Mu gihe bizwi ko urwego rw’ubuhinzi n’ubworozi bufatwa nk’inkingi ya mwamba mu iterambere, aho na Guverinoma y’u Rwanda yiyemeje gukuba kabiri umusaruro w’ubuhinzi muri gahunda NST2.

Ibi Banki ya Kigali, yabibonye kare ihita ishora imari mu nguzanyo zigenewe abahinzi n’aborozi kugira ngo babashe gukora imishinga ijyanye na byo, aho hashyizweho ingengo y’imari ya miliyari 200 Frw zizahabwa abazikeneye mu gihe cy’imyaka itanu.

Ibi bije mu gihe abahinzi bagiye bataka ko banki zibihunza, ibituma imishinga y’ubuhinzi izahara kandi abaherekejwe neza bavamo abashoramari bakomeye.

Urugero rwa hafi ni urwa Uzabakiriho Elias,umuhinzi ntangarugero wo mu Karere ka Nyamagabe, Umurenge wa Gatare, ukora ubuhinzi bw’umwuga kuri hegitari 60 aho atubura imbuto y’ibirayi, amashaza, ibigori n’ingano.

Uzabakiriho, avuga ko amaze guhabwa inguzanyo na BK isaga miliyoni 300, agashimangira ko inguzanyo yagiye ahabwa ari zo zatumye atera imbere.

Uyu muhinzi watangiye kuguza muri BK mu 2007, ahereye kuri miliyoni 23 FRW. Nyuma yaje kwaka indi ya miliyoni 96 Frw, akurikizaho iya 130 Frw, akurikizaho indi ya miliyoni 70 Frw, ari nayo ari kwishyura ubu.

Uyu mugabo avuga ko gukorana na banki byamuzamuriye imikorere aho ubu afite Fuso na Howo atwaza ifumbire, akabyongeraho kuba afite inka 20, ingurube n’inkoko byose bimuha ifumbire n’amafaranga, aho byibura ku mwaka abona inyungu y’asaga miliyoni 100 Frw.

Ati ‘‘Byarankanguye,ubu nsigaye nitumiriza ishwagara ya toni 35 yo guhingisha ikaza mu modoka yanjye ya Howo, nashyizeho abakozi barimo umuveterineri n’umwagoronome w’umukobwa wanjye bakurikirana ubuhinzi n’ubworozi byanjye bya gihanga, kandi n’ubundi sinteze gutezuka, kuko ndacyari kumwe na BK.’’

Mu gikorwa cy’ubusabane bw’abayobozi bakuru ba BK bagiranye n’abakiliya babo bo mu turere twa Gisagara, Nyanza, Nyamagabe, Nyaruguru na Huye, ku wa 27 Ugushyingo 2025 bwabereye i Huye, Umukozi ushinzwe ishami ry’ubuhinzi n’ubworozi muri BK, Bizimana Alexis, avuga ko bafashe iya mbere mu guteza imbere ubuhinzi n’ubworozi kuko babona neza uruhare rwabyo mu iterambere.

Bizimana, yavuze ko mu gihe cy’imyaka ibiri ishize, inguzanyo ziteza imbere ubuhinzi n’ubworozi batanze izingana na miliyari 102 Frw kandi bimaze guhindura ubuzima bwa benshi.

Ati ‘‘Ibi bikorwa bigaragara ko byafashije mu kwihaza mu biribwa, gukora ubuhinzi buhangana n’imihindagurikire y’ikirere, kandi muri iyi gahunda, twabonye ko 100% y’abazifashe ari ubwa mbere bari batse inguzanyo z’ubu bwoko, aho 44% zazo zigira uruhare mu kwihaza mu biribwa, 52% zigahanga akazi hagati y’abantu babiri na batatu, kandi ni ibintu twishimira.’’

Bizimana akomeza avuga ko kugeza ubu BK ifite ahahinzi borozi bakorana na BK basaga ibihumbi 120, mu gihe abafite inguzanyo barenga ibihumbi 16 baba abahinga ikawa, umuceri, icyayi, ibigori no mu bworozi bw’inka, ingurube, inkoko n’ibindi.

Umuyobozi Mukuru wa BK, Dr. Diane Karusisi, yavuze ko Banki ya Kigali ifitiye abakiliya bayo ibyiza byinshi haba ubu ndetse no mu bihe bizaza, abasaba gukomeza kubegera nk’uko nabo baba bamanutse bakabegera.

Ati ‘‘ Iyi banki ni nkuru, kandi dushinzwe iterambere rya buri wese cyane cyane abikorera, ni nayo mpamvu dufite abashinzwe ibigo bito n’ibiciriritse, abashinzwe abagore, abashinzwe ubuhinzi n’ubworozi, ibi byose twagiye tubishyiramo imbaraga kuko twabonye ari wo muyoboro w’iterambere ry’igihugu cyacu.’’

Ishuri rya New Light Complex Academy, ryatangiranye abanyeshuri 110, none rimaze kugira abasaga 900 mu myaka ine gusa kubera gukora na BK

Umuyobozi Mukuru wa BK, Dr. Karusisi kandi, yeretswe imishinga y'ubwubatsi bw'umukiliya wa BK mu Ntara y'Amajyapfo, wayatsemo inguzanyo ngo abashe kuvugurura inyubako ze

Uzabakiriho Elias, amaze kwaka inguzanyo y'asaga miliyoni 300 Frw yashoye mu buhinzi, aho atubura imbuto zitandukanye ku buso bwa hegitari 60

Uruganda rw'icyayi rwa Kibeho rwashimwe na BK ku kuba rukomeje guteza imbere abahinzi b'icyayi muri Nyaruguru

Umuyobozi Mukuru wa BK, Dr.Karusisi Diane, yavuze ko bazi neza agaciro k'abakiliya babo, ari na yo mpamvu bamanuka kubatega matwi

Umwe mu bajenti ba BK ukorera mu Karere ka Huye, yashimiye BK kuko yagize uruhare mu guhanga akazi, asaba ko hakongerwa ingano y'amafaranga abitswa n'aba-Agent

Umunyamabanga Nshingwabikorwa w'Intara y'Amajyepfo, Nshimiyimana Vedaste, yashimye BK uruhare igira mu gukwirakwiza amafaranga ya Leta mu nzego zose

Umuyobozi Mukuru wa BK, Dr.Karusisi Diane, yanagiranye ibiganiro n'Umwipisikopi wa Diyosezi Gatolika ya Butare, Mgr Ntagungira Jean Bosco

Umukozi ushinzwe ishami ry’ubuhinzi n’ubworozi muri BK, Bizimana Alexis, avuga ko bafashe iya mbere mu guteza imbere ubuhunzi n’ubworozi aho bashoyemo miliyari 200 Frw

Muri uru ruzindo kandi, banasuye aho BK, Ishami rya Huye rikorera

Perezida w'Urugaga rw'Abikorera mu Karere ka Huye, Butera Bagabe Gervais, yashimye uruhare rwa BK mu iterambere, ayisaba kongera serivisi yihuse no kujya irimbisha umujyi wa Huye mu minsi mikuru

Itsinda rigari ry'abayobozi ba Banki ya Kigali, batambagijwe Uruganda rwa Kibeho, bashima imikorere yarwo

Dr Karusisi, yanagenewe impano n'uruganda rw'icyayi rwa Kibeho

Dr Karusisi yavuze ko BK ari banki nkuru kandi yiteguye guhobera buri wese mu byo akora ikamuteza imbere

Dr. Karusisi yanasuye Ishuri New Light Complex Academy, riri mu Karere ka Huye, ishuri BK imaze guha inguzanyo isaga miliyoni 200 Frw

Dr Karusisi yashimye intera New Light Complex Academy, ibifashijwemo na BK aho babahaye isomero, babagurira imodoka ebyiri zitwara abanyeshuri ndetse babafasha no mu nyubako z'amashuri

BK ishami rya Huye, ryasabwe kujya ririmbishwa mu bihe by'iminsi mikuru isoza umwaka kugira ngo wa Huye ube ushyushye

Banki ya Kigali yatangaje ko yihaye intego yo kwita kuri buri cyiciro harimo n'icy'imishinga y'abihayimana