Umunya-Cameroun akomeje gusenya ibiranga amateka y’ubukoloni

Yanditswe na Twarabanye Venuste
Kuya 1 Nyakanga 2020 saa 02:20
Yasuwe :
0 0

Umunya-Cameroun, ufatwa nk’impirimbanyi mu guharanira impinduka, André Blaise Essama akomeje urugamba amazemo imyaka igera ku 10 asenya ibimenyetso biranga amateka y’igihe cy’Ubukoloni.

André Blaise Essama yatangiye kwangiza ibikorwa bigaragaza amateka y’Ubukoloni mu gihugu cye mbere y’uko ibyo bikorwa bikwira mu bihugu bitandukanye kubera urupfu ry’Umwirabura w’Umunyamerika George Floyd.

Azwi cyane mu gusenya ikibumbano cyo muri Douala, kigaragaza Jenerali Philippe Leclerc ufatwa nk’umucunguzi w’Abafaransa mu ntambara ya kabiri y’isi yose, aho yagiciye umutwe ariko kikongera gusanwa.

Uyu mugabo yabwiye BBC ko amaze kugica umutwe inshuro zirindwi. Yagize ati “Maze guca umutwe wa Leclerc incuro zirindwi kandi nagihiritse inshuro 20 [...] Nkoresha amaboko yanjye kandi mbanza kwambaza abakurambere.”

Intego ye ni uko ibyo birangamateka byasimbuzwa intwari za Cameroun n’izindi ntwari za Afurika.

Mu byo yifuza ko byubakwa harimo icya Diana, igikomangoma cy’u Bwongereza, kuko ngo yarwanyaga ivangura rishingiye ku ruhu kandi agashyigikira ikiremwamuntu.

Ati “Diana yarwanyije cyane ivangura rishingiye ku ruhu kandi yaharaniraga uburenganzira bwa muntu. turamukunda cyane hano muri Cameroun.”

Mu bindi biranga amateka y’abakoloni yibasira ni ikibumbano cya Gustav Nachtigal, wageze muri Cameroun mu 1884 agiye gushinga ubwami bw’u Budage muri icyo gihugu.

Mu Ntambara ya Mbere y’Isi Yose, nibwo ingabo z’Abongereza n’iz’Abafaransa zirukanye u Budage, ibihugu byombi bibona kugabana Cameroun.

Mu gihe cyose agerageje kubisenya, ubuyobozi bubisubizaho buvuga ko, Intwari za Afurika zishobora guhabwa icyubahiro atabanje gusenya iby’Abakoloni.

Essama w’imyaka 44 y’amavuko yafunzwe inshuro nyinshi aho yahabwaga igifungo cy’amezi atandatu azira guca unutwe w’ikibumbano cya Gen. Leclerc. Cyakora rimwe na rimwe hari ubwo atafungwaga akishyura ihazabu ikusanyijwe n’abamushyigikiye bari hanze n’imbere mu gihugu.

Ikibumbano cya Gen. Leclerc i Douala cyubatswe n’Abakoloni b’Abafaransa mu 1948 mbere yuko Cameroun ibona ubwigenge mu 1961.

André Blaise Essama ubu ntagishishishikajwe no guca imitwe y’ibyo bibumbano, ahubwo binyuze mu muryango yashinze, Essama Hoo Haa , ari gushaka uburyo aho byubatse hubakwa iby’abanya-Cameroun ndetse agasaba ko n’ibihugu byakolonije igihugu cye bitanga indishyi.

Blaise Essama aha yari afashe umutwe yaciye ku kibumbano cya Jenerali Philippe Leclerc ufatwa nk'ikigirwamana mu Bufaransa
Essama yishimira ko hubakwa ibibumbano iby'abanya Cameroun aho gushyirwaho iby'abanyamahanga
Ikibumbano cy'Umufaransa Jenerali Philippe Leclerc, Essama amaze kugica umutwe inshuro zirindwi no kugihirika inshuro 20

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .