00:00:00 IGIHE NETWORK KN KINYARWANDA EN ENGLISH FR FRANCAIS

Uganda na RDC byongereye igihe cyo kurwanya inyeshyamba za ADF

Yanditswe na Bukuru JC
Kuya 24 Nzeri 2022 saa 04:13
Yasuwe :

Repubulika Iharanira Demokarasi ya Congo na Uganda byashyize umukono ku masezerano yo kongerera igihe ibikorwa bya gisirikare impande zombi zihuriyeho mu Burasirazuba bwa Congo.

Itangazo ry’igisirikare cya Uganda rivuga ko ayo masezerano yashyizweho umukono ku wa Kane tariki 22 Nzeri 2022 na ba minisitiri b’ingabo ku mpande zombi, igikorwa cyabereye i Kinshasa nk’uko The Eastafrican dukesha iyi nkuru yabitangaje.

Iryo tangazo rigira riti “Uganda na Repubulika ya Demokarasi ya Congo byongereye igihe cy’ibikorwa bihuriweho bya gisirikare mu burasirazuba bwa RDC nyuma y’inama y’abaminisitiri b’ingabo yabereye i Kinshasa. Ba minisitiri banemeje gahunda y’uburyo inyeshyamba za ADF zizajya zifatwa mpiri cyangwa zikarambika intwaro hasi zizajya zifatwa.”

Umuvugizi wungirije w’ingabo za Uganda, Col Deo Akiiki, yavuze ko ibikorwa by’inyongera bizamara amezi abiri nk’uko byagenze bwa mbere.

Ati “Ibikorwa bihuriweho byongera gusuzumwa nyuma y’amezi abiri n’abahagarariye ingabo bagatanga imyanzuro n’ibyifuzo kuri ba minisitiri b’ingabo.”

Itangazo rikomeza rivuga ko ba minisitiri basuzumye imiterere y’ikibazo cy’umutekano mu Burasirazuba bwa RDC nyuma y’inama y’abakuru b’ingabo yabereye i Kampala.

Akanama ka tekiniki ka Uganda kari kayobowe na Maj Gen Dick Prit Olum mu gihe RDC yari ihagarariwe na Gen Célestin Mbala.

Mu Ugushyingo umwaka ushize, ingabo za Uganda n’iza RDC ni bwo zatangiye ibikorwa byo kurwanya inyeshyamba za ADF.

Uganda yasabye RDC uburenganzira bwo gukurikirana izo nyeshyamba ku butaka bwayo izishinja kwenyegeza ibitero by’ubwicanyi byahitanye abayobozi bakuru b’igihugu, ibitero by’iterabwoba no kwinjiza abaturage ba Uganda muri uwo mutwe.

ADF yabaye umutwe urwanya ubutegetsi bwa Uganda ku mu myaka ya 1990 ariko kuri ubu ifitanye imikoranire na Islamic State yo muri Syria na Iraq (ISIS).

Ishami ry’Umuryango w’Abibumbye ritangaza ko ADF yishe abagera kuri 200 no gutuma abagera ku bihumbi 40 bava mu byabo muri RDC kubera ibitero 155 yagabye mu mwaka wa 2020 gusa.

Ubufatanye bw’ingabo za Uganda na RDC bugeze mu cyiciro cya gatatu kizibanda ku guhiga abarwanyi bahunze ubwo zasenyaga ibirindiro byazo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .