00:00:00 IGIHE NETWORK KN KINYARWANDA EN ENGLISH FR FRANCAIS

Yaba yazize u Rwanda? Umujyanama mukuru wa Tshisekedi yirukanywe nyuma yo guhatwa ibibazo

Yanditswe na Musangwa Arthur
Kuya 16 Mutarama 2023 saa 11:23
Yasuwe :

Impinduka zikomeje kuba nyinshi mu mutima w’ubutegetsi bw’i Kinshasa, aho Perezida FélixTshisekedi yahinduye imiterere y’inzego mu biro bye, akuraho benshi mu bayobozi.

Televiziyo y’igihugu, RTNC, yatangaje ko binyuze mu mateka ya perezida ane, hashyizweho abayobozi 50. Mu bakuwe mu myanya harimo uwari umujyanama bwite wa Tshisekedi, Fortunat Biselele, wasimbuwe na Kahumbu Mandungu Bula.

Mu miterere mishya y’inzego, harimo Umuyobozi mukuru w’ibiro bya perezida, abungiriza batatu, abajyanama bihariye babiri, abajyanama bakuru 13, abahuzabikorwa ba gahunda zihariye batanu, abashizwe ubutumwa umunani n’ababungiriza barindwi.

Biselele akuweho mu gihe guhera ku wa Gatandatu tariki 14, yatangiye guhatwa ibibazo n’Urwego rushinzwe iperereza, ANR.

Ubwo Tshisekedi yafataga indege yerekeza mu Busuwisi kuri iki Cyumweru, Biselele yari akiri muri kasho za ANR i Kinshasa.

Jeune Afrique yatangaje ko uyu mugabo wari umwe mu bakomeye yahamagajwe ari kumwe na Pacifique Kahasha ushinzwe ingendo za Perezida Tshisekedi, akaba umuntu wa hafi wa Vital Kamerhe wahoze ayobora ibiro by’umukuru w’igihugu.

Kahasha we yaje kurekurwa ndetse ajyana mu rugendo na Tshisekedi. No mu mpinduka zakozwe, yagumye mu mwanya we.

Icyo kinyamakuru cyatangaje ko ajya kugenda, “perezida yategetse irekurwa rya Fortunat Biselele, asaba gukorerwa raporo yihuse kugira ngo hafatwe icyemezo ku bigomba gukurikira kuri icyo kibazo."

Ntabwo ANR yatangaje impamvu y’iryo fatwa, ariko umwe mu batanze amakuru yavuze ko abayobozi bashakaga kumenya ibijyanye n’ibiheruka gutangazwa n’umunyamakuru Alain Foka ku mubano wa RDC n’u Rwanda.

Ni mu kiganiro yasohoye ku wa 6 Mutarama, yise La Chronique : Qui pour sauver la RDC? Kiba kigaruka ku buryo u Rwanda rwakomeje kuvogera icyo gihugu rushakamo amabuye y’agaciro, amahanga agaceceka.

Uwatanze amakuru yagize ati "Icyo kiganiro cyasabwe na Biselele na Kahasha, bityo ANR yashakaga kumenya icyo bagambiriye."

Muri icyo kiganiro, yagarutse ku masezerano yanozwaga hagati y’u Rwanda na RDC.

Avugamo ati "Perezida Felix yahaye mugenzi we ikintu kimwe cyoroshye: Turi igihugu gikize, muri abaturanyi bacu, nta ntambara izimura imipaka, tuzakomeza duturane ubuziraherezo. Reka dukorane imishinga ibyara inyungu ku mpande zombi."

"Mfite ibirombe mukeneye, mwe mufite ubushobozi bwo kwegera abashoramari hirya no hino ku Isi, twakorana tugateza imbere aka gace dufatanyije’. Yarabimubwiye, njye ubwanjye nagiye i Kigali inshuro zitandukanye noherejwe na Perezida Tshisekedi mfite ubwo butumwa. Perezida Kagame yari abishyigikiye, hari intambwe twari tumaze gutera, kugeza ubwo hajemo izindi nyungu zihishe zatumye ibintu bigera aho biri uyu munsi."

Mu bandi bakuwe mu myanya, harimo Taupin Kabongo wari umunyamabanga wihariye wa Tshisekedi, wasimbujwe Mwamba Tshitambila Boli.

Tshisekedi yanashyizeho intumwa yihariye ishinzwe gukurikirana gahunda zigamije amahoro za Luanda na Nairobi, Tshibangu Serge Kabeya. Ni na we usanzwe akora izi nshingano, kuko yahagarariye Leta mu biganiro bagiranye n’imitwe yitwaje intwaro biheruka kubera muri Kenya.

Mu bihe bitandukanye mu minsi ishize, Tshisekedi yahinduye kenshi abayobozi barimo n’abo mu nzego za gisirikare, bashinjwa kwitwara nabi mu bibazo by’u Rwanda na RDC, ibihugu bitarebana neza muri iki gihe.

U Rwanda rushinja RDC gukorana na FDLR yashinzwe n’abagize uruhare muri Jenoside yakorewe Abatutsi mu 1994, ndetse mu bihe bitandukanye, icyo gihugu cyakomeje ubushotoranyi, burimo aho mu mwaka ushize ingabo zacyo zarashe mu Rwanda, ndetse indege yacyo y’intambara ivogera ikirere cy’u Rwanda.

Ni mu gihe na RDC irushinja gutera inkunga umutwe wa M23 rugamije kugera ku mabuye y’agaciro, ibintu ruhakana rwivuye inyuma.

Muri ibyo birego, hari abayobozi bamwe bo muri RDC bakomeje gukurikiranwaho gukorana n’u Rwanda, barimo General Philémon Yav, uheruka gufungwa ashinjwa kugirana umubano na Leta y’amahanga.

Ashinjwa ko yagiranye ibiganiro n’abasirikare bo mu kindi gihugu, ngo abe yafasha umutwe wa M23 kwinjira mu mujyi wa Goma.

Undi uheruka gufungwa ni François Beya wahoze ari umujyanama mu by’umutekano wa Perezida Félix Tshisekedi, wafashwe akekwaho umugambi wo kumuhirika ku butegetsi.

Mu bandi baheruka gufungwa kandi harimo Jean-Marc Kabund wahoze ari Umudepite n’umunyamabanga mukuru w’ishyaka UDPS rya Perezida Tshisekedi, ubu ni umwe mu batavuga rumwe n’ubutegetsi bwe.

Ibyo byose bigashimangira urwikekwe ruri mu biro bya mbere i Kinshasa, bijyanye n’ibibazo by’umutekano muke igihugu kirimo muri iki gihe.

Fortunat Biselele wari umujyanama bwite wa Tshisekedi yirukanywe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .