00:00:00 IGIHE NETWORK KN KINYARWANDA EN ENGLISH FR FRANCAIS

Abaganga bakoze Jenoside biganjemo abavuraga kuri CHUB: Umwihariko mubi mu kwica Abatutsi

Yanditswe na Prudence Kwizera
Kuya 21 May 2022 saa 11:04
Yasuwe :

Umuyobozi Mukuru w’Ibitaro bya Kaminuza bya Butare, CHUB, Dr Nsanzimana Sabin, yavuze ko abaganga n’abaforomo bagize uruhare muri Jenoside yakorewe Abatutsi mu 1994 aho bishe bagenzi babo, abarwayi, abarwaza n’abari babahungiyeho.

Yabigarutseho kuri uyu wa Gatanu tariki ya 20 Gicurasi 2022 ubwo muri CHUB haberaga igikorwa cyo kwibuka ku nshuro ya 28 Jenoside yakorewe Abatutsi.

By’umwihariko hibutswe abatutsi barenga 200 biciwe muri ibyo bitaro barimo abahavuraga, abari baharwariye, abarwaza babo n’abari bahahungiye.

Dr Nsanzimana yavuze ko benshi mu baganga bavuze ko bakoze Jenoside ari abo kuri CHUB.

Yagize ati “Muri raporo dufite y’abaganga batagira umupaka bakoze icyo gihe batugaragariza uburyo jenoside yakozwe muri ibi bitaro ndetse n’abayigizemo uruhare, abaganga benshi. Mu gihugu cyose habarurwa abaganga hafi 59 bagize uruhare muri Jenoside ariko kimwe cya kabiri cyabo ni aba hano muri CHUB cyangwa aha muri uyu mujyi wa Butare.”

Yakomje avuga ko ibyo bigaragaza umwihariko mubi abavuzi bagize mu gukora Jenoside yakorewe Abatutsi, cyane cyane ko muri CHUB hari igicumbi cy’ubuvuzi.

Mukankusi Isabelle, umwe mu bari bahungiye muri ibyo bitaro aza kuharokokera Jenoside arokowe n’Inkotanyi ubwo zabohoraga Umujyi wa Butare, yavuze ko yiboneye abaganga baza gutwara abantu bagiye kwica.

Ati “Hari ukuntu umuntu yasohokaga ashaka nk’ibyo kurya wajya kubona ukabona umuntu waraye aje gufata abantu bo kwica muhuye mu gitondo yambaye itaburiya. Njyewe byambayeho twahuriye hariya nzamuka mpita nsubira inyuma kuko nari naraye mubonye ari kumwe n’abandi baje gutwara abatutsi bajya kubica. Barazaga bagatwara abantu bakajya kubicira hariya munsi y’aho babyariza.”

Kuri ubu uyu Mukankusi yarakuze ndetse ni umwe mu bashinzwe kuvura kuri CHUB. Kimwe na mugenzi we Busumbigabo Albert, bavuga ko bibabaje kuba abaganga barishoye mu bwicanyi muri Jenoside, ariko bibaha isomo ryo kwirinda ivangura.

Busumbigabo ati “Ntabwo byumvikana ukuntu umuntu ushinzwe gutanga ubuzima uvura umurwayi, aho kugira ngo amuvure amwica. Ibyo rero biduha isomo rikomeye yuko indahiro abaganga bagira idakwiye kuba umuhango ahubwo dukwiye kubikora tubishyizeho umutima, abatugana tukabaha ubuzima aho kububambura.”

Umunyamabanga Uhoraho muri Minisiteri y’Ubuzima, Iyakaremye Zachée, yasabye abavuzi bose kurangwa n’urukundo no kwirinda amacakubiri kandi bagatanga serivise nziza nta vangura.

Yagize ati “Leta yacu icyo ishyize imbere ni ugutanga serivise nziza mu nzego zitandukanye ariko by’umwihariko mu rwego rw’ubuvuzi ni uguteza imbere ubushobozi no kugeza ubuvuzi ku bantu bose nta guheza. Icyo ni cyo gikomeye tubwira abakozi bo mu rwego rw’ubuvuzi gikwiye kuba indangagaciro ibaranga umunsi ku wundi mu byo bakora bakaba abagaba ubuzima batanga amahoro ku babagana bose.”

Bamwe mu baganga bagize uruhare muri Jenoside

Mu bavuzi bagize uruhare muri Jenoside bavuzwe barimo Dr. Sindikubwabo Theodore wari inzobere mu kuvura abana aza no kuba Perezida wa Leta y’abatabazi; Dr Nshimyumukiza Jotham wari umuyobozi w’ibitaro bya CHUB; Dr Gatera Godefroid wakoraga muri serivisi yo kubaga abarwayi (chirurgie); Dr Habarugira Pascal wakoraga muri serivise zo kuvura abagore; Dr Nsengiyumva Jean Népomuscène; Dr Kageruka Martin wari umuganga uvura indwara z’abagore.

Hari Dr Gatsinzi Theophile; Dr Nyiraruhango Berthe wari umuganga w’inzobere mu kuvura indwara zo mu muhogo; Dr Munyemana Sosthène; Dr Nshimyumuremyi Jean-Berchmans wari umuyobozi wungirije wa Kaminuza Nkuru y’u Rwanda; Dr Rwamucyo Eugène wari umuyobozi wa Centre Universitaire de Santé Publique de Butare/CUSP.

Dr Bararengana Séraphin; Dr Mugabo Pierre wakoraga muri Laboratoire pharmaceutique i Butare; Dr Ndindabahizi Jean Chrysostome wakoraga muri CUSP; Dr Habiyaremye Innocent warakoraga muri laboratwari ya CHUB.

Dr Mutwewingabo Bernard wari inzobere muri Anatomie- pathologie akora muri laboratwari ya CHUB; Dr Bigirimana Ignace; Dr Karemera Alphonse wari umuyobozi w’ishami ry’ubuganga rya Kaminuza i Butare; Dr Hakizimana Deogratias; Dr Nduwamariya Jeanne wari umuganga mu bitaro bya Kabutare GSOB.

Dr Mwigimba Cyrille wari umuganga muri CHUB; Dr Habimana Lin umuganga w’umurundi wakoraga mri CHUB; Dr Nyagasaza Aloys; Dr Sijyeniyo Charles wavuraga indwara z’amenyo n’izo mu kanwa; Dr Twagirayezu Emmanuel; Dr Ngirabatware Bruno wavuraga muri CHUB.

Dr Murengezi Ildephonse wari umuyobozi w’ikigo kigo cy’igihugu gishinzwe imiti i Butare na Dr Rutagengwa Emmanuel wakoraga mu icyo kigo; Teganya Leonard wari umunyeshuri mu mwaka wa nyuma wa kaminuza ishami ry’ubuganga.

Remera Simeon wari umuforomo akorera ikigo cy’abafite ubumuga bwo mu mutwe cya CARAES ishami rya Butare; Musanganire Felecite wakoraga mu mushinga wa SIDA mu kigo cya kaminuza cyari gishinzwe ubuvuzi rusange.

Umubikira Mukarubibi Theopista, umwenebikira wari ushinzwe igikoni cya CHUB; Mukamuzima Philomene wakoraga muri ONAPO/ Butare; Mukarurangwa Marie Rose; Mukamunana Juliette wakoraga mu mushinga wa Croix Rouge muri CHUB.

Uwimana Tereza wari umuforomokazi ukorera muri CUSP; Nyiramisago Tereza; Kantengwa Annonciata; Nyirahirwa Immaculee; Musabyemariya Marceline; Murara Gabriel; Twahirwa Joseph; Uwimbabazi Emmanuel wari ukuriye abaforomo n’ababyaza ku bitaro bya Kabutare; Habimana Athanase.

Gatera Anastase; Kubwimana Theodore; Mukandekezi Foromina; Rwaliye Constance umurundikazi wakoraga muri serivise y’ababyeyi ya CHUB; Hakizimana Gerard; Ryumeko Charlotte wari umuforomokazi w’Umurundi.

Nikuze Venantie; Mukarugwiza Monique; Ukobizaba Janvier; Nahimana Jean; Ntahobavukira Réverien; Kangabo Boniface; Rubangisa Alexis; Munyentwali Martin; Usabayezu Emmanuel n’abandi.

Abavuzi basabwe kurangwa n'urukundo
Bashyize indabo ku rwibutso rwa Jenoside rwa kaminuza y'u Rwanda, ishami rya Huye
Bamwe mu bafite ababo biciwe muri CHUB no mu Mujyi wa Butare
Basabwe kwirinda ivangura mu byo bakora byose
By’umwihariko hibutswe abatutsi barenga 200 biciwe muri ibyo bitaro barimo abahavuraga, abari baharwariye, abarwaza babo n’abari bahahungiye
Hagaragajwe uruhare rw'abaganga bo muri CHUB muri Jenoside yakorewe Abatutsi mu 1994
Umunyamabanga Uhoraho muri Minisiteri y'Ubuzima, Iyakaremye Zachée, yasabye abavuzi bose kurangwa n'urukundo no kwirinda amacakubiri kandi bagatanga serivise nziza nta vangura
Ibitaro bya CHUB byibutse ku nshuro ya 28 Jenoside yakorewe Abatutsi
Umuyobozi Mukuru wa CHUB, Dr Nsanzimana Sabin, yavuze ko abaganga n’abaforomo bagize uruhare muri Jenoside yakorewe Abatutsi mu 1994 aho bishe bagenzi babo, abarwayi, abarwaza n’abari babahungiyeho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .