Aba mbere bakize Coronavirus bashobora gusezererwa mu mpera z’iki Cyumweru

Yanditswe na Twarabanye Venuste
Kuya 2 Mata 2020 saa 11:05
Yasuwe :
0 0

Umuganga uri mu itsinda ry’abashinzwe gukumira Coronavirus mu Rwanda, Dr. Menelas Nkeshimana yatangaje ko abarwayi ba mbere bagaragayeho Coronavirus mu Rwanda bashobora gutangira gusezererwa mu mpera z’iki Cyumweru.

Tariki 14 Werurwe 2020 nibwo Minisiteri y’Ubuzima yemeje ko Coronavirus yageze mu Rwanda. Yagaragaye ku Muhinde wageze mu Rwanda ku wa 8 Werurwe 2020 avuye i Mumbai. Kuva icyo gihe abarwayi bakomeje gukurikiranwa ndetse byagiye bitangazwa ko bameze neza nta we urembye.

Bamwe muri abo barwayi baherutse kubwira itangazamakuru rya RBA ko mu minsi bamaze bameze neza bakurikije uko biyumva. Umwe mu Bahinde bagaragayeho Coronavirus mu Rwanda yavuze ko afite icyizere cyo gukira kuko nta kimenyetso na kimwe akigaragaza.

Dr. Menelas Nkeshimana usanzwe ari umuganga mu Bitaro bya Kaminuza bya Kigali CHUK akaba no mu itsinda ryo gukumira Coronavirus, yavuze ko kugira ngo umurwayi asezererwa babanza kumenya neza niba atakwanduza iyo virusi.

Ati “Kugira ngo umurwayi wa Coronavirus ave mu bitaro aho bavurira abarwayi bafite iyi Virusi bisaba ko hakorwa ibizamini bigaragaza ko icyo gihe atashye nta byago ko hari abandi yakwanduza. ibyo bishatse kuvuga ko nkuko tuba twamukoreye ikizamini yinjira mu bitaro kigaragaza ko afite virusi ku kigero runaka, n’iyo agiye gutaha arangije iminsi 14 ibyo bizamini bisubirwamo.”

Yakomeje avuga ko bakora ibizamini bibiri kugira ngo kimwe gishimangire ibisubizo by’ikindi.

Ati “Asabwa gukora ibizamini bibiri ikizamini cya mbere tugishyira ku munsi wa 14 aho dukora tukareba niba virusi yarashizemo, iyo dusanze virusi yarashizemo turongera tukagisubiramo nyuma y’amasaha 24 kugira ngo twongere turebe niba koko iyo virusi ntayigaragara mu kizamini yafatiwe. Ibyo byombi byagaragaza ko nta virusi irimo ko nta byago by’uko yakwanduza abo asanze mu muryango, icyo gihe turamusezerera agataha.”

Abajijwe ku cyizere cy’abamaze iminsi 14 bavurwa yavuze ko muri iki cyumweru hari icyizere ko hari abashobora gutaha.

Ati “Icyo cyizere kirahari rwose kandi nta banga ririmo muzabimenya.”

Kuva tariki 14 Werurwe umurwayi wa mbere agaragaye, ubu coronavirus imaze kugaragara ku bantu 82 mu Rwanda.

Nta muti cyangwa urukingo rwa coronavirus ruraboneka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .