Somalia: Abadepite beguje Minisitiri w’Intebe bamushinja ubushobozi buke

Yanditswe na Twarabanye Venuste
Kuya 26 Nyakanga 2020 saa 09:27
Yasuwe :
0 0

Inteko Ishinga Amategeko ya Somaliaa yatakarije icyizere Minisitiri w’Intebe, Hassan Khaire, imushinja ubushobozi buke harimo; kunanirwa gushyiraho urwego rw’umutekano rukomeye, no gutegura amatora y’umukuru w’igihugu ateganyijwe mu mwaka utaha.

Kweguza Minisitiri w’intebe Hassan Khaire byanyuze mu matora yo ‘kumukuraho icyizere’ hemezwa ko atagishoboye kuyobora Guverinoma. Abadepite 170 mu 178 bemeje ko avanwa ku mirimo ye.

Aljazeera yanditse ko nyuma y’Inama yo kumweguza, Perezida w’Inteko Ishinga Amategeko, Mursal Abdulrahman, yatangaje ko basaba umukuru w’igihugu gushyiraho Minisitiri mushya kuko undi hari byinshi byamunaniye.

Ibyo bivuze ko Perezida Mohamed Abdullahi Mohamed agomba kwirukana Khaire watangiye imirimo nka Minisitiri w’Intebe muri Werurwe 2017. Ni we wari umaze igihe kirekire ku mwanya wa Minisitiri w’Intebe muri Somalia.

Perezida w’inteko ishinga amategeko yavuze kandi ko uku kweguzwa kwaturutse ku kuba Guverinoma yarananiwe gutegura amatora y’umukuru w’igihugu ateganyijwe mu mu 2021 no gushyiraho urwego rw’ubuyobozi bw’umujyi wa Mogadishu.

Mu itangazo ryanyujijwe kuri Radiyo y’Igihugu, Perezida Mohamed Abdullahi Mohamed yashimye Khaire ku kazi yakoreye igihugu avuga ko yemeye icyemezo cy’Inteko Ishinga Amategeko kandi ko arashyiraho Minisitiri mushya.

Hassan Khaire yegujwe nyuma yo gutererwa icyizere n'abadepite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .