Abadepite basubije inyuma ingingo yirukana abakozi ba Leta bafunzwe amezi abiri

Yanditswe na Ndahayo Emmanuel
Kuya 5 Kanama 2020 saa 10:00
Yasuwe :
0 0

Abadepite bagize Inteko Ishinga Amategeko banze ingingo y’itegeko ryirukana abakozi ba Leta mu kazi mu gihe bakatiwe igifungo kiri hejuru y’amezi abiri.

Uyu mushinga uteganya ko umukozi wese wa Leta ukatiwe igifungo kirenze amezi abiri, ahita asezererwa mu kazi agasimbuzwa undi.

Ubusanzwe, umukozi wa Leta agomba gukatirwa igihano kirenze amezi atandatu mbere yo kwirukanwa byemewe n’amategeko.

Minisitiri w’Abakozi ba Leta n’Umurimo, Fanfan Rwanyindo Kayirangwa, yavuze ko iyo umuntu amaze amezi arenze abiri adakora, yishyurwa kandi adasimbuzwa, bihombya Leta amafaranga ndetse n’inshingano yari afite zikadindira.

Aha rero ni ho Leta ihera yifuza ko iki gihe kigabanuka, umukozi ukatiwe amezi arenze abiri agasimbuzwa kugira ngo adakomeza kuyihombya.

Mu badepite 79 bari mu Nteko Ishinga Amategeko, 39 baritoye, batandatu ntibaritora mu gihe abandi 33 bifashe, naho ijwi rimwe riba imfabusa.

Depite Madina Ndangiza yagize ati “Igitekerezo cyacu ni uko umuntu yakurwa ku mwanya wa Leta ari uko yafunzwe amezi atandatu.”

Minisitiri Rwanyindo we ahamya ko icyo Leta yatekereje gifite ishingiro, ati “twumvaga amezi abiri yaba akwiriye.”

Komisiyo y’Imibereho myiza mu Nteko Ishinga Amategeko yasabye kongererwa igihe kugira ngo ikomeze gusuzuma uyu mushinga mbere yo kuwugarura mu Nteko kugira ngo wongere utorerwe.

Abagize Inteko Ishinga Amategeko, Umutwe w'Abadepite basubije inyuma umushinga w'itegeko ryirukana abakozi ba Leta bafunzwe amezi abiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .