Corona Action Rwanda ni umushinga Nyarwanda ugamije gushaka ibisubizo ku bibazo byatewe na Covid-19. Ku bufatanye n’ibigo bitandukanye na Minisiteri y’Ikoranabuhanga na Inovasiyo, washyizeho iryo rushanwa kugira ngo umuntu ufite umushinga atekereza ko waba igisubizo ku kibazo runaka cyatewe na Covid-19, awutange.

Imishinga izatangwa binyuze ku rubuga rwa Corona Action Rwanda, hanyuma itoranyijwe ihabwe ubufasha bwo kuyinononsora, harimo ubujyanama bwose bukenewe bene yo bazahabwa n’impuguke ndetse n’amafaranga bakwifashisha.

Nyuma yo gusaba binyuze kuri urwo rubuga, intambwe ya mbere izaba iyo kugaragaza imishinga yatoranyijwe n’ubundi kuri uwo rubuga no ku mbuga nkoranyambaga za Corona Action Rwanda.

Abatoranyijwe bazahuzwa n’abashoramari batandukanye bashore muri iyo mishinga, hakurikireho guterwa inkunga n’ubujyanama.

Corona Action Rwanda iri gufatanya n’ibigo biharanira iterambere rya ba rwiyemezamirimo; birimo Inkomoko cyo mu Rwanda.

Hari na Norrsken Foundation cy’abanya-Suéde, na Westerwelle Startup Haus gikomoka ku muryango w’Abadage Westerwelle Foundation wita ku iterambere ry’ubukungu mu bihugu biri mu nzira y’amajyambere.

Kwiyandikisha ku bafite imishinga byatangiye ku wa 24 Mata 2020 birarangirana n’uyu wa 8 Gicurasi 2020.