Umunsi witiwe u Rwanda "Rwanda Day" uzamara iminsi 2 uzabera i Boston muri Leta ya Massachusetts ufite insanganyamatsiko y’Agaciro inzira irakomeje, hateganyijwemo igikorwa cy’imurikabikorwa kizaba ku ya 22 Nzeri guhera saa mbiri kugeza saa saba ku munsi wa kabiri ari na wo wanyuma wa Rwanda Day.

Imurikabikorwa rizitabirwa n’ibigo bitandukanye bisaga 11 birimo Banki y’Igihugu itsura majyambere (BRD), Banki ya Kigali(BK), Abahagarariye Urwego rw’Igihugu Ngishwanama ku birebana n’imari n’imigabane (CMAC) n’Isoko ry’Imari n’Imigabane mu Rwanda (RSE), Urwibutso rwa Kigali (Gisozi), AEGIS TRUST, Ikigo cy’ igihugu cy’iterambere(RDB), Ikigo cy’igihugu gishyinze umutungo kamere, Ikigo cy’igihugu cy’ubwiteganyirize, Gahaya Links Ltd, Entreprise Urwibutso na Real Contractors.

Umuyobozi wa Banki y’Igihugu Itsura Amajyambere azatanga ibisobanuro ku buryo ikoranamo n’abakiriya bayo, ahanini mu birebana n’ubwubatsi bw’amazu (Real Estate), serivisi nshya muri iyi banki yari yarifujwe na Diaspora Nyarwanda.

Bimwe mu byo iyi banki yibandaho birimo gutanga inguzanyo mu bikorwa bikurikira by’ubuhinzi n’ubworozi, amahoteli n’ubukerarugendo, amazi n’ingufu, uburezi n’ubuzima, imyubakire, Kohereza ibicuruzwa hanze, ikoranabuhanga n’itumanaho, inganda, ubwikorezi n’ibijyanye na bwo, guha inguzanyo ibigo by’imari bito n’ibiciriritse n’ibindi.

Banki ya Kigali izitabira imurikabikorwa itanga serivisi zikurikira kuri Diaspora zirimo kohereza amafaranga kuri konti za BK ku buntu aho waba uri hose ku isi, inguzanyo ku nyungu n’igihe cyo kwishyura byumvikanweho, Serivisi za banki hifashishijwe umurongo wa interineti aho waba uri hose ku isi, ikarita za visa zifashishwa mu gukura amafaranga kuri konti aho waba uri hose ku isi no gufungura konti hifashishijwe interineti.

Abahagarariye Urwego rw’Igihugu Ngishwanama ku birebana n’imari n’imigabane (CMAC) n’Isoko ry’Imari n’Imigabane mu Rwanda (RSE) bazagaragaza uko isoko ry’imari n’imigabane mu Rwanda rihagaze.

Urwibutso rwa Kigali rwifashishwa mu kwibuka abazize Jenoside yakorewe Abatutsi byibutsa buri wese amarorerwa yabaye mu Rwanda nabo bazitabira imurikabikorwa.

Urwibutso rwa Kigali rwafunguwe ku mugaragaro ubwo hizihizwaga isabukuru y’imyaka 10 yari ishize habaye Jenoside yakorewe Abatutsi mu Rwanda, muri Mata 1994. Muri uru rwibutso hashyinguye imibiri y’abantu barenga 250,000. Izi mva zibutsa buri wese ikiguzi cy’ubujiji.

Uru ni Urwibutso ruhoraho ku barokotse Jenoside, rwifashishwa mu kwibuka ababo baguye muri ayo marorerwa.

Aegis Trust, umuryango w’abakorerabushake washyinzwe ku bufatanye n’Umujyi wa Kigali hamwe n’igihugu cy’u Bwongereza uhugura abanyeshuri, mu ntego yawo.

Aegis Trust igamije kurwanya ibyaha byibasira inyokomuntu ku Isi yose bazitabira imurikabikorwa muri Rwanda Day. Aegis Trust imaze imyaka icumi ukorera mu Rwanda ku bufatanye na Guverinoma.

Watangijwe na James ndetse na Steven Smith mu mwaka wa 2000 mu gihugu cy’u Bwongereza, mu rwego rwo gukangura urubyiruko rw’isi yose kurwanya Jenoside.

Kuri ubu kubera inyigisho zitangwa n’uyu muryango, Urwibutso rwa Jenoside rwasuwe n’abantu benshi barimo abatuye mu gihugu n’abatuye hanze yacyo, baza kureba amateka mabi yaranze u Rwanda. Rwanasuwe n’uwahoze ari Perezida wa Leta Zunze Ubumwe z’Amerika George W. Bush n’umunyamabanga wa Loni, Ban Ki-Moon.

Aegis Trust inagamije gutsura umubano mwiza hagati y’u Rwanda, u Bwongereza, Canada, Mexico na Leta Zunze Ubumwe z’Amerika.

Aegis yageze ku bikorwa byinshi bishimishije birimo itorero Mashirika ribyina imbyino zirimo inyigisho zirwanya Jenoside aho basuye u Bwongereza.

Muri uyu munsi wa Rwanda Day, Ikigo cy’Igihugu Cy’iterambere RDB cyo kizasobanura uburyo bwo Gushora imari mu Rwanda n’ibikorerwa mu Rwanda mu rwego rw’ishoramari. RDB izasobanura ku mishinga mito n’iminini, inganda nto n’iziciriritse n’uburyo abatuye mu gihugu no hanze yacyo bashora imari mu mishinga.

Bazanamurika igitabo gikubiyemo uburyo washora imari mu Rwanda, gikubiyemo iby’ubukerarurugendo mu Rwanda, ikoranabuhanga n’ubuhinzi. RDB inafasha mu guhugura abantu no mu gufasha abantu kwihangira imirimo aho bafasha imishinga myiza.

Ikigo cy’igihugu cy’umutungo kamere kizamurikira abazaba bari muri Rwanda Day ibirebana n’ubutaka bitandukanye birimo itegeko rigenga ubutaka, uburyo bwo kubwandikisha, imirimo ikorwa n’iki kigo, impamvu ubutaka bubaruzwa, uburyo babaruza ubutaka, icyo kububaruza bimarira ba nyira bwo, uko iki gikorwa cyo kubwandikisha gihagaze ubu n’ibindi birebana n’ubutaka.

Bazanamurika iby’ikigega cy’ingoboka, hamwe na GAHAYA Links LTD ishyirahamwe ry’Abanyarwandakazi biteza imbere mu mpano zitandukanye zirimo ubukorikori, kuboha imitako irimo n’Agaseke, kwerekana imideri, ubudozi bw’imyambaro ya Kinyafurika, aho abasaga 4000 kuri ubu babashije kwiteza imbere.

Entreprise Urwibutso na yo izitabira imurikabikorwa. Izwi cyane ku rusenda rw’Akabanga n’umutobe w’Agashya bikunzwe mu Rwanda no hanze.

Real Contactors sosiyeti y’Ubwubatsi izamurika ibikorwa byayo birimo kubaka amazu ajyanye n’icyerekezo.