Abadepite bagaragaje impungenge kuri cyamunara basaba isesengura ry’ubundi buryo bwakoreshwa

Yanditswe na Evariste Nsengimana
Kuya 3 Werurwe 2020 saa 05:01
Yasuwe :
0 0

Abadepite bagaragaje ko hari igihe ibigo by’imari byihutira guteza cyamunara imitungo y’ababifitiye imyenda nyamara hari ubundi buryo bune bwakabaye bwifashishwa mu kwishyuza inguzanyo nk’uko biteganywa n’amategeko.

Ni ikibazo bagarutseho ku wa 2 Werurwe 2020 ubwo Komisiyo ishinzwe ubukungu n’ubucuruzi mu Nteko Ishinga Amategeko y’u Rwanda yaganiraga n’Ikigo cy’Igihugu cy’Iterambere(RDB) ku bibazo byagaragaye mu mushinga w’itegeko ryerekeye kurengera abahabwa serivisi z’imari, urimo gusesengurwa n’Inteko Ishinga Amategeko.

Itegeko ryo muri Gicurasi 2010 rihindura kandi ryuzuza iryo muri Gicurasi 2009 ryerekeye inguzanyo riteganya ko ‘Amasezerano y’ubugwate agaragaza ingingo ziha ububasha uwahawe ingwate bwo kuyicunga, kuyikodesha, kuyigurisha cyangwa kuyegukana igihe uwatanze ingwate atabashije kwishyura’.

Umwanditsi Mukuru muri RDB, Richard Kayibanda yavuze ko muri ubwo buryo bune bwakabaye bwifashishwa mu kwishyura inguzanyo harimo gukodesha ingwate no gukoresha amafaranga yavuyemo kugira ngo hishyurwe umwenda wa Banki.

Ati “By’umwihariko navuga ko ku kigero cya 99.99% banki zihitamo guteza cyamunara.. Uburyo bwo gukodesha ingwate ntabwo bukoreshwa.”

Kayibanda yavuze ko usanga banki zanga kwiyemeza gucunga umutungo watanzweho ingwate zigahitamo kuwuteza cyamunara kuko byihuta.

Perezida wa Komisiyo y’Ubukungu n’Ubucuruzi, Depite Munyangeyo Théogène, yavuze ko hakwiye gusesengurwa impamvu Banki zihitamo cyamunara mu buryo bune buteganywa n’itegeko.

Ati “Banki ntiziha umwanya uhagije gusesengura umushinga w’umuntu usaba inguzanyo ngo zimenye niba wunguka akaba ari nayo mpamvu zanga guhitamo mu bundi buryo buteganywa n’Itegeko zigahitamo guteza muri cyamunara ingwate iba yatanzwe.”

Munyangeyo yasobanuye ko cyamunara igaragaza ko imishinga myinshi Banki zemera kuyiguriza nyamara itakwiye kugurizwa, ku buryo zikwiye gushyiraho komite zishinzwe gucunga umutungo mu gihe nyirawo yananiwe kuwucunga.

Ati “Banki zikwiye gutanga ingwate mu gihe zizeye ko umushinga zigurije uzabyara inyungu. Mu gihe uhuye n’inzitizi zikemera gufatanya kuwukurikirana.”

Yavuze ko mu gihe ingwate itejwe muri cyamunara ku gaciro kari hasi bisigira igihombo ibigo by’imari byatanze inguzanyo no ku bukungu bw’igihugu muri rusange kuko hari ubwo agaciro kawo kajya munsi ya 50% cyangwa na 30%.

Kayibanda yavuze ko gukodesha no gucunga ingwate zitangwa mu Rwanda usanga akenshi ari ibintu bigoye.

Ati “Ingwate zitangwa ukunze gusanga ari inzu zituwemo, ubutaka budakoreshwa mu buryo bw’ubucuruzi. Ntabwo nzi igihe gukodesha uwo mutungo byatwara Banki kugira ngo ibone amafaranga yagujije. Kuyicunga nabyo byasaba kugira ibindi biyitangwaho.”

Depite Munyangeyo yavuze ko hakwiye gushyirwaho itsinda ry’inzobere ryo kwiga ubundi buryo bushobora gukoreshwa butari cyamunara.

Abadepite bagaragaje impungenge kuri cyamunara basaba ko harebwa ubundi buryo bwacya bukoreshwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .