Sudani: Omar Bashir yagejejwe imbere y’urukiko ashinjwa ruswa

Yanditswe na Sekamana Mathias
Kuya 19 Kanama 2019 saa 04:14
Yasuwe :
0 0

Kuri uyu wa mbere tariki 19 Kanama, Omar al Bashir wayoboye Sudani imyaka 30 yagejejwe imbere y’urukiko rwa Khartoum ngo yisobanure ku byaha bya ruswa.

Bashir yahiritswe ku butegetsi n’igisirikare kuwa 11 Mata uyu mwaka nyuma y’imyigaragambyo yari imaze igihe muri iki gihugu.

Yagejejwe ku rukiko kuri uyu wa Mbere aherekejwe n’imodoka za gisirikare.

Uyu mugabo w’imyaka 75, agejejwe mu rukiko yabwiwe ko ashinjwa ruswa, gutunga amafaranga y’amanyamahanga atazwi aho yavuye, gutera inkunga imitwe y’iterabwoba ,kwakira impano zitemewe n’amategeko no gutegeka kwica abigaragambya.

Abigaragambya n’abaharanira uburenganzira bw’ikiremwa muntu muri Sudani bo basaba ko Bashir yaryozwa abapfuye bazira guharanira uburenganzira bwa muntu mu myaka 30 y’ubutegetsi bwe n’abapfiriye mu myigaragambyo yatumye ahirikwa ku butegetsi ikaba igikomeje.

Uru rubanza rutangiye mu gihe igisirikare kiyoboye igihugu n’abigaragambya batangiye gushyira mu bikorwa umugambi bumvikanye ho wo gutegura uko hajya ho ubutegetsi bw’abasivile.

Imyigaragambyo yakuye ho Bashir yatangiye abantu bigaragambiriza izamuka ry’ibiciro by’ibiribwa ,nyuma biza kwaguka batangira no gusaba impinduka mu buyobozi bw’igihugu, kurangira kw’imyaka yo kubaho batishimye na ruswa yayogoje igihugu.

Bashir kandi ashakishwa n’urukiko mpanabyaha mpuzamahanga kubera ubwicanyi bwakorewe muri Darfur bamwe badatinya no kuvuga ko ari Jenoside.

Al-Bashir yavutse mu 1944, avukira ahitwa Hosh Wad Banaqa mu majyaruguru ya Sudani mu muryango w’abahinzi.

Yarangije amashuri yisumbuye mu murwa mukuru Khartoum, ahita ajya mu ishuri rya gisirikare mu Misiri mu 1960.

Mu 1973 Bashir yari umwe mu ngabo za Sudani zoherejwe mu Misiri kurwana mu ntambara y’Abarabu na Isiraheli.

Mu 1975 yagizwe impuguke mu bya gisirikare muri ambasade ya Sudani muri Leta Zunze Ubumwe z’abarabu.

Agarutse mu gihugu yagizwe umwe mu bayobozi b’ingabo, naho mu 1981 agirwa umuyobozi wa burigade y’ingabo zimanuka mu mitaka.

Mu 1989, Bashir yari afite ipeti rya koloneli, biza no kumufasha guhirika ku butegetsi bwa Sadiq al-Mahdi wari Minisitiri w’intebe muri guverinoma yaratowe n’abaturage.

Bashir yagejejwe ku rukiko kuri uyu wa Mbere aherekejwe n’imodoka za gisirikare.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza