Ubwo yagiranaga ikiganiro n’abanyamakuru kuri i Nalufenya mu Mujyi wa Jinja, umukuru wa Polisi ya Uganda, Gen. Kale Kayihura yatangaje ko hakozwe umukwabo, mu nzu y’uwo mugabo hakavumburwa amatoni y’ibisasu bituritswa.

Kayihura yagize ati:”Twamenyeshejwe ko hari amatoni y’ibisasu yatahuwe iwe, kandi yari hafi kuzanwa muri Uganda”.

Gen Kayihura ariko ntiyatangaje ubwoko bw’ibisasu bwabonetse kwa Matovu nk’uko New Vision dukesha iyi nkuru ibitangaza.

Uyu mukuru w’inyeshyamba zirwanya ubutegetsi muri Uganda yoherejwe muri Uganda mu cyumweru gishize aho yazanye na Umar Abdalla Mutuka, bivugwa ko bombi bari bafatanyije na Jamil Mukulu mu bikorwa byo guhungabanya umutekano, kurema umutwe w’iterabwoba n’ibyaha by’ubwicanyi.

Gen. Kayihura agaragaza uyu mugabo nk’umuntu wari ubangamiye umutekano w’igihugu, kuko yafashwe inshuro enye zose ndetse afungirwa muri gereza nkuru ya Luzira, ariko arayitoroka.

Muri 2005 yafatiwe ahitwa Kasese, muri 2012 aza kugaragara i Nairobi, muri 2014 yari mu bikorwa byo kwinjiza abarwanyi muri ADF, akaba yaratawe muri yombi mu kwa gatatu uyu mwaka muri Tanzania ku myaka 45 y’amavuko.