Uganda yanyomoje ko ibicuruzwa biturukayo byakumiriwe mu Rwanda

Yanditswe na Evariste Nsengimana
Kuya 18 Gashyantare 2019 saa 05:36
Yasuwe :
0 0

Guverinoma ya Uganda yakuyeho urujijo ku gihuha cyakwirakwije cy’uko Leta y’u Rwanda, yakumiriye ibicuruzwa byinjira ku butaka bwayo bivuye muri icyo gihugu.

Umuyobozi wungirije Ambasaderi wa Uganda mu Rwanda, Anne Katusiime, kuri iki cyumweru nibwo yanyomoje amakuru yakwirakwije mu itangazamakuru avuga ko sima iva Uganda yabujijwe kwinjira mu Rwanda.

Ati “Kuri Ambasade ntabwo twamenyeshejwe mu buryo bwemewe ko u Rwanda rwakumiriye ibicuruzwa bituruka Uganda. Ibyatangajwe n’ibinyamakuru ni ibihuha biri gukwirakwizwa bidafite ishingiro.”

Rwanda Today yanditse ko ‘umuyobozi w’abagenzura ibicuruzwa ku mupaka wa Gatuna, ibihugu byombi bihuriyeho, Sam Sserwanga, yasobanuye ko imirimo y’ubucuruzi ikomeje uretse ibihuha byakwirakwije’.

Ati “Mu ijoro ryo ku wa Gatanu numvise ko hafi toni 32 za sima ya Tororo yavaga Uganda ijya mu Rwanda yasubijwe inyuma n’ubuyobozi bw’u Rwanda, ariko ibyo nta ngaruka byagize ku bindi bicuruzwa byinjirayo bivuye Uganda.”

Yakomeje agira ati “Nakiriye n’andi makuru avuga icyo kibazo cyakemuwe ku bufatanye bw’abashora ibintu mu mahanga n’abayobozi mu Rwanda kandi ku wa gatandatu ikamyo zose zari zipakiye sima zamenyekanishije kuri gasutamo, ubu ubucuruzi burakorwa nk’uko bisanzwe.”

Abajijwe impamvu hari ikamyo nyinshi zipakiye sima zari ziparitse ku ruhande rwa Uganda mu gitondo cyo kuri iki cyumweru, yasubije ko abashoferi bahitamo aho baparika mu gihe bari kuzuza ibisabwa ku mupaka.

Ngo guparika ku ruhande rwa Uganda byatewe n’uko ku ruhande rw’u Rwanda nta mwanya mugari uhari kuko hari kubakwa ibiro by’abinjira n’abasohoka bihuriweho.

Uganda yemeje ko nta bicuruzwa byayo byakumiriwe mu Rwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza