00:00:00 IGIHE NETWORK KN KINYARWANDA EN ENGLISH FR FRANCAIS

Umweyo uravuza ubuhuha muri Perezidansi ya Congo: Tshisekedi akomeje kwikiza bamwe

Yanditswe na Musangwa Arthur
Kuya 24 Mutarama 2023 saa 03:19
Yasuwe :

Umwuka umaze igihe utameze neza mu biro bya Perezida Tshisekedi ukomeje gushyira ku ruhande benshi mu byegera bye barimo abajyanama , abaminisitiri ndetse n’abo mu nzego z’umutekano, aho bamwe batawe muri yombi abandi bakaba bakomeje gukorwaho amaperereza adashira.

Inkundura yo kwikiza bamwe mu byegera bye, Tshisekedi yayitangirije byeruye ku wari umujyanama we mu by’umutekano, François Beya watawe muri yombi mu ntangiriro z’umwaka ushize ashinjwa umugambi wo guhirika Perezida.

Mu mpera z’umwaka ushize, Didier Baitopala wari Umuhuzabikorwa w’ibijyanye n’umutekano mu biro bya Perezida na Freddy Kangudia wari ushinzwe Protocole muri Perezidansi, batawe muri yombi bashinjwa guhungabanya ubusugire bw’igihugu.

Bivugwa ko abo bagabo bashinjwa umubano n’u Rwanda mu gihe Congo irushinja gufasha umutwe wa M23, ibintu rwo ruhakana.

Nta minsi irashira kandi Fortunat Biselele wahoze ari Umujyanama wihariye wa Perezida Tshisekedi, afungiwe muri Gereza ya Makala nyuma y’iminsi atawe muri yombi n’Urwego rw’Igihugu rw’Iperereza. Ntabwo ibyaha akekwaho biratangazwa, gusa amakuru avugwa ko ari iby’ubutasi no gukorana n’umwanzi.

Ni gahunda imaze igihe kirekire kandi imaze gukura benshi mu mababa ya Tshisekedi.

Mu mpera za 2021, Jeune Afrique yatangaje ko abarimo Corneille Nangaa wahoze ayobora Komisiyo y’amatora, bamwe mu bajyanama n’abaminisitiri ba Tshisekedi, bari bahanganye n’ibikorwa by’amaperereza mu mushinga w’ubucukuzi bw’amabuye y’agaciro.

Icyagarutsweho kuri Corneille Nangaa na bagenzi be, ni ikirombe cy’amabuye y’agaciro cya Zani Kodo, giherereye mu ntara ya Ituri cy’ikigo cy’ubucukuzi bw’amabuye y’agaciro cya Kilo-Moto (Sokimo). Iki kigo Leta ifitemo imigabane 30% mu gihe abikorera bafitemo 70%.

Mu 2017, Kodo Ressources ni yo yari ifite uruhushya rwo gucukura ikirombe cya Zani Kodo. Sosiyete yigenga Sokimo yari ifitemo imigabane mike imyinshi ikagirwa n’abikorera. Muri abo, harimo Pianeta Mining, umuyobozi wayo wungirije akaba Dede Muna, wari uhagarariye Corneille Nangaa na Minisitiri ushinzwe ubushakashatsi, José Mpanda.

Pianeta yashatse kugurisha imigabane yayo. Sosiyete yitwa Amarik, yeregereye Tete Kabwa Kabwe, wari umujyanama ukomeye wa Perezida Tshisekedi, wapfuye muri Kamena umwaka ushize.

Hari abandi bantu bagize uruhare muri ubu bucuruzi nka Guy Loando, uyu ni Minisitiri muri guverinoma ya Congo ushinzwe igenamigambi ry’akarere na Fortunat Biselele, wari umujyanama wihariye wa Félix Tshisekedi.

Intego yari ukoroshya kuvana abanyamigabane muri Pianeta ndetse no kubona uruhushya rwo gucukura amabuye y’agaciro.

Itsinda ry’abashoramari baturuka muri Leta zunze Ubumwe z’Abarabu, ryaje kwifuza gushora imari muri RDC, uruhushya rwo gucukura rurabura kandi Tshisekedi yaramenyeshejwe ko abari bafite imigabane bakuwemo neza.

Perezida Tshisekedi yasabye ko hashyirwa umucyo kuri iki kibazo. Muri Perezidansi, iyi dosiye yahawe umujyanama wihariye mu by’umutekano, François Beya. Ibi ni byo byatumye hatangira amaperereza mu kumenya niba gukuramo abanyamigabane ba Pianeta, byaragenze uko byari biteganyijwe.

Amaperereza yatangije kuwa 12 Ugushyingo 2021. Ba Minisitiri José Mpanda na Guy Loando hamwe na Corneille Nangaa bahatwa ibibazo.

Mu gihe kuwa 17 Ugushyingo 2021 hari hateganyijwe kumva Corneille Nangaa na Fortunat Biselele, ariko Biselele ntiyitaba kuko yari mu ruzinduko I Kigali yoherejwe na Perezida Tshisekedi wahise ategeka ko agaruka vuba na bwangu.

Iki kibazo cyatumye haba impinduka nyinshi mu byegera bya Perezida Tshisekedi nka François Beya na Fortunat Biselele, bituma havuka umwuka mubi hagati yabo.

Kuki Tshisekedi akomeje kwikiza ibyegera bye?

Kuba Tshisekedi akomeje gushyira ku ruhande bamwe mu bari ibyegera bye, bihuzwa no gushaka urwitwazo rwo kudashyira mu bikorwa ibyo yemereye abaturage nk’umutekano, iterambere n’ibindi.

Umusesenguzi mu bya politiki, amategeko akaba n’umunyamakuru, Gatabazi Tite, asobanura ko ari amayeri Tshisekedi akomeje gukoresha mu gihe amatora yegereje.

Ati “Ubwo amatora yegereje, Tshisekedi arashaka ibitambo by’amafuti, imikorere mbi ya guverinoma ye akabyegeka kuri ibyo bitambo agamije kwerekana ko we ashaka gukorera mu mucyo kandi abanyamanyanga abakurikirana akabafunga”.

Ruswa n’amanyanga mu butegetsi bwa Congo, ni umwera uturuka ibukuru. Vidiye Tshimanga wari umujyanama we yagaragaye abwira abashoramari ngo nibajye gushora imari mu gihugu ariko hari 20% y’amafaranga yo gushoramo imari ya Perezida Tshisekedi azajyana mu birwa bya Maurice kuri konti baziranyeho.

Gatabazi ati “[Tshisekedi] mbere yo gutokora abandi nabanze yitokore kuko atigeze anyomoza ko hari amafaranga bamushyirira mu birwa bya Maurice”.

Akomeza vuga ko biteye isoni kubona abayobozi bakuru muri RDC bajya gucukura amabuye y’agaciro ahantu nka Ituri hirirwa hicwa abaturage bikozwe n’imitwe yitwaje intwaro.

Ati “Ntibyumvikana ukuntu Minisitiri cyangwa umujyanama wa Perezida yajya gukorera muri Ituri ahantu imitwe yitwaje intwaro yamaze abantu, ariko bo bakahakorera mu mudendezo, imodoka zabo zigapakira amabuye zikagenda zifite umutekano”.

Ibi bishimangira ko hari abategetsi ba Congo bafite imibanire myiza n’imitwe yitwaje intwaro. Iyi ikaba impamvu ikomeye y’uko amahoro yaboneka mu gihe abayobozi bafite inyungu zabo zibangamiye iz’abaturage na leta.

Perezida Tshisekedi akomeje kwigizayo bamwe mu bari ibyegera bye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .