugashyira ibyo twize mu bikorwa”.

Umuyobozi wa UN Women mu Rwanda, Fatou Aminata Lo wari n’umushyitsi mukuru muri uyu muhango, yasabye abanyeshuri basoje amasomo yabo gukora ibikorwa byiza bazibukirwaho, abibutsa ko uburezi bw’umwana w’umukobwa bukwiye kuba intego ya buri wese kuko ari ubuteza imbere igihugu muri rusange.

Umwe mu bashinze iri shuri Elisabeth Dearborn Davis, yavuze ko iri shuri ryafunguye imiryango mu Rwanda muri 2010 bitarenze mu 2030 rizaba ryafunguye andi mashami 30 azwi nka ‘Davis college’ ku mugabane wa Afurika na Aziya, azigisha abahungu n’abakobwa harimo irizatangira i Kigali muri Nyakanga umwaka utaha.

Abarangije amasomo muri Akilah bahawe inshingano zo kuba icyitegererezo ku bandi
Ababyeyi bitabiriye ibirori by'abana babo basoje amasomo muri Akilah
Byari ibyishimo ku banyeshuli 304 basoje amasomo yabo mu mashami atandukanye mu Ishuli rikuru rya Akilah
Byari ibyishimo kugeza ubwo banabyinnye
Umwe mu bayobozi yanezerewe ajya gufasha abakaraza kuvuza ingoma
Abitabiriye uyu muhango bafashe amafoto
Abakaraza basusurukije abitabiriye ibi birori
Fatou Aminata Lo wari n’umushyitsi mukuru muri uyu muhango yasabye abanyeshuli basoje amasomo yabo mu gukora ibikorwa byiza bazibukirwaho
Fatou Aminata Lo wari n’umushyitsi mukuru muri uyu muhango yasabye abanyeshuli basoje amasomo yabo mu gukora ibikorwa byiza bazibukirwaho
Abayobozi n'abakozi ba Akilah bafashe ifoto y'urwibutso

Amafoto: Munyarugerero Gift


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza