Nyuma yo gutsinda amatora mu kwezi gushize, Umukuru w’igihugu cya Ghana John Dramani Mahama ararahira kuri uyu wa mbere tariki ya karindwi Mutarama 2013.

Abarwanya rumwe n’ubutegetsi buriho batangaje ko bamaze kugeza ikirego cy’uko muri ayo matora habayemo kwiba amajwi.

Mahama w’imyaka 54 yabaye umukuru w’igihugu nyuma y’urupfu rwa mugenzi we John Atta Mills ku ya karindwi Nyakanga 2012, atsinda amatora ku wa karindwi Ukuboza uwo mwka ku majwi 50.7% kuri 47,7%. ya Akufo-Addo bari bahanganye.

Nyuma y’amatora ishyaka rya NPP rya Addo ryatangaje ko yabayemo uburiganya, ubu rikaba ryaranagejeje ikirego mu rukiko.

Gusa nk’uko tubikesha The Daily Monitor, indorerezi zavuze ko aya matora ari mu yagaragayemo umucyo muri Ghana kikaba ari ikimenyetso cy’intambwe ishimishije muri demokarasi.

NPP ryavuze ko ritari bwitabire umuhango w’irahira rya Perezida Mahama, bamwe muri bo bakaba basabye John Kufour wigeze kuba Perezida akaba n’umuyoboke w’iri shyaka kutawitabira.