Sudan: Hatowe itegeko rishyira ubutegetsi bwa Bashir n’ishyaka rye ku iherezo

Yanditswe na Ndayikunda Josué
Kuya 29 Ugushyingo 2019 saa 12:07
Yasuwe :
0 0

Ubuyobozi bw’inzibashyuho muri Sudan bwatoye itegeko rishyira ku iherezo ubuyobozi bw’uwahoze ari Perezida w’iki gihugu, Omar el-Bashir, ndetse n’imitungo y’ishyaka rye, National Congress Party (NCP) igafatirwa.

Iri tegeko ryatowe ejo hashize tariki ya 28 Ugushyingo 2019, nyuma y’inama yamaze igihe kirekire ihuje ubuyobozi bw’inzibacyuho muri Sudan n’abandi bari muri guverinoma.

Iri tegeko rije kandi nyuma y’igihe kitari gito abanya-Sudan bagaragaza ko bahaze ubutegetsi bwa Bashir byaje no kurangira avanwe ku butegetsi muri Mata 2019.

Minisitiri w’Intebe muri Sudan, Abdalla Hamdok, yanyuze ku rukuta rwe rwa Twitter avuga ko gushyiraho iri tegeko bitari mu rwego rwo kwihimura ku butegetsi bwa Bashir, ahubwo ari mu nzira zo gusubiza ikuzo abanya-Sudan.

Yagize ati “Twashyizeho iri tegeko mu nama yari ihuje abantu benshi kugira ngo tugarure ubutabera n’ikuzo ry’abaturage, turinda ibyabo kugira ngo ubutunzi bwabo bwanyazwe bongere babwisubize.”

Aljazeera ivuga ko abatangije imyigaragambyo yo kwamagana Bashir n’ubutegetsi bwe bakirije iri tegeko amaboko yombi, bavuga ko ari intambwe nziza yo kugira leta irangwamo demokarasi.

Ibindi bikubiye muri iri tegeko kandi ni uko abari mu ishyaka rya Bashir babujijwe kongera kugira umwanya uwo ariwo wose bakwiyamamariza mu gihe cy’imyaka icumi iri imbere.

Muri iyi nama hanakuweho itegeko ryabangamiraga abagore muri Sudan rikabategeka ibyo bambara n’ibyo batambara.

Ishyaka rya Bashir ryamaganye ibyemezo ryafatiwe rivuga ko bigamije ngo Leta ikoreshe imitungo yaryo mu kuzahura ubukungu bwaguye none ikaba yarananiwe kubusubiza ku murongo.

Omar Bashir ubu uri mu buroko kubera ibyaha bya ruswa ashinjwa, yagiye ku butegetsi mu 1989, ayobora Sudan imyaka 30. Mu Ukuboza 2018 nibwo hadutse imyigaragambyo yamagana ubutegetsi bwe biza no kurangira muri Mata 2019 avanwe ku butegetsi n’igisirikare.

Abaturage bishimiye ko ishyaka rya Bashir n'amategeko yashyizeho bivanwaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .