Urwego rw’uburezi muri Kenya ruracumbagira ahanini kubera imyigaragambyo ya hato na hato mu barimu bo mu mashuri abanza n’ayisumbuye. Iyi myigaragambyo iraterwa no kutishimira imishahara bahabwa, basaba ko yakongerwa.

BBC dukesha iyi nkuru ivuga ko Leta ya Kenya ihangayikishijwe n’iki kibazo, bivugwa ko byaba bibi kurushaho n’abarimu bo muri za kaminuza baramutse bigaragambije.

BBC itangaza ko mu Burengerazuba bw’iki gihugu kimwe no mu tundi duce kuri uyu munsi amashuri yari afunze.

Abarimu barasaba kongererwa imishahara ku gipimo kuva ku ijanisha riri hagati ya 100 na 300 by’imishahara yabo isanzwe. Nyamara iki cyifuzo Leta yagiteye utwatsi ivuga ko ubushobozi bwo gusubiza ibyifuzo by’aba barimu itabufite; ikabifata nko kurenza urugero.

Muri iyi myigarambyo abarimu bari bitwaje ibyapa byanditseho amagombo yo mu rurimi rw’Icyongereza asobanura ngo « Abarimu si nk’injangwe zirya imbeba ».

Ikibazo cy’abarimu muri Kenya kivugwaho uburyo butandukanye. Bamwe bavuga ko akarengane karushaho kwiyongera, maze abarimu bakaba ari bo bahura n’ingaruka nyinshi.

Aha bavuga ko umwarimu ahembwa amadolari 300 ku kwezi mu gihe umudepite ageza ku bihumbi 10 by’amadolari ku kwezi.

Ibi bibaye mu gihe abanyeshuri bo mu byiciro by’ibanze biteguraga gukora ibizamini bisoza ibi byiciro mu kwezi gutaha.