00:00:00 IGIHE NETWORK KN KINYARWANDA EN ENGLISH FR FRANCAIS

Abaganga ba CHUB bamaze koroza abarokotse Jenoside inka 440

Yanditswe na Prudence Kwizera
Kuya 16 September 2022 saa 10:38
Yasuwe :

Abakozi b’Ibitaro bya Kaminuza bya Butare (CHUB) bakomeje guhindura imibereho y’abaturage benshi, binyuze muri gahunda bihaye yo gutanga 2% by’umushahara wabo buri mwaka, kugira ngo ayo mafaranga akoreshwe mu kuzamura imibereho y’abarokotse Jenoside yakorewe Abatutsi.

Ni gahunda ibi bitaro byatangiye mu 2011, aho kugeza ubu hamaze gutangwa inka 440 mu mirenge 13 yo mu Karere ka Huye.

Gasana Innocent wo mu Murenge wa Tumba wahawe inka n’ibi bitaro mu 2011, mu rugo rwe habaye impinduka zigaragara.

Yagize ati "Mbere batarayimpa nagorwaga no kubona amata yo kunywa, bikaba ngombwa ko njya kuyagura nabonye amafaranga. Ikindi ni ifumbire kuko nari nyikeneye, iyo mpinze ibishyimbo nsarura imifuka ibiri ingana n’ibilo 200 kandi narasaruraga umufuka umwe."

Kanayogi Félicien na we yavuze ko inka yahawe yamufashije kubona amata kuko abana be bayakunda cyane.

Ati "Abana banjye bakunda amata, ariko bari barayabuze. CHUB yampaye inka ihaka impa amata, kandi imeze neza, izakomeza kunteza imbere."

Kuri uyu wa Kane tariki ya 15 Nzeri 2022, bakomeje iyo gahunda, aho boroje inka imiryango icyenda yo mu Murenge wa Kigoma mu Karere ka Huye.

Bahawe inka z’inzungu ku buryo bigaragara ko zizabagirira akamaro, dore ko zihaka.

Niyitegeka Verene, umwe mu bahawe inka, yavuze ko ayitezeho kumuhindurira imibereho.

Ati "Nejejwe n’uko najyaga mbura ifumbire yo guhinga ngo nanjye neze none nkaba mpawe inka izajya iyimpa. Bampaye inka ihaka, izajya impa amata kuko ndayakunda kandi n’abana banjye babiri barayakunda."

Abamaze guhabwa inka bose bashimira abaganga n’abaforomo bo kuri CHUB biyemeje kubakura mu bukene, bagashima n’ubuyobozi bwiza buri mu gihugu butuma ibyo bikorwa byiza bishoboka.

Umuyobozi Mukuru wa CHUB, Dr Nsanzimana Sabin, yavuze ko inka baha imiryango itishoboye zitezweho no gukemura ikibazo cy’imirire mibi itera kugwingira, ikunze kuyigaragaramo.

Ati "Iyo abaturage bameze neza bituma n’indwara zigabanuka hakivuza bake, buriya indwara nyinshi hari igihe zitangirira ku bushobozi buke no ku mirire mibi. Ni uruhare rwacu ruto, ariko rushobora kugira n’abandi rutera ishyaka mu bigo dukora akazi kamwe cyangwa ibindi bikorera muri aka karere, bagashyigikira gahunda y’igihugu [Girinka]."

Umuyobozi w’Akarere ka Huye, Sebutege Ange, yavuze ko gahunda ya Girinka igira uruhare mu iterambere ry’abaturage, ashimira abaganga, abaforomo n’abakozi bo kuri CHUB biyemeje kuyishyigikira.

Ubuyobozi bwa CHUB buvuga ko muri iyi gahunda hamaze gutangwa inka mu mirenge 13 y’Akarere ka Huye, hakaba hasigaye umwe kugira ngo bakomereze mu tundi turere.

Dr Nsanzimana yavuze ko inka baha imiryango itishoboye zitezweho no gukemura ikibazo cy’imirire mibi itera kugwingira
Umuyobozi Mukuru wa CHUB, Dr Nsanzimana Sabin, yavuze ko bazakomeza kugira uruhare mu guteza imbere imibereho myiza y'abaturage
Kuri uyu wa Kane abakozi ba CHUB bakomereje iyo gahunda mu Murenge wa Kigoma aho boroje inka imiryango icyenda
Buri mwaka CHUB yoroza inka abatishoboye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .