2020 idasanzwe! Abahoze ari abakuru b’ibihugu 12 bamaze gupfa

Yanditswe na Iradukunda Serge
Kuya 18 Ukuboza 2020 saa 01:00
Yasuwe :
0 0

Umwaka wa 2020 wabaye uw’agahinda kenshi ku Banyafurika kuko wagize umwihariko wo gupfamo umubare munini w’abahoze ari abakuru b’ibihugu byo kuri uyu mugabane.

Kuva muri Mutarama kugeza ubu muri Afurika habarurwa abahoze ari abakuru b’ibihugu 12 bitabye Imana. Ni umubare munini ugereranyije n’imyaka yashize.

-  Daniel Arap Moi

Mu bahoze ari abakuru b’ibihugu bya Afurika bitabye Imana muri uyu mwaka, uwabimburiye abandi ni Daniel Arap Moi wayoboye Kenya imyaka irenga 20.

Moi yapfuye ku wa 4 Gashyantare afite imyaka 95. Uyu mugabo wabaye Perezida wa kabiri wa Kenya yaguye mu bitaro bya Nairobi.

Moi wabanje kuba umwarimu mbere yo kujya muri politiki, ni we Perezida wa Kenya wamazeho igihe kirekire ndetse ahindura bikomeye iki gihugu.

Yayoboye kuva mu 1978 kugeza mu 2002, agera ku butegetsi asimbuye Jomo Kenyatta.

Daniel Arap Moi yabaye Perezida wa Kabiri wa Kenya

Joachim Yhombi Opango

Undi wahoze ari umukuru w’igihugu wapfuye muri uyu mwaka ni Jacques Joaquim Yhombi-Opango wigeze kuba Perezida wa Repubulika ya Congo. yapfiriye i Paris mu Bufaransa ku wa 31 Werurwe azize Coronavirus.

Yari afite imyaka 81. Umuryango we wavuze ko yari asanzwe arwaye mbere yo gufatwa n’iyi virusi. Yhombi Opango yayoboye Congo-Brazzaville kuva mu 1977 kugeza mu 1979.

Yamaze imyaka myinshi muri gereza mbere y’uko hemerwa amashyaka menshi mu gihugu mu 1991, nyuma yaje kuba Minisitiri w’Intebe kugeza hatangiye intambara mu 1997.

Yaje guhungira mu Bufaransa yongera kwemererwa kugaruka mu gihugu cye hashize imyaka 10.

Pierre Nkurunziza

Muri uyu mwaka u Burundi bupfushije abigeze kubuyobora babiri, ku ikubitiro ku wa 9 Kamena nibwo inkuru mbi yabaye kimomo ko Pierre Nkurunziza witeguraga gutanga ubutegetsi yitabye Imana.

Iki gihe Guverinoma y’u Burundi yatangaje ko Perezida Nkurunziza, yapfuye aguye mu bitaro bizwi nka Hôpital du Cinquantenaire Natwe Turashoboye bya Karuzi, azize indwara y’umutima.

Nkurunziza yapfuye mu gihe haburaga igihe gito ngo ahererekanye ububasha na Évariste Ndayishimiye wari uherutse gutorerwa kuyobora iki gihugu.

Pierre Nkurunziza ni umwe mu ba Perezida bitabye Imana mu 2020

Benjamin Mkapa

Indi nkuru yabaye mbi ku Banyafurika muri uyu mwaka wa 2020 ni urupfu rw’uwahoze ari Perezida wa Tanzania, Benjamin Mkapa witabye Imana azize uburwayi.

Ku wa 24 Nyakanga, Perezida wa Tanzania Dr John Pombe Magufuli yatangarije kuri Televiziyo y’Igihugu, TBC, ko Mkapa yaguye mu bitaro bya Dar es Salaam aho yari arwariye. Yahise atangaza icyunamo cy’iminsi irindwi, aho amabendera yose mu gihugu yururukijwe kugeza mu cya kabiri.

Benjamin Mkapa yababaje Abanyafurika benshi

Pascal Lissouba

Muri Kanama uyu mwaka hamenyakanye kandi urupfu rw’uwahoze ari Perezida wa Repubulika ya Congo, Pascal Lissouba, aba uwa kabiri iki gihugu kibuze mu mwaka umwe nyuma ya Joachim Yhombi Opango wari wapfuye muri Werurwe.

Pascal Lissouba yabaye Perezida wa Repubulika ya Congo kuva 1992 kugeza mu 1997. Inkuru y’urupfu rwa Pascal Lissouba w’imyaka 88 yamenyekanye kur wa 24 Kanama 2020.

Uyu mukambwe yaguye mu Bufaransa mu gace ka Perpignan aho yari asanzwe atuye.

Pascal Lissouba yabaye Perezida wa Repubulika ya Congo

Moussa Traoré

Muri Nzeri kandi hapfuye Moussa Traoré wayoboye Mali guhera mu 1968 kugeza mu 1991. Yaguye mu Murwa Mukuru Bamako, ku myaka 83.

Traoré yagiye ku butegetsi tariki 19 Ugushyingo mu 1968 ahiritse ubutegetsi bwa Modibo Keïta wagejeje icyo gihugu ku bwigenge, nyuma y’uko abaturage bari bamaze kwinubira ubutegetsi bwe.

Traoré n’agatsiko k’abasirikare bafatanyije guhirika ubutegetsi babanje gushyiraho Komite ya gisirikare igamije kubohora abaturage, aho bahise bahagarika Itegeko Nshinga. Tariki 19 Ugushyingo 1969 nibwo Traoré yagiye ku butegetsi nka Perezida.

Tariki 26 Werurwe 1991, Traoré yahiritswe ku butegetesi n’abasirikare bayobowe na Amadou Toumani Touré. Traoré yahise afatwa arafungwa, akatirwa urwo gupfa gusa aza kugabanyirizwa igihano ahabwa igifungo cya burundu, naho mu 2002 arababarirwa.

Moussa Traore yapfuye afite imyaka 83

Amadou Toumani Touré

Muri uyu mwaka Mali kandi yabuze Amadou Toumani Touré wahoze ari Perezida wayo. Yapfuye ku wa 10 Ugushyingo afite imyaka 72.

Jeune Afrique yatangaje ko Amadou Toumani Touré wahiritswe ku butegetsi mu 2012, yaguye muri Turikiya aho yari yagiye kwivuriza.

Byavuzwe ko uyu mugabo yapfuye nyuma y’iminsi abazwe umutima mu Mujyi wa Bamako ari naho yavanywe ajyanywe muri Turikiya.

Nyuma yo guhirikwa ku butegetsi, Amadou Toumani Touré, yabaye mu buhungiro muri Sénégal. Yasubiye mu gihugu cye mu Ukuboza 2019.

Amadou Toumani Touré yavutse mu 1948, avukira ahitwa Mopti muri Mali. Mu 1991 ni umwe mu basirikare bahiritse ku butegetsi bwa Moussa Traoré. Touré wari ufite ipeti rya lieutenant-colonel yagizwe umuyobozi w’agatsiko kari kahiritse ubutegetsi, agirwa na Perezida w’inzibacyuho.

Mu 1992 Alpha Oumar Konaré yatorewe kuba Perezida, Touré agirwa Général. Mu mwaka wa 2002 nibwo yatorewe kuyobora Mali. Yatorewe manda ya kabiri mu 2007 gusa aza guhirikwa atarangije manda ya kabiri, ahirikwa n’agatsiko k’abasirikare bari bayobowe na Amadou Haya Sanogo.

Jerry John Rawlings

Ku wa 12 Ugushyingo muri uyu mwaka Afurika yongeye kubura undi mugabo ukomeye wanayoboye Ghana, Jerry John Rawlings azize uburwayi.

Uyu mugabo wanabaye mu gisirikare cya Ghana kirwanira mu kirere, ntihigeze hatangazwa uburwayi bwamuhitanye.

Uyu mugabo w’imyaka 73 yaguye mu bitaro bya Korle-Bu biherereye mu Murwa Mukuru Accra.

Jerry Rawlings wayoboye Ghana kuva mu 1981 kugeza mu 2001 yamenyekanye cyane mu kubera uruhare yagize muri coup d’etat yo mu 1979, yaje gutuma afungwa ariko nyuma y’igihe gito akaza kurekurwa.

Muri uyu mwaka yaje kuyobora iki gihugu mu buryo butemewe ariko bigeze muri Nzeri asubiza ubuyobozi mu biganza by’abasivile, maze Ghana itangira kuyoborwa na Hilla Limann.

Nyuma y’imyaka itatu, Limann ari we uyobora Ghana, Rawlings yaje gufata umwanzuro wo kwegura intwaro arwanya ubutegetsi bwe kubera ko yamushinjaga ruswa.

Muri uyu mwaka yaje kongera guhita afata inshingano ariko ayobora Ghana nk’umusirikare. Mu 1992 nibwo yasezeye mu gisirikare cya Ghana akomeza kuyiyobora nk’umusivile kugeza mu 2001.

Jerry John Rawlings yayoboye Ghana anayibera umusirikare

Mamadou Tandja

Mamadou Tandja wabaye Perezida wa Nigeri kuva mu 1999 kugeza mu 2010 yapfuye ku wa 24 Ugushyingo afite imyaka 82. Yaguye mu Murwa Mukuru Niamey.

Iki gihe ibiro bya Perezida muri icyo gihugu byasohoye itangazo rivuga ko hashyizweho icyunamo cy’iminsi itatu mu gihugu cyose mu rwego rwo kumuha icyubahiro akwiriye. Ntabwo icyahitanye Tandja cyatangajwe.

Uyu mugabo wabaye umusirikare, yinjiye muri politike mu 1990. Yabanje kuba Minisitiri w’Umutekano ku butegetsi bwa Ali Saibou.

Mu 1999 yatorewe kuyobora Niger, atorerwa manda ya kabiri mu 2004. Yahiritswe ku butegetsi mu 2010 ubwo yashakaga guhindira Itegeko Nshinga ngo yongere kwiyamamaza.

Tandja yapfuye yari amaze iminsi ubuzima bwe butifashe neza, ndetse yajyaga ajya kwivuza mu Budage, u Bufaransa na Maroc.

Urupfu rwe ruje mu gihe igihugu cye cyitegura amatora rusange arimo n’aya Perezida azaba tariki 27 Ukuboza 2020.

Mamadou Tandja ni umwe mu ba Perezida bayoboye Niger

Pierre Buyoya

Mu gihe tugana mu mpera z’umwaka abatuye Afurika cyane cyane Abarundi kuri uyu wa 18 Ukuboza bongeye kubyukira ku nkuru mbi ivuga ko uwahoze ayobora iki gihugu, Pierre Buyoya yapfuye.

Uyu mugabo w’imyaka 71 icyamuhitanye ntikiramenyekana ariko Ijwi rya Amerika ryatangaje urupfu rwe bwa mbere ryavuze ko hakekwa ko yaba yazize icyorezo cya Coronavirus.

Major Pierre Buyoya yayoboye u Burundi inshuro ebyiri (1987-1993, 1996-2003). Uyu mugabo aza ku mwanya wa kabiri mu bakuru b’igihugu bayoboye u Burundi imyaka myinshi (13).

Muri uyu mwaka kandi hapfuye Sidi Owalidou Abdallah wahoze ayobora Mauritanie na Hosni Moubarak wayoboye Misiri igihe kinini.

Pierre Buyoya yayoboye u Burundi ubugira kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .