Abaforomo n’abunganira abaganga binjiye muri Ejo Heza ngo izabafashe guteganyiriza amasaziro

Yanditswe na Ishimwe Alain
Kuya 20 Ukwakira 2020 saa 12:48
Yasuwe :
0 0

Abanyamuryango b’Ihuriro ry’abaforomo n’abunganira abaganga bikorera ku giti cyabo (RPNCO) binjiye mu bwiteganyirize bw’igihe kirekire bwa Ejo Heza kugira ngo nabo barusheho guteganyiriza amasaziro yabo.

Ejo Heza ni ikigega cyashyizweho na Leta y’u Rwanda, mu rwego rwo gufasha abaturage kuzigamira amasaziro.Uwizigamye ashobora gutangira kugobokwa igihe yujuje imyaka 55.

Mu rwego rwo guteganyiriza ahazaza, abagize Ihuriro ry’abaforomo n’abunganira abaganga bikorera ku giti cyabo bahisemo nabo kwinjira muri iki kigega. Aho ku ikubitiro batanze ubwiteganyirize bungana n’ibihumbi 110Frw ashyikirizwa Ejo Heza yo mu Kagari ka Kicukiro.

Umwe muri aba banyamuryango bafunguje konti muri Ejo Heza, Umubyeyi Clarisse avuga ko yabikoze nyuma yo gusobanukirwa neza akamaro k’ubu bwiteganyirize bw’igihe kirekire.

Ati “Kugira ngo twinjire muri Ejo Heza, twumvise ari igikorwa cyiza kuko harimo inyungu nyinshi ku rwego rw’umunyarwanda uwo ari we wese harimo nko kuba iyo umuntu yitabye Imana ikigega kimufasha[…] igikomeye kurushaho n’uko mu gihe tuzaba tutakibasha gukora iki kigo kizaduha ubufasha ntabwo uzasaza nabi ngo ubure ikikunganira mu buzima busanzwe.”

Umuyobozi wa RPNCO, Nambajimana Edison yabwiye IGIHE ko impamvu bahisemo kuzigamira amasaziro yabo muri Ejo Heza ari ukugira ngo batazaba umutwaro kuri leta mu gihe bazaba bamaze gusaza.

Yagize ati “Ntabwo tugomba no gusigara inyuma mu byiza igihugu cyagezeho ndetse na gahunda za Leta niyo mpamvu nk’abanyamuryango ba RPNCO twiyemeje gutangira kwizigamira mu kigega Ejo Heza aho bamwe muri twe bagiye gutangira gufunguza konti ndetse tunishyura twizigamira ejo hazaza hacu heza kugira ngo tutazaba umuzigo kuri Leta.”

Umunyamabanga Nshingabikorwa w’Akagari ka Kicukiro, iri huriro ryiyemeje gutangiramo ubwizigame bwaryo, Mugabo Christie yavuze ko umuturage uhitamo kwiteganyiriza muri iki kigega abikora hagendewe ku bushobozi bwe.

Ati “Ku mafaranga umuturage atanga, ayatanga akurikije ubushobozi bwe ariko amafaranga atajya munsi ni 1250frw ku kwezi,Leta yashyizeho inkunga ku bantu binjira muri iki kigega mu gihe cy’imyaka itatu ku bari mu cyiciro cya mbere, icya kabiri n’icya gatatu.”

Uretse gufunguza konti muri Ejo Heza, abanyamuryango ba RPNCO banatangiye ubwisungane mu kwivuze abatishoboye 100 bo mu tugari tune tugize Umurenge wa Kicukiro.

Uwizigamira muri Ejo Heza uri mu cyiciro cya mbere cy’Ubudehe, aba agomba gutanga nibura 15,000 Frw ku mwaka, naho uri mu cyiciro cya kabiri akizigamira 18,000 Frw ku mwaka, Leta ikamuha inyongera ya 100%. Mu gihe uri mu cya gatatu aba asabwa kwizigamira 18,000 Frw akongererwaho 50%. Naho abari mu cya kane basabwa nibura kwizigama ibihumbi 72,000 Frw ku mwaka ariko ntacyo bo Leta ibongereraho.

Abagize ihuriro rya RPNCO bari kuzuza ibisabwa kugirango biteganyirize muri ejo heza1
Abizigamiye mu kigega cya Ejo heza biteze ko bizabafasha mu gihe bazaba bashaje
Ejo Heza ni ikigega gifasha Abanyarwanda kuzigamira amasaziro
Umuyobozi wa RPNCO yavuze ko bahisemo kugana Ejo Heza ngo batazaba umutwaro ku gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .