00:00:00 IGIHE NETWORK KN KINYARWANDA EN ENGLISH FR FRANCAIS

Abafite ubumuga bukomatanyije basabye ko abarimu bigishwa ururimi rw’amarenga

Yanditswe na Nsanzimana Erneste
Kuya 15 May 2022 saa 09:49
Yasuwe :

Abanyeshuri bafite ubumuga bwo kutumva n’abafite ubumuga bukomatanyije bwo kutumva no kutavuga, bagaragaje ko bahura n’imbogamizi yo kuvugana n’abarimu babo bityo bikabagora gukurikira amasomo.

Basabye ko mu bigo by’amashuri hashyirwamo abasemuzi bazi ururimi rw’amarenga cyangwa abarimu bose bakigishwa uru rurimi.

Ni mu gihe Leta y’u Rwanda ikomeje gushyira imbaraga mu kwimakaza gahunda y’uburezi kuri bose n’uburezi budaheza ariko iyi gahunda ikaba ikiri guhura n’imbogamizi umubare muke w’abarimu bashobora gukoresha ururimi w’amarenga.

Abana baganiriye na IGIHE biga ku ishuri ry’abafite ubumuga bwo kutumva riherereye i Nyamirambo mu mujyi wa Kigali.

Aba bana bavuga ko mbere y’uko babona umuterankunga One World Group, bari barabuze uko bajya ku ishuri, kuko amashuri y’abana bafite ubumuga ahenze, kandi abarimu bo mu mashuri asanzwe bakaba batazi ururimi rw’amarenga ku buryo bakwigisha umwana ufite ubumuga bwo kutumva cg ubwo kutavuga.

Sandrine Uwera wiga mu mwaka wa kabiri w’amashuri yisumbuye, yavuze ko ko bagihura n’imbogamizi.

Ati “Abarimu bagerageza gukoresha ururimi rw’amarenga ariko akavuga akoresha n’ijwi, kandi akavuga yihuta cyane bimwe ntitubashe kubyumva. Twifuza ko badushakira umusemuzi cyangwa abarimu bakigishwa ururimi rw’amarenga kugira ngo tuge tubasha kumvikana neza".

Turahirwa Nkusi Adolis, mbere y’uko abona umuterankunga yari yaragumye mu rugo kuko iwabo batari kubona ubushobozi bwo kujya bamwishyurira ibihumbi 150Frw bya buri gihembwe ku ishuri ry’abafite ubumuga bwo kutavuga.

Ati "Ntekereza ko hakwiye kujyaho amashuri menshi y’abafite ubumuga kuva mu mashuri y’incuke kuva mu mwaka wa mbere kugera muri Kaminuza. Ikindi cyakorwa ni uko abarimu bose bakwigishwa ururimi rw’amarenga".

Laurette Mushimiyimana uhagarariye One World Group mu Rwanda , yavuze ko mu myaka 15 iri tsinda rimaze rikorera mu Rwanda basanze abana bafite ubumuga bagihura n’imbogamizi.

Ati "Politiki y’uburezi budaheza ishyirwa mu bikorwa ryayo riracyagoye kuko ntabwo twari twagira abarimu bahagije mu burezi bwihariye. By’umwihariko abafite ubumuga bwo kutumva no kutavuga n’ababyeyi babo hari igihe bananirwa kuvugana nabo, bakavuga bari ku ishuri kuko baba bafite abarezi babyigiye, ariko hanze mu muryango ugasanga naracyahejwe. Icyakorwa ni uko hakongerwa amahugurwa ku gufasha abana bafite ubumuga butandukanye".

Nyiramana Léontine wo mu murenge wa Rusatira mu karere ka Huye, afite umwana ufite ubumuga bukomatanyije.

Uyu mwana yarengeje igihe cyo gutangira ishuri ariko ntararitangira.

Yagize ati "Impamvu ntaramujyana ku ishuri ni uko amashuri y’abafite ubumuga ahenze, kandi akaba atashobora kwigana n’abandi bana mu mashuri asanzwe".

Umuyobozi ushinzwe uburezi budaheza muri Minisiteri y’uburezi, Kobusingye Mary yabwiye IGIHE ko kugeza ubu mu Rwanda nta rurimi rw’amarenga ruhuriweho ruratangira kwigishwa, ngo ni ibimenyetso byo kwifasha mu gutanga ubutumwa.

Mu rwego rwo gufasha abanyeshuri bafite ubumuga bwo kutavuga, iyi Minisiteri ifatanya na n’Ikigo cy’igihugu gishinzwe uburezi bw’ibanze REB, guha amahugurwa abarimu, ibi bigakorwa uko ingengo y’imari ibonetse.

Ati “Hatangijwe ishami ry’uburezi bwihariye n’ubudaheza muri Kaminuza y’u Rwanda Ishami ry’Uburezi mu rwego rwo kongera umubare w’abarimu bashobora kwigisha abana bafite inzitizi mu myigire yabo harimo na bafite ubumuga. Mu mashuri nderabarezi hongewemo amasomo ajyanye no kwigisha abana bose".

Uyu muyobozi ntiyemeranya n’abavuga ko amashuri yigisha abanyeshuri bafite ubumuga ahenze, kuko ngo irya menshi ari ibihumbi 90 kandi abana biga babayo.

Itsinda One World Group ryo mu Budage rimaze gufasha Abanyarwanda barenga 100, barimo 76 bari kwiga na 15 barangiye kwiga kaminuza. Mu bana ryishyurira ishuri 15 bafite ubumuga butandukanye.

Itsinda One World Group rimaze imyaka 15 rikorera mu Rwanda, rirateganya kongera umubare w'abana bafite ubumuga rifasha.
Abana bafite ubumuga bwo kutabuga, basaba ko abarimu bose bakwigishwa ururimi rw'amarenga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .