00:00:00 IGIHE NETWORK KN KINYARWANDA EN ENGLISH FR FRANCAIS

Abacuruzi 31 batakoresheje EBM uko bikwiye baciwe arenga miliyoni 18 Frw

Yanditswe na Mugisha Christian
Kuya 13 June 2022 saa 03:31
Yasuwe :

Ikigo cy’Imisoro n’Amahoro (RRA) cyaciye abacuruzi 31 amande ya 18 130 810Frw kubera kudakoresha neza ikoranabuhanga rya EBM.

Nubwo hakigaragara umubare munini w’abacuruzi badakozwa ubu buryo bwo gukoresha EBM, hakaba hari n’ababukoresha nabi Ikigo cy’Igihugu cy’Imisoro n’Amahoro (RRA) gikomeza gushyiramo ingufu mu rwego wo kunoza imitangire y’umusoro ku nyongeragaciro (TVA).

Mu itangazo ryashyizweho umukono na Komiseri Mukuru w’Ikigo cy’Imisoro n’Amahoro (RRA), Bizimana Ruganintwali Pascal, rigaragaza urutonde rw’abacuruzi n’ibihano kuri buri wese kubera kudakoresha neza EBM mu bucuruzi bwabo.

Urutonde rwatangajwe kuwa 13 Kamena 2022, ruriho abacuruzi 23 batubahirije inshingano zo gukoresha EBM ndetse n’abacuruzi umunani bakoze amakosa yo gutubya umusoro.

Abacuruzi 23 batakoresheje inyemezabuguzi ya EBM, umunani muri bo bahanishijwe amande yikubye kabiri, umwe ahanishwa amande yikubye kane, barindwi bahanishwa amande yikubye inshuro 10 n’abandi 7 bahanishwa amande yikubye inshuro 20 by’umusoro wose wari wanyerejwe.

Uwaciwe amande ari hejuru ni sosiyete yaciwe miliyoni 4.4 Frw nyuma yo gukuba inshuro 20 umusoro wari wanyerejwe, bivuze ko hanyerejwe amafaranga ibihumbi 221,186 Frw.

Ku ruhande rw’abatubije umusoro bagatanga inyemezabuguzi zidahwanye n’ibyo abaguzi bakuye mu maduka, harimo batanu bahanishijwe amande yikubye inshuro 10 ku musoro wari wanyerejwe, abandi batatu bahanishwa amande yikubye inshuro 20.

Amande yose yaciwe aba bacuruzi bagaragazwa na RRA ni amafaranga asaga miliyoni 18 Frw.

Mu 2013 ni bwo mu Rwanda hatangijwe gahunda yo gutanga inyemezabuguzi mu buryo bw’ikoranabuhanga, EBM.

RRA igaragaza ko gushyira ahagaragara urutonde rw’abacuruzi badakoresha neza EBM bigamije gukangurira abandi batazikoresha kurushaho kubyitabira cyane ko umucuruzi utayikoresha ahanwa hakurikijwe ibyo itegeko riteganya.

Mu 2019, hasohotse itegeko rigena ko n’abantu batabaruye muri TVA batangira gukoresha EBM mu bikorwa byabo bya buri munsi.

RRA kandi yakanguriye abaguzi bose gusaba inyemezabuguzi ya EBM ndetse bakibuka no kugenzura ko amafaranga bishyuye ahuye n’ayanditse ku nyemezabwishyu bahawe.

Abacuruzi 31 baciwe amande y'asaga miliyoni 18 Frw kubera kudakoresha EBM uko bikwiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .