Umwanzuro ku bujurire bw’abasirikare batanu ba RDF uzasomwa mu cyumweru gitaha

Yanditswe na Nkurunziza Ferdinand
Kuya 22 Gicurasi 2020 saa 06:58
Yasuwe :
0 0

Urukiko rw’Ubujurire rwa Gisirikare rwatangaje ko ruzasoma umwanzuro ku bujurire bw’abasirikare batanu b’u Rwanda, bakurikiranyweho ibyaha birimo gukubita no gukomeretsa, gukoresha imibonano mpuzabitsina ku gahato no guta inshingano ku wa Gatatu w’icyumweru gitaha.

Urukiko rwa Gisirikare ku wa 13 Gicurasi 2020 nibwo rwafashe umwanzuro wo gufunga mu gihe cy’iminsi 30 y’agateganyo, abasirikare batanu n’umusivili umwe. Ni icyemezo bahise bajuririra.

Ibyaha bashinjwa bivugwa ko babikoreye mu Mudugudu wa Kangondo ya II mu Murenge wa Remera mu Karere ka Gasabo.

Kuri uyu wa Gatanu, tariki ya 22 Gicurasi 2020, nibwo urukiko rwumvise buri ruhande, rugaragaza impamvu zifatika rushingiraho ruhagarara ku cyemezo cyarwo.

Ubushinjacyaha bwakomeje gushyigikira icyemezo cyafashwe n’Urukiko rwa Gisirikare cyo gufunga by’agateganyo Pte Ndayishimiye Patrick, Pte Nishimwe Fidèle, Pte Gatete François, Pte Gahirwa John, Pte Twagirimana Théoneste, mu gihe Ntakazirabo Donat we atarebwaga n’iburanisha ry’uyu munsi kuko atigeze ajurira.

Ku ruhande rw’abaregwa bose bagarutse ku mpamvu zishyigikira ubujurire bwabo ndetse basaba urukiko ko rwafata umwanzuro wo kubarekura bagakurikiranwa bari hanze kuko ngo ibyaha bakurikiranyweho bibemerera gukurikiranwa bari hanze, ndetse bamwe muri bo bakaba bifuza kujya kureba imiryango yabo badaherukana.

Ni ingingo yashimangiwe n’umwunganizi w’abaregwa utari wabonetse kuri uyu wa Kane bigatuma urubanza rusubikwa. Yavuze ko ibyaha abo yunganira bakurikiranyweho nta na kimwe amategeko ateganya ko cyahanishwa igifungo kirenze imyaka ibiri, kandi amategeko akaba ateganya ko ibyaha nk’ibyo bikurikiranwa abaregwa bari hanze.

Pte Ndayishimiye Patrick yireguye avuga ko uwamureze ko yamukoresheje imibonano mpuzabitsina ku gahato ari we Uwamariya Madelaine, bari basanzwe baziranye, ndetse banaryamana akamwishyura kuko yicuruzaga.

Ngo ibyo kurega ko yakoreshejwe imibonano mpuzabitsina ku gahato na Pte Ndayishimiye ni ibihimbano, kuko avuga ko byabaye muri Werurwe 2020, mu gihe nyamara baherukanaga muri Mutarama 2020.

Akomeza avuga ko uwamureze, ari umugambi wo kumwihimuraho kuko ngo yari yaramwanze nyuma yo kugira amakenga ko yazamugirira nabi cyangwa akamwanduza indwara zitandukanye, ashingiye ku myitwarire yamubonagaho mu gihe bari bamaranye.

Yongeraho ko iyo aza gukoresha imibonano mpuzabitsina ku gahato, uwamureze atari gutaka ngo abure umutabara mu gihe aho bikekwa ko icyaha cyabereye hari inzego zose za leta yashoboraga no kuregera ikibazo cye kigakurikiranwa hakiri kare, mu gihe nyamara byatwaye ibyumweru bisaga bibiri ngo ikirego gitangwe.

Indi ngingo Pte Ndayishimiye Patrick ashingiraho ku kuba yarahimbiwe icyaha cyo gukoresha imibonano mpuzabitsina ku ngufu, ngo ni uko imyenda bivugwa yaje yambaye itandukanye n’iyo abasirikare bambara igihe boherejwe gucunga umutekano mu baturage.

Ku cyaha cyo gukubita no gukomeretsa Pte Ndayishimiye Patrick avuga ko aregwa n’uwitwa Shema, ngo ntacyo yakoze ahubwo ngo yakubiswe n’abandi bantu barimo abanyerondo.

Ngo Shema avuga ko yakubiswe na Pte Ndayishimiye ku wa 24 Werurwe 2020, mu gihe umutangabuhamya we avuga ko yakubiswe tariki ya 12 Werurwe 2020; byongeye kandi ngo igihe kivugwa ko yakubise Shema ntiyari yakoze.

Ikigeretse kuri ibyo ngo muri raporo y’umutekano ikorwa buri munsi, nta na hamwe higeze havugwa ko hari abasirikare bamereye nabi abaturage, mu gihe nyamara abatanze ikirego bavuga ko Pte Ndayishimiye Patrick yabakubitaga buri gihe uko aje ku kazi muri Kangondo II.

Ku cyaha cy’ubujura, Pte Ndayishimiye Patrick avuga ko abamurega ntabo azi kandi ko nta kijyanye n’ibikorwa by’ubujura azi byabaye, mu gihe Ubushinjacyaha bwo buvuga ko yabyemeye mu nyandiko mvugo y’Ubushinjacyaha n’Ubugenzacyaha.

Pte Ndayishimiye Patrick avuga ko muri dosiye havugwamo kwiba telefoni 25 mu gihe abarega bo bavuze ko bibwe telefoni eshatu kandi nazo bazisubijwe.

Yongeraho ko dosiye y’Ubushinjacyaha n’Ubugenzacyaha ibiyikubiyemo ntabyo azi, ahubwo ko ubwo bari bafungiye i Kami na bagenzi be, bahatiwe gusinya kuri dosiye imushinja ubujura.

Ku cyaha cyo guta izamu, Pte Ndayishimiye Patrick avuga ko atigeze ata izamu kuko nubwo hari igihe yabaga ari we uyoboye itsinda ryoherejwe gucunga umutekano mu duce dutandukanye, inshuro nyinshi na we yabaga ari kumwe n’uyoboye itsinda yabaga yoherejwemo kandi ko ntaho ubuyobozi bwe bwagaraje ko yataye akazi yahawe.

Umwanya munini mu kwisobanura wahawe uyu Pte Ndayishimiye Patrick kuko ari we ufatwa nk’umuyobozi mu baregwa bose kandi akaba yaragiye ayobora amatsinda arimo abo bareganwa mu bihe bitandukanye, nubwo batigeze bose bahurira mu itsinda rimwe mu gihe kimwe.

Pte Nishimwe Fidèle na we uregwa gukoresha imibonano mpuzabitsina ku gahato uwitwa Cyuzuzo Angelique yabwiye urukiko ko umurega atamuzi.

Yongeyeho ko n’itariki bivugwa ko yakoresheje Cyuzuzo Angelique imibonano mpuzabitsina ku gahato ari kumwe na Pte Ndayishimiye Patrique, uwo munsi yari yakoreye ku marembo y’Ikigo cya Gisirikare cya Kami.

Uyu musirikare we anaregwa ko yakoresheje imibonano mpuzabitsina ku gahato undi witwa Uwamariya Chantal, icyaha na cyo ahakana ko atigeze akora.

Ibyo gusambanya ku gahato kwa Pte Nishimwe Fidèle, Ubushinjacyaha buvuga ko ari Pte Ndayishimiye Patrick wabishinje Pte Nishimwe Fidèle mu nyandikomvugo y’Ubushinjacyaha n’Ubugenzacyaha, ariko Pte Ndayishimiye Patrick yahakaniye urukiko ko atigeze ashinja mugenzi we.

Ngo ni ibyaha Ubushinjacyaha buvuga ko byakozwe tariki ya 14 Werurwe 2020, aho abaregwa baje bwa mbere ari abasirikare babiri, bagakubita Uwamariya n’undi mukobwa/umugore babanaga; nyuma bakaza kugaruka ku wa 30 Werurwe 2020, Pte Nishimwe Fidèle agakoresha imibonano mpuzabitsina ku gahato Uwamariya.

Gusa mu rubanza hagaragaye ikibazo cyo guhuza amatariki ibyaha bikekwa ko byakoreweho kuko hari aho Ubushinjacyaha bwavuze ko ku wa 24 Werurwe 2020, Pte Nishimwe Fidèle yakoresheje Uwamariya Chantal imibonano mpuzabitsina ku gahato, nyamara uwo munsi atari mu itsinda ryari ryoherejwe gucunga umutekano mu baturage.

Pte Nishimwe Fidèle ahakana ko nta mibonano mpuzabitsina yakoze kandi ko ibijyanye n’ubujura ntabyo azi.

Umwunganizi mu mategeko w’abaregwa yagaragarije urukiko ko Ubushinjacyaha nta bimenyetso bifatika bwagaragaje bishingirwaho hanzurwa ko hari impamvu zikomeye abaregwa bagomba gukomeza gufungwa by’agateganyo kuko ibyo Ubushinjacyaha buvuga byose bishingiye ku magambo adafite ibindi bimenyetso biyashyigikira.

Ubushinjacyaha bwahawe umwanya wo kuvuga impamvu zikomeye zituma busaba ko abaregwa bakomeza gufungwa by’agateganyo, bukomeza gushingira ku nyandikomvugo y’abarega n’abaregwa, nayo itavuzweho rumwe n’impande zombi.

Kimwe mu byateye kwibazwaho cyane mu rukiko ni uburyo Uwamariya Chantal ngo ubwe yagiye kugura agakingirizo ko gukoreshwa iyo mibonano mpuzabitsina yiswe iy’agahato, urukiko rukavuga ko ibyo ubwabyo bigaragaza ko nta gahato kabaye mu gihe kandi abavuga ko bahohotewe bazwiho gukora umwuga w’uburaya nkuko byemejwe n’umusivire uregwa muri uru rubanza.

Umusivili ureganwa n’aba basirikare asanzwe ari umunyerondo mu Kagari ka Nyarutarama.

Ku cyaha gukoresha imibonano mpuzabitsina ku gahato, uwitwa Uwamariya Madelaine avuga ko yakorewe na Pte Ndayishimiye Patrick ufite inyinya, w’igikara kandi mugufi biringaniye.

Gusa urukiko rwasanze nta nyinya ukekwa afite ndetse atari n’igikara nk’uko byavuzwe. Urukiko rwagaragaje ko uwareze ashobora kuba yarareze umuntu utandukanye n’ukekwa.

Ikindi kandi ngo gukoresha umuntu imibonano mpuzabitsina byari kwitwa icyaha mu gihe urega n’uregwa bari kuba bafite isezerano ryemewe n’amategeko batandukiriye cyangwa uregwa akaba atagejeje ku myaka y’ubukure iteganywa n’amategeko.

Urukiko rwemeje ko umwanzuro ku iburanisha rishingiye ku bujurire bwo kuri uyu wa Gatanu, uzasomwa ku wa Gatatu, tariki ya 27 Gicurasi 2020, saa tanu za mu gitondo.

Isomwa ry’umwanzuro w’urubanza rw’ubujurire rw’abasirikare batanu ba RDF ryashyizwe mu cyumweru gitaha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .