Leta y’inzibacyuho muri Guinea Bisau, irashinja igihugu cya Portugal kuba inyuma y’igikorwa cyo gushaka guhirika ubutegetsi bw’iki gihugu cyabaye mu rukerera rwo kuri iki cyumweru kikaza gupfuba abantu barindwi bahasize ubuzima.

Mu gitondo cyo kuri iki cyumweru ni bwo abasirikare bayobowe na capitaine Pansau N’Tchama bagerageje gufata ibirindiro bya zimwe mu ngabo bikomeye zirwanira ku butaka, gusa nyuma yo kurasanaho bikomeye mu gihe kigera ku isaha izi ngabo zaje guhunga.

Itangazo ryashyizwe ahagaragara na Guverinoma ya Guinea Bisau, riragira riti "Guverinoma ifata Portugal, Umuryango w’ibihugu bivuga ururimi rwa Portugal na Carlos Gomes Junior nk’abatangije iki gikorwa cyo guhungabanya igihugu bifite intego yo gutembagaza leta y’inzibacyuho."

Ibi bibaye nyuma y’amezi atandatu habaye ihirikwa ku butegetsi rya Carlos Gomes Junior, ubu muri Guinea Bissau hakaba hariho leta y’inzibacyuho ifite ibibazo bitayoroheye birimo akaduruvayo gashingiye ahanini ku icuruzwa ry’ibiyobyabwenge.

Mu mirwano yabaye ku cyumweru abantu barindwi bahasize ubuzima, Leta ya Bissau ikaba ivuga ko ari ugushaka gutuma idatuza bikorwa na Carlos Gomes Junior wari umukuru w’iki gihugu ubu ukorana bya hafi na Leta ya Portugal kuko na Guverinoma ye ari ho yahungiye.