00:00:00 IGIHE NETWORK KN KINYARWANDA EN ENGLISH FR FRANCAIS

RDC yahinduye imvugo ku mishyikirano na M23

Yanditswe na Musangwa Arthur
Kuya 6 Ugushyingo 2022 saa 12:46
Yasuwe :

Umuvugizi wa Guverinoma ya Repubulika Iharanira Demokarasi ya Congo yatangaje ko kugira ngo bongere kugirana ibiganiro n’umutwe wa M23, ugomba kubanza gusubira inyuma ukavana ingabo mu duce uheruka kwambura ingabo za Leta.

Ni imvugo itandukanye n’iyari imaze iminsi, aho Guverinoma ya RDC yavugaga ko idashobora "kugirana imishyikirano n’umutwe w’iterabwoba."

RDC irimo kwitegura gusubukura ibiganiro bya Nairobi, bihuza guverinoma n’imitwe yitwaje intwaro. Ni ibiganiro biteganyijwe ku wa 16 Ugushyingo.

Ubwo byatangiraga, abari bahagarariye umutwe wa M23 basohotse igitaraganya ubwo intambara yuburaga hagati y’ingabo zayo ndetse n’iza Leta, kugeza magingo bakaba barakomeje kwitana ba mwana ku waba yarasembuye undi.

Guverinoma yaje kwerura ko ikuyeho uburyo bwose bwatuma ishyikirana na M23, ndetse itangira gukoresha imvugo ko ari umutwe w’iterabwoba.

Mu kwezi gushize, Minisitiri Muyaya yabwiye abanyamakuru ati "ku kibazo cya M23, umurongo wacu ntuhiduka: icyo kuganira n’umutwe w’iterabwoba cyo ntabwo kigibwaho impaka. Nta rujijo rukwiye kubaho. Kuri twe M23 ntabwo ibaho, iriho kubera ko u Rwada rushaka ko ibaho."

Nyamara kuri uyu wa Gatandatu, imvugo isa n’iyahindutse. Minisitiri Muyaya yagarukaga ku kuba M23 yasubira mu biganiro bihuza imitwe yitwaje intwaro yo muri RDC, bizasubukurwa mu minsi iri imbere.

Yagize ati "Igitekerezo gihari uyu munsi kigomba kumvikana neza. M23 igomba kuva mu bice byose yafashe, ndatekereza ko hari imbibi zagenwe, mbere y’uko yemerererwa gusubira muri iyi gahunda kimwe n’indi mitwe yose yitwaje intwaro."

"Kubera ko niba yarakuwe mu biganiro ni uko yahisemo gufata intwaro. Abayobozi bose b’akarere bemeje ko nta mutu ugomba gufata intwaro, bitabaye ibyo hakazakora imbaraga. Ni ibyo bigomba kubaho."

Mu gihe hakivugwa imishyikirano, mu kiganiro yagiranye n’abanyamakuru kuri uyu wa Gatandatu i Kinshasa, Umuvugizi wa FARDC, Gen Sylvain Ekenge, yabajijwe ku mpamvu abasirikare bemeye guhara ibice bya Kiwanja na Rutshuru bikajya mu maboko ya M23, yari imaze iminsi isaga 150 ifashe Bunagana.

Yavuze ko hafi teritwari ya Rutshuru yose imaze gufatwa.

Yakomeje ati "Kuva muri Kiwanja na Rutshuru ni uko tutashoboraga kurwanira ahantu hari abaturage, kubera ko inshingano yacu ya mbere ni ukurinda abaturage. Nta bisobanuro tugomba uwo ari we wese."

Yavuze ko inzego zitandukaye zifite inshingano zaco, haba inzego za politiki ndetse na dipolomasi, abasirikare nabo bakagira izabo.

Yakomeje ati "Nk’uko mubizi, igihugu cyacu, babivuga batabivuga, kiri mu bihano byo kutemererwa kugura intwaro, kandi muri icyo gihe byahaye intwaro umwanzi wacu."

Yavuze ko umutwe wa M23 mu 2012 wafashe Goma, nyuma y’umwaka umwe ngo uza kwirukanwa.

Icyo gihe ngo byasabye ko igisirikare cyisuganya, kigahindura amayeri kugira ngo kitarwana mu buryo bwatuma abantu bapfa bitari ngombwa.

Gen Ekenge yakomeje ati "Tuzakora ibishoboka byose ku buryo tubasha kwisubiza uduce tose uyu munsi twafashwe n’u Rwanda, kuko ubundi M23 ntabwo ifite umubare w’abasirikare cyangwa ubushobozi, abari hariya bose ni abasirikare b’u Rwanda n’ibikoresho byabo."

Yakomeje ati "Ndabizeza ko nta santimetero n’imwe y’igihugu cyacu izasigara munsi y’ibirenge bw’umwanzi."

Mu gihe RDC ikomeza gushinja u Rwanda kugira uruhare mu bibazo byo mu burasirazuba bwayo, rwo rushimangira ko ntaho ruhuriye nabyo, ahubwo guverinoma ikomeje kuyiobya uburari, yihunza ibibazo byayo ikabyegeka ku bandi.

Patrick Muyaya yahinduye imvugo ku mishyikirano na M23

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .