Abagabo basambanya abana basabiwe izina riberekana mu bataye ubumuntu no gushyirwaho icyasha

Yanditswe na Evariste Nsengimana
Kuya 19 Ugushyingo 2019 saa 11:26
Yasuwe :
0 0

Abagabo n’abasore basambanya abana bakanabatera inda basabiwe guhabwa ibihano byihariye byiyongera ku biteganywa n’amategeko birimo kubaha izina ribashyira mu cyiciro cy’abataye ubumuntu no gushyirwaho icyasha kibaranga aho baherereye hose, buri wese akamenya ko ari abo kwirindwa.

Ubusanzwe amategeko y’u Rwanda ateganyiriza ibihano bikarishye umuntu uhamwe n’icyaha cyo gusambanya umwana ku ngufu, bigenda bihinduka bitewe n’ingaruka byamugizeho.

Muri ibyo, Itegeko ryateganyije ko gusambanya umwana uri munsi y’imyaka 18 bihanishwa igifungo kitari munsi y’imyaka 20 ariko kitarenze imyaka 25.

Iyo byakorewe ku mwana uri munsi y’imyaka 14, igihano kiba igifungo cya burundu kidashobora kugabanywa naho iyo byamuteye indwara idakira cyangwa ubumuga, igihano kiba igifungo cya burundu. Iyo byakurikiwe no kubana nk’umugabo n’umugore, igihano kiba igifungo cya burundu.

Mu nama nyunguranabitekerezo ku ruhare rw’umugabo mu kurwanya isambanywa ry’abana yateraniye i Kigali ku wa 19 Ugushyingo 2019, hagaragajwe ko icyaha gikomeje gufata indi ntera, basaba ko impande zose zishyira hamwe mu kubirwanya.

Minisiteri y’Ubuzima n’iy’Uburinganire n’Iterambere ry’Umuryango zigaragaza ko kuva mu 2016 kugeza muri Kanama 2019, abangavu basaga ibihumbi 70 basambanyijwe banaterwa inda.

Gusa aba ni ababyariye kwa muganga, bisobanuye ko hari abandi batamenyekanye bitewe n’uko wenda batatewe inda, abazikuyemo n’abandi. Abitabiriye iyi nama bagiye batanga ibitekerezo basaba ko ibihano byakazwa.

Umuyobozi Mukuru wungirije w’Urwego rw’Ubugenzacyaha (RIB), Kalihangabo Isabelle, yavuze ko uburemere bw’igihano atari bwo bukwiye guhabwa intebe kurusha gukumira kuko ‘Ntitwifuza ko abagabo n’abo basaza bacu barangiriza ubuzima muri gereza’.

Yavuze ko Minisiteri y’Ubutabera irimo gusuzuma ibijyanye n’ibihano birimo n’iby’uwahamijwe ibyaha byo gusambanya abana ku buryo izareba niba bishobora kongerwa cyangwa kugabanywa cyangwa igashyiraho izindi ngamba.

Kalihangabo yatanze ingero z’ingamba zashyirwaho zirimo nko kubashyiraho icyasha ku buryo aho bagiye hose abantu babamenya ko bateshutse ku muco Nyarwanda.

Ati “Natanga ingero z’uburyo aba bantu bafatwamo binakoreshwa ahandi, nkeka ko ari nabyo bikwiye gutanga umusaruro. Ubundi ibihugu byo hanze umuntu usambanya umwana bamwita uwabaswe no kurarikira gusambanya impinja [paedophilia]. Uwashyizweho icyashya cya Pedophile, ibye biba birangiye.”

Umuhanzi w’Umunyamerika R Kelly ni umwe mu bantu bakomeye washyizweho icyo cyasha, bituma abantu benshi bamuzi bamufata nk’umunyamico idahwitse.

Ati “Birakwiye ko buri wese wasambanyije abana Isi yose imumenya, akagira icyo cyasha. Ikindi gihano gikomeye dukwiye kureba kandi kitaza mu bucamanza kuri uyu munsi wahariwe abagabo, uyu munsi murebe izina muha bariya bantu basambanya abana. Ntabwo bakwiriye kwitwa abagabo.”

Yakomeje agira ati “Umugabo si ubwanwa, mu muco wa Kinyarwanda, umugabo ni ufite indangagaciro.”

Umuyobozi Nshingwabikorwa w’Umuryango w’abagabo uharanira guteza imbere ihame ry’Uburinganire no kurwanya ihohoterwa rishingiye ku gitsina (RWAMREC), Rutayisire Fidèle , yavuze ko abagabo basambanya abana bakwiye guhabwa izina ry’ibirura.

Ati “Ni ikirura ntabwo aba akiri umugabo. Twamugereranya n’inyamaswa ishobora gusambanya umwana wayo. Aba yarenze no kuba inyamaswa. Niyo mpamvu tuvuga ngo ni ikirura.”

Imibare y’Ubushinjacyaha bw’u Rwanda igaragaza ko mu mwaka wa 2018/19, abagabo bakekwagaho ibyaha byo gusambanya abangavu byari 3320, mu 2017/18 bari 2926 naho mu wawubanjirije bari 2030. Abagore bakekwagaho gusambanya abana bavuye kuri 62 mu 2016/17 bagera kuri 75 mu 2017/18 naho mu 2018/19 bagera kuri 97.

Muri abo bose bakekwagaho icyaha cyo gusambanya abangavu, mu 2018/19 ibyoherejwe mu nkiko byari 2221, mu 2017/18 byari 1866 naho mu 2016/17 byari 1285.

Mu manza 1673 zashyikirijwe Inkiko mu 2018/19 hahanwe abantu 1222. Mu manza 1480 zashyirijwe inkiko mu 2017/18, abahanwe ni 1168 mu gihe mu mwaka wawubanjirije haburanishijwe imanza 1355 zisiga abantu 1109 ari bo bahanwe gusa.

Umuyobozi Mukuru wungirije w’Urwego rw’Ubugenzacyaha (RIB), Kalihangabo Isabelle, yatanze ingero z’ingamba zashyirwaho zirimo gushyira icyasha ku gababo basambanyije abana ku buryo aho bagiye hose abantu babamenya ko bateshutse ku muco Nyarwanda
Umuhuzabikorwa w'Imishinga y'Impuzamiryango y'Uburenganzira bwa Muntu (CLADHO), Murwanashyaka Evariste ari gutanga igitekerezo
Umunyamabanga Uhoraho muri Minisiteri y’Uburinganire n’Iterambere ry’Umuryango, Ingabire Assumpta, ni we wayoboye ikiganiro mpaka
Umwe mu bakozi ba Isange One Stop Center ari gutanga igitekerezo ku gukumira icyaha cyo gusambanya abana
Iyi nama yitabiriwe n'abafatanyabikorwa ba Minisiteri y'Uburinganire n'Iterambere ry'Umuryango baturutse hirya no hino mu gihugu
Abitabiriye iyi nama bagaragaje ko ikibazo cy'abana baterwa inda giteye inkeke
Bamwe mu bayobozi batanze ikiganiro ku gukumira isambanywa ry'abana
Abitabiriye inama bavuze ko ikibazo cy'ubwiyongere bw'abana basambanywa gikwiye gushakirwa umuti

Amafoto Dushimimana: Ami Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza