00:00:00 IGIHE NETWORK KN KINYARWANDA EN ENGLISH FR FRANCAIS

Ababyeyi bagiriwe inama yo kwitondera kuraga

Yanditswe na Prudence Kwizera
Kuya 17 January 2022 saa 02:42
Yasuwe :

Impuguke mu mategeko zagiriye inama ababyeyi baraga imitungo yose abana bamwe abandi bakabareka, ko bakwiriye kubyitondera kuko itegeko riteganya ko bagomba gusiga ibyo ababakomokaho bazazungura igihe batakiriho.

Ni mu gihe hari bamwe mu baturage bavuga ko hari ababyeyi baraga abana bamwe umutungo wose bityo bikaba byazana amakimbirane hagati yabo igihe umubyeyi amaze gupfa.

Irage cyangwa indagano ni imwe mu mpano umuntu uwo ari we wese ashobora guha undi, itangira kugira agaciro iyo uwayitanze yitabye Imana.

Hari bamwe mu baturage bavuga ko hari ababyeyi baraga umwana umwe umutungo wose bityo bikagira ingaruka yo kutumvikana zirimo gupfa imitungo n’ibindi igihe uwo mubyeyi wabo atakiriho.

Ngendahimana Jean Pierre wo mu Karere ka Huye ati “Hari igihe umubyeyi afata imitungo yose akayiraga umwana umwe kuko babanye neza, yamara gupfa akabasiga mu makimbirane rimwe na rimwe bakicana cyangwa bakajya kuburana mu nkiko.”

Christine Tuyishime we asanga umubyeyi akwiye kuraga abana bose umutungo ungana kugira ngo atazabasiga mu makimbirane.

Ati “Buriya byaba byiza umubyeyi araze abana bose akabaha umutungo ungana kuko iyo ahaye umwe undi akamureka biteza ibibazo. Njya mbibona aho ababyeyi basiga abana mu makimbirane bagasigara barogana cyangwa bakicana.”

Umwavoka ubarizwa mu Rugaga rw’Abavoka mu Rwanda, Me Aphrodise Kabagema, yagiriye inama ababyeyi baraga abana bamwe umutungo wose kubireka kuko amategeko ateganya ko umubyeyi agomba gusiga ibyo abana bazazungura kandi bikanakemura ibibazo by’amakimbirane hagati yabo

Ati “Impano rero zitangwa uko byagenda kose ntabwo zigomba kurenza ibyo amategeko ateganya kugira ngo igihe azaba atakiriho abamukomokaho cyangwa abazungura bazasange ntagihari.”

“Ni ukuvuga ko umubyeyi atemerewe gutanga ibirenze kimwe cya gatanu (1/5) cy’umutungo we kugira ngo ba bandi bamukomokaho bazabone ibyo bazungura.”

Bivuga ko iyo atanze impano akarenza bya bindi, icyo gihe amategeko ateganya ko ba bandi basigaye bashobora gutambamira za mpano yagiye atanga zikagarurwa mu muryango kugira ngo ba bazungura bazabone icyo bamuzungura mu gihe azaba atakiriho.

Itegeko rigena imicungire y’umutungo w’abashyingiranwe impano n’izungura, ivuga ko irage ari impano nk’izindi zose kereka iyo abandi bana bari mu muryango bagize uruhare ku rupfu rw’uraga, nibwo batagira uruhare mu izungura naho iyo nta kosa bakoze bose bemerewe kuzungura ababyeyi babo.

Imitungo irimo amasambu ikunze guteza amakimbirane hagati y'abavandimwe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .