Tanzania: Umucukuzi yongeye kuvumbura ibuye ry’agaciro ribarirwa miliyoni ebyiri z’amadolari

Yanditswe na Ndahayo Emmanuel
Kuya 4 Kanama 2020 saa 01:25
Yasuwe :
0 0

Umugabo wo muri Tanzania umaze kumenyekana cyane ku bwo gukizwa n’amabuye y’agaciro acukura, Saniniu Laizer, yongeye kugira amahirwe, avumbura ibuye rifite agaciro ka miliyoni $2, nyuma y’aho n’ubundi yari asanganywe agera kuri miliyoni $3.4 yari yarabonye muri Kamena uyu mwaka ayavanye mu bucukuzi nk’ubwo; ubu mu mezi atarenze abiri atunze asaga miliyari 5 Frw.

Uyu mugabo aherutse kugurisha amabuye abiri yo mu bwoko bwa Tanzanite, apima ibiro 9,2 na 5,8. Tanzanite ni ubwoko bw’amabuye y’agaciro asigaye hacye cyane ku Isi, aho bivugwa ko ikirombe cya Merelani giherereye mu gace ka Manyara, ari cyo cyonyine gisigaye ku Isi gicukurwamo ubu bwoko bw’amabuye.

Abahanga mu by’ubucukuzi bavuga mu myaka 20 iri imbere, aya mabuye yose azashira ku Isi. Tanzanite ikoreshwa ibintu bitandukanye birimo imitako.

N’ubwo yashira ariko, Saniniu Laizer, umugabo utunze abana 30, azaba yaramaze gukuramo aye, kuko aherutse kongera gusekerwa n’amahirwe, akavumbura ibuye ripima ibiro 6.3.

Laizer asanzwe afite uburenganzira bwo gucukura ubu bwoko bw’amabuye, mu kirombe kirindwa cyane, dore ko cyazitijwe urukuta rw’ibirometero 24 n’igisirikari cya Tanzania, bitegetswe na Perezida w’icyo gihugu, John Pombe Magufuli.

Nyuma yo guhirwa n’ubu bucukuzi bwe, Laizer yavuze ko agiye gukoresha uyu mutungo mu kubaka ishuri n’ivuriro mu karere k’iwabo ka Simanjira, gaherereye mu gice cya Manyara.

Yagiriye abacukuzi bagenzi be inama, abasaba ‘gukorana ubucuruzi na Leta kuko ikorera mu mucyo’.

Laizer kandi yabwiye BBC ko adateganya guhindura imiterere y’ubuzima abayemo, ko azakomeza gutura mu gace atuyemo no korora inka zirenga 2000 atunze.

Saniniu Laizer akomeje guhirwa n'amabuye y'agaciro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .