00:00:00 IGIHE NETWORK KN KINYARWANDA EN ENGLISH FR FRANCAIS

RDC yemejwe bidasubirwaho nk’umunyamuryango wa karindwi wa EAC

Yanditswe na Bukuru JC
Kuya 11 July 2022 saa 03:29
Yasuwe :

Repubulika Iharanira Demokarasi ya Congo yamaze kwinjizwa mu Muryango w’Ibihugu byo muri Afurika y’Iburasirazuba mu buryo budasubirwaho, nyuma yo kuzuza ibyasabwaga byose no gushyikiriza ubunyamabanga bw’uyu muryango inyandiko zari zikenewe.

Kuwa 29 Werurwe 2022 nibwo abakuru b’ibihugu bigize EAC bemeje ko RDC yujuje ibisabwa byose byayemerera kwinjira muri uyu muryango.

Iki cyemezo cyafashwe nyuma yo gusesengura inyandiko z’Abaminisitiri bashinzwe uyu muryango, ku busabe bwa RDC.

Nyuma y’iminsi mike iki gikorwa kibaye, kuwa 8 Mata 2022 aba bakuru b’ibihugu bongeye guhurira i Nairobi muri Kenya, aho Perezida wa RDC Félix-Antoine Tshisekedi Tshilombo yashyize umukono ku masezerano yinjiza igihugu cye muri EAC.

Kuva icyo gihe, RDC yahise ihabwa kugeza ku wa 29 Nzeri 2022 nk’igihe ntarengwa kugira ngo ibe yamaze gushyira umukono ku nyandiko za nyuma zijyanye n’amategeko n’amabwiriza ziyemerera kwinjira burundu muri uyu muryango no kuzishyikiriza ubunyamabanga bwawo.

Nicyo gikorwa yakoze kuri uyu wa Mbere tariki 11 Nyakanga 2022.

RDC yinjiye muri EAC nk’igihugu kinyamuryango cya karindwi, nyuma ya Uganda, Kenya, Tanzania, u Rwanda, u Burundi na Sudani y’Epfo.

Ku wa 8 Kamena 2019 nibwo Perezida wa RDC, Félix Antoine Tshisekedi Tshilombo yandikiye Perezida Paul Kagame wari uyoboye EAC, amubwira igihugu cye gifite ubushake bwo kwinjira muri uyu muryango usanzwe ubarizwamo ibihugu bitandatu.

Nyuma y’iminsi mike u Rwanda rwashyikirije Ubunyamabanga Bukuru bw’uyu muryango ubusabe bw’iki gihugu.

Muri Werurwe 2022, Perezida Uhuru Kenyatta uyoboye EAC, yavuze ko kuba RDC yakwinjira muri uwo muryango bizagura umuryango ku buryo bufatika mu ngeri zitandukanye zibyara inyungu ku mpande zose.

Ati "Iyi mibare irerekana ukwaguka kw’isoko ry’abakora ibicuruzwa mu muryango, umuryango uzakurura kandi abashoramari mu ngeri zinyuranye bizamure ubukire no guhanga imirimo y’abaturage. Umuryango kandi uzabasha guhuza imbaraga mu kubaka ibikorwa remezo bikenewe cyane cyane umuhanda unyura mu muhora uturuka mu Burengerazuba ujya mu Burasirazuba".

Umuryango w’Ibihugu bya Afurika y’Iburasirazuba washinzwe mu 1967 ugizwe n’ibihugu bitatu aribyo, Uganda, Kenya na Tanzania.

Mu mwaka wa 1970 wahagaritse imirimo yawo kubera igitugu cya Idi Amin, ubwo yari amaze gufata ubutegetsi muri Uganda. EAC yongeye gusubukura imirimo yawo mu myaka ya 1990 n’ibihugu byayitangije, nyuma hiyongeraho u Rwanda , u Burundi na Sudani y’Epfo.

RDC yinjiye muri EAC mu bihe bigoye, kuko ifitanye ibibazo na bamwe mu banyamuryango ishinja gutera inkunga umutekano muke mu burasirazuba bwayo.

Ishinja u Rwanda na Uganda gutera inkunga umutwe wa M23. U Rwanda rwo ruyishinja gukorana n’umutwe wa FDLR, washinzwe na bamwe mu bagize uruhare muri Jenoside yakorewe Abatutsi.

Umunyamabanga mukuru wa EAC, Dr Peter Mathuki, yakira inyandiko za RDC yashyikirijwe na Minisitiri w'Ububanyi n'amahanga wa RDC, Christophe Lutundula Apala
Abakuru b'ibihugu bya EAC ubwo bakiraga RDC ku wa 8 Mata 2022

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .