BPR Plc mu bufatanye bwatumye Abadivantisiti batangira gukoresha ikoranabuhanga mu gutanga amaturo

Yanditswe na Mukahirwa Diane
Kuya 16 Ukwakira 2020 saa 10:20
Yasuwe :
0 0

Banki y’Abaturage y’u Rwanda (BPR Atlas Mara) ku bufatanye na Mo-pay n’Itorero ry’Abadivantisiti b’Umunsi wa Karindwi, bashyizeho uburyo bw’ikoranabuhanga abayoboke b’iri torero bazajya bifashisha mu gutanga icyacumi n’amaturo.

Kuwa 14 Ukwakira nibwo Itorero ry’Abadivantisiti b’umunsi wa karindwi ku bufatanye na Banki y’Abaturage y’u Rwanda bamuritse iri koranabuhanga ryiswe CFMS (Church Financial Management System).

Iri torerero rifite abayoboke mu mpande zose z’u Rwanda ryatekereje gushyiraho ubu buryo bwa CFMS mu rwego rwo gukangurira abayoboke baryo kugendana n’iterambere ndetse no kugabanya uburyo bwo guhanahana amafaranga.

Umuyobozi w’iri torero mu Rwanda, Pst Byiringiro Hesron, yavuze ko amatorero nayo akwiye kujyana n’iterambere.

Ati “Burya amajyambere ntagira ibyo asiga inyuma, ni ukuvuga ngo iterambere rigendana na byose yaba mu idini, yaba mu gihugu ndetse no mu miryango hose haba hagomba kugera iterambere.”

Ubu buryo bwo gukusanya amaturo hakoreshejwe ikoranabuhanga bwatangiranye mu nsengero z’abadivantisiti zisaga 2000 zo hirya no hino mu gihugu.

Umuyoboke w’iri torero azajya akoresha telefoni ye mu gutura, akanda*517# ubundi akurikize amabwiriza, ku bafite telefoni zigezweho bo bashobora no gukoresha porogaramu ya Mo-pay. Amaturo azajya atangwa azajya ajya kuri konti y’iri torero iri muri Banki y’Abaturage y’u Rwanda.

Ubu buryo bwo kwakira amaturo hakoreshejwe ikoranabuhanga Pst Byiringiro yavuze ko buzafasha abayoboke b’iri dini kwirinda Covid-19.

Ati “Nubwo twatekereje uyu mushinga mbere ya Covid-19 ariko kuri ubu uzatuma n’abayoboke bacu batandura kuko batazahanahana amafaranga batura.”

Umuyobozi ushinzwe ubucuruzi muri BPR Plc, Mugisha Shema Xavier, yavuze ko iri koranabuhanga rizazana impinduka mu buryo abayoboke b’iri dini bari basanzwe batura.

Ati “Ubu ntabwo bikiri ngombwa ko umuntu ajya kuri banki kuzana amafaranga ngo abone kuyatanga mu itorero. Ahubwo arajya abikorera kuri telefoni bimwihutire ndetse n’itorero amaturo abagereho mu buryo bworoshye.”

Yakomeje asaba andi madini n’amatorero akorera mu Rwanda ko babasanga nabo bakabafasha gukoresha ikoranabuhanga mu bijyanye n’amaturo.

Ati “Turakangurira amatorero atandukanye ko baza tugafatanya muri uru rugendo rwo gukoresha ikoranabuhanga kuko byorohereza abayoboke babo. Kandi ni byiza kuri leta y’u Rwanda muri gahunda bashyizeho yo gukoresha ikoranabuhanga mu kugabanya ihanahana ry’amafaranga.”

Banki y’Abaturage yatangiye gukorera mu Rwanda mu 1975, kuri ubu ifite amashami agera ku 184 n’aba-agent ba BPR Hafi barenga 300 mu gihugu hose. Serivisi zayo zirimo kubitsa, kubikuza no kohererezanya amafaranga zishobora kuboneka hifashishijwe ikoranabuhanga.

Igikorwa cyo gutangiza iri koranabuhanga cyabimburiwe n'isengesho
Uyu muhango witabiriwe n'abakozi ba BPR batandukanye
Umuyobozi w'Itorero ry'Abadivantisiti mu Rwanda, Pst Byiringiro Hezron, yavuze ko amadini nayo akwiye kwimakaza ikoranabuhanga
Umuyobozi ushinzwe ubucuruzi muri BPR Plc, Shema Mugisha, yavuze ko iri koranabuhanga rizavugurura uburyo bw'imitangire y'amaturo
Umuyobozi wa BPR Plc, Maurice Toriotich asobanura uko iri koranabuhanga rikora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .