Abadepite basabye ko ikibazo cy’ingo zirenga 22% zidafite inyakiramajwi cyakwitabwaho

Yanditswe na Twarabanye Venuste
Kuya 10 Kamena 2020 saa 08:13
Yasuwe :
0 0

Komisiyo y’Ubumwe bw’Abanyarwanda, Uburengazira bwa Muntu no Kurwanya Jenoside, yerekanye ko ingo 22,8% zidafite inyakiramajwi, Abadepite basaba ko harebwa uburyo zibageraho.

Byagarutsweho kuri uyu wa 10 Gicurasi 2020 ubwo Komisiyo y’Ubumwe bw’Abanyarwanda, Uburengazira bwa Muntu no Kurwanya Jenoside yagaragazaga raporo yakoze ku isesengura rya raporo ya Komisiyo y’Igihugu y’Uburenganzira bwa Muntu y’Umwaka wa 2018/2019 na gahunda y’ibikorwa ya 2019/2020.

Kimwe mu bibazo byagarajwe ndetse abadepite bakakigarukaho mu gutanga ibitekerezo ni icyerekeye ingo zigera kuri 22,8% mu Rwanda zitagira inyakiramajwi.

Perezida wa Komisiyo y’Ubumwe bw’Abanyarwanda, Uburengazira bwa Muntu no Kurwanya Jenoside, Depite Mukamana Elisabeth, yabanje kuvuga ko kuba izo ngo zihari nta burenganzira bwahungabanye kuko biterwa n’ubushobozi bwa buri wese.

Abadepite batandukanye berekanye ko ari ikibazo gikwiye gushakirwa umuti kuko ari bwo buryo inzego zose zifashisha mu kumenyekanisha no gukangurira abaturage gahunda na Politiki bagomba kugiramo uruhare.

Bavuze ko nubwo umubare w’abatunze telefoni wazamutse, inyakiramajwi ari ngombwa ku muryango kuko nko muri ibi bihe abana bakurikirana amasomo kuri radiyo, biba ikibazo igihe ufite telefoni mu rugo adahari.

Hari abavuze ko harebwa ibyiciro ingo zitazifite zirimo, ayo makuru agaherwaho hashakwa uko zaboneka. Ku rundi ruhande ariko hari abavuze ko zishobora kuboneka nk’uko abantu babonewe telefoni zigezweho.

Depite Mukamana Elisabeth yemeye ko bishoboka ko harebwa ibyiciro barimo, byagaragara ko bari mu byiciro by’abatishoboye bagira uburyo bagerwaho na gahunda zo kubazamura zibaha amafaranga bakaba bashishikarizwa kuzigura.

Ati “Barakora n’ubundi barahembwa kubera iki kibazo cy’amaradiyo, haba ubukangurambaga bwo gufasha bariya bantu kuba bagura ariya maradiyo kuko baba bahembwe. Birumvikana ni ubukangurambaga bwakomeza iki nacyo ni igitekerezo cyiza.”

Muri rusange iryo sesengura ryerekanye ko mu mirimo y’ibanze Komisiyo y’Uburenganzira bwa Muntu yakoze harimo kwakira no gukurikirana ibirego by’ihohoterwa ry’uburenganzira bwa Muntu.

Yakurikiranye ibirego by’ihohoterwa ry’uburenganzira bwa muntu 1328, birimo 473 bingana na 35.62% byayigejejweho mu mwaka wa 2018/19 na 855 bingana na 64.38% byari bigikurikiranwa byakiriwe mu 2017/18.

Muri rusange ibyo bibazo byerekeye uburenganzira ku mutungo, uburenganzira ku butabera, uburenganzira ku burezi, kumenya ababyeyi no kurerwa na bo n’ibirego by’uburenganzira bwo kwandikwa mu bitabo by’irangamimerere.

Ibirego 1081 muri byo bingana na 81.40% byarangije gukorerwa iperereza bishyikirizwa inzego ngo zibikemura ndetse kugeza ubu 864 bingana na 79.93% byabonewe ibisubizo naho 217 bingana na 20.07% biracyakurikiranwa.

Itegeko Ngenga rigena imikorere y’Umutwe w’Abadepite, riteganya ko Komisiyo y’Ubumwe bw’Abanyarwanda, Uburenganzira bwa Muntu no Kurwanya Jenoside ifite inshingano yo gusuzuma raporo ya Komisiyo y’uburenganzira bwa muntu.

Mu bibazo bikomeye iryo sesengura ryasabye ko bikemuka, harimo ikirego cy’abaturage bimuwe ku musozi wa Rubavu bagatuzwa mu Kagali ka Rukoko, aho n’ubundi basenyerwa n’amazi ava kuri uwo musozi.

Komisiyo yavuze ko yasuye Akarere ka Rubavu kakayigaragariza ko kirenze ubushobozi bwako, ikaba yasabye Minisiteri y’Ubutegetsi bw’Igihugu gukemura icyo kibazo mu mezi atandatu.

Minisiteri y’Ibikorwa remezo nayo yasabwe ko mu mezi atandatu yakemura ikibazo cy’abaturage b’i Nyamagabe basenyewe n’intambi mu iyubakwa ry’umuhanda wa Nyamagabe-Kitabi.

Abadepite batanze ibitekerezo kandi bemeza raporo ya Komisiyo y’Ubumwe bw’Abanyarwanda, Uburenganzira bwa Muntu no Kurwanya Jenoside
Bamwe mu badepite berekanye ko inyakiramajwi kuri buri rugo ari ngombwa bagendeye ku kuba ziri gufasha abana muri ibi bihe bya Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .