Abakozi ba CMI bivuyemo bahishura ko Ben Rutabana afungiwe muri Uganda

Yanditswe na Musangwa Arthur
Kuya 30 Kamena 2020 saa 09:59
Yasuwe :
0 0

Icukumbura ryakozwe n’Umuryango w’Abanyamerika Uharanira Uburenganzira bwa Muntu, International Relief and Human rights Initiative (IRHRI) ryahishuye ko Ben Rutabana ari muri kasho z’Urwego rw’Ubutasi rwa Gisirikare muri Uganda, CMI, ku bugambanyi bwa Kayumba Nyamwasa.

Mu nyandiko wasohoye ku wa 25 Kamena 2020, Umuyobozi Mukuru akaba n’Uwashinze IRHRI, Greg Smith Heavens, yavuze ko bakoze iperereza ku kibazo cya Ben Rutabana, wakoze urugendo akoresheje pasiporo 16DA52086, akava i Bruxelles mu Bubiligi ku wa 4 Nzeri 2019 saa 21:45, mu ndege ya Emirates Airlines.

Yabanje guhagarara kuri Dubai International Airport muri Leta Zunze Ubumwe z’Abarabu, akomereza ku Kibuga Mpuzamahanga cya Entebbe muri Uganda, aho yageze ku wa Nzeri 2019, saa 13:50. Uyu mugabo yakomeje kuvugana n’umugore we Diane Rutabana, kugeza ku wa 8 Nzeri 2019, nyuma ntibamenya irengero rye.

Heavens avuga ko Rutabana yagombaga gusubira mu Bubiligi ku wa 19 Nzeri 2019 saa 21:30 ku isaha ya Kampala, akagerayo ku wa 20 Nzeri 2019, saa 13:25.

Yakomeje ati “Gusa ku mpamvu zitasobanuwe, Rutabana ntabwo yafashe iyo ndege, ahubwo bitandukanye n’uko yabigenzaga, ntabwo yamenyesheje umugore we impamvu zatuma atinda cyangwa ko yahinduye gahunda, ndetse inshuro zose yahamagarwaga telefoni ye nta wayitabye.”

Heavens avuga ko bemera ko nubwo inshingano z’inzego z’ubutasi ari uguharanira umutekano w’igihugu zikoreramo, IRHRI “ihamya ko ifatwa rya Rutabana ryashingiye ku makuru atariyo yatanzwe ku mpamvu z’uruzinduko rwe muri Uganda.”

Ngo yaje kwegera Ikigo cy’Abanyamategeko cyo muri Uganda, Mushabe, Munungu & Co. Advocates, ngo basabe ifungurwa rya Ben Rutabana, icyo kigo gitanga ikirego mu rukiko ku wa 12 Gashyantare 2020, gisaba ko yarekurwa nta mananiza.

Umucamanza Esta Nambayo wo mu Rukiko Rukuru i Kampala yategetse inzego zitandukanye za leta zirimo CMI, ISO, Polisi ya Uganda, Ishami ry’Ubugenzacyaha (CID), Ibiro bishinzwe Iperereza ridasanzwe (SIB) n’Intumwa Nkuru ya Leta ya Uganda, kugeza Rutabana mu rukiko bitarenze ku wa 19 Gashyantare 2020.

Me Dr. David Mushabe wari uhagarariye IRHRI n’umuryango wa Rutabana, bageze mu rukiko uwari uhagarariye leta avuga ko bijyanye n’inzira bigomba gucamo ngo Rutabana arekurwe, bakeneye umwanya wo kubikurikirana.

Umucamanza yanzuye ko urubanza rwimurirwa ku wa 27 Gashyantare 2020, kandi ko yizeye ko inzego zose bireba zizabasha kugaragaza Rutabana mu rukiko.

Nyamara kuri iyo tariki, Brian Musota wari uhagarariye leta yabwiye urukiko ko atabashije kubona Rutabana muri kasho y’urwego urwo arirwo rwose muri Uganda, nyuma yo kuvugana n’abayobozi bazo. Icyo gihe hemeranyijwe ko irengero rya Rutabana ryamenyekana hifashishijwe inzira za dipolomasi.

Dr. Mushabe yagize ati “Icyo tuzi ni uko Rutabana yinjiye muri Uganda kandi nta gihamya cy’uko yasohotse muri Uganda kuva icyo gihe, ndetse ntabwo yigeze abonwa n’umwe mu bagize umuryango we. Rero niba inzego z’umutekano zitamufite, uburyo bwa dipolomasi hagati ya Uganda n’u Bufaransa zikwiye kwifashishwa zikagaragaza ahantu ari.”

Gushakisha byarakomeje

Heavens avuga ko IRHRI yakomeje gushakisha, nyuma bamwe mu bakoze b’inzego z’umutekano baza kwivamo, ko Rutabana akiri muri Uganda.

Ati “Abaduhaye amakuru bose biteguye gutanga amakuru mu nkiko igihe bahamagazwa. Umwe mu baduhaye amakuru ku bushake yavuze ko Rutabana afungiwe ahantu h’ibanga ha CMI muri Mbuya, ameze neza ariko ko nta muntu wemerewe kumugeraho.”

Ashingiye ku makuru yahawe, Rutabana ngo afunganwe n’abandi Banyarwanda bagera kuri 20, ariko afatwa mu buryo butandukanye cyane n’abandi.

Akomeza avuga ku buryo Rutabana afunzwemo n’umutekano uhambaye acungiwe, ko bitoroshye ko wahinjirana akuma gafatwa amajwi cyangwa amashusho, byarimba ukaba wanafata ifoto imwe rukumbi.

Ati “Nubwo waba uri colonel cyangwa jenerali nta kintu bakwemerera ko uhinjirana. Ari ku muryango wa gatatu muri Upper Mbuya CMI3.”

IRHRI yatangaje ko amakuru imaze kubona ari uko abantu bo muri Rwanda National Congress (RNC) bayobowe na Faustin Kayumba Nyamwasa ari bo bari inyuma y’ifatwa n’ifungwa rya Rutabana.

Amakuru babonye avuga ko abo bantu yabahaye amafaranga menshi mu bisa no kwigura, ariko bamushyira mu mazi abira kuko nta buryo yari guheraho ayagaruza.

Ngo byaje kugaragaza ko hari ubwumvikane buke hagati ya Rutabana, Nyamwasa n’abandi bantu bari abayobozi bakuru mu ishyaka rya RNC, baza kumufata nk’uwabigumuyeho, ku buryo akigera muri Uganda yahise afatwa nk’icyihebe kubera amakuru yari yamutanzweho ku nzego z’umutekano.

Heavens avuga ko umuryango bagerageje kuvugisha Umuyobozi bwa CMI, Maj. Gen. Abel Kandiho avuga ko atazi ifatwa n’ifungwa rya Rutabana, ko uwabahaye ayo makuru ari umwanzi wa guverinoma, ko arimo kugerageza kubayobya.

Yavuze ko nta mpamvu Rutabana yafungwa mu buryo bwihariye, kuko n’ibyihebe bikomeye bifatwa bikabazwa bikagezwa imbere y’urukiko.

Gen Kandiho yabwiye IRHRI ati “Ndabizi ko bakomeje gushaka guharabika umwe mu bofisiye banjye bakora cyan kandi bizewe witwa Col. CK. Asiimwe, nizere ko atari uwitwa Odong wo muri ISO waguhaye ayo makuru niba ntibeshye?”

Kandiho ngo yavuze ko nta ruhare Uganda nk’igihugu yaba yaragize mu ifatwa rye, ahubwo byakozwe n’abashaka guhindanya isura y’igihugu, ku buryo “ntekereza ko Rutabana yaba yaragambaniwe.”

Ugendeye kuri ibyo, ngo Rutabana yaba atarafashwe ku mabwiriza yatanzwe n’umuyobozi runaka muri guverinoma, ahubwo byaba ari ubwumvikane bw’agatsiko ka Kayumba Nyamwasa n’abantu bo muri CMI. Gusa wakwibaza uburyo umuntu yafungwa iki gihe cyose, nta muyobozi urabaza impamvu ari aho.

Amakuru avuga ko hari abantu bari bamaze igihe bamenyesha Rutabana ko atemerewe gukandagira muri Uganda, ko nabikinisha ubuzima bwe buzaba buri mu byago.

Uwo muryango wakomeje uti “Abo bantu bageze aho batera ubwoba umuryango we n’abayobozi ba IRHRI, bavuga ko nitudahagarika gukurikirana icyo kibazo, bazatuma ibiro by’umuryango wacu muri Uganda bifungwa.”

Gusa uyu muryango uvuga ko wahisemo gukomeza kuvuganira abantu babikeneye barimo Rutabana n’abandi banyarwanda bafungiwe muri Uganda.

Ubwumvikane buke bwa Rutabana wari Komiseri muri RNC ushinzwe kongera Ubushobozi na Kayumba Nyamwasa, bwatangiye nyuma y’uko abarwanyi b’uwo mutwe baraswaga bikomeye muri Congo muri Kamena 2019, abarokotse bagafatwa bakoherezwa mu Rwanda, ubu bari imbere y’inkiko.

Ibura rya Rutabana rikomeje gushyirwa mu maboko ya CMI na Kayumba Nyamwasa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .