00:00:00 IGIHE NETWORK KN KINYARWANDA EN ENGLISH FR FRANCAIS

RDC: Iteshagaciro ry’igihano cya Vital Kamerhe ryateje impagarara

Yanditswe na Bukuru JC
Kuya 13 April 2022 saa 09:23
Yasuwe :

Abatavuga rumwe n’ubutegetsi muri Repubulika ya Demokarasi ya Congo, bamaganye icyemezo cyo gutesha agaciro igihano Vital kamerhe yakatiwe n’Urukiko rw’Ubujurire bavuga ko gishingiye kuri politiki kandi ko ari uburyo bwo kwenyegeza ruswa mu gihugu.

Ibi ni ibyatangajwe n’umwe mu bavugizi b’ihuriro ry’abatavuga rumwe n’ubutegetsi, LAMUKA, Prince Epenge, ku wa Kabiri, tariki 12 Mata, mu kiganiro yagiranye na Radio Okapi.

Vital Kamerhe wahoze ari umuyobozi w’ibiro bya Perezida Felix Tshisekedi azongera kuburanishwa bundi bushya n’urukiko rw’Ubujurire rwa Kinshasa-Gombe.

Ku wa 11 Mata, Urukiko Rusesa Imanza rwatesheje agaciro icyemezo cy’urukiko rw’Ubujurire gihanisha Vital Kamerhe imyaka 13 y’imirimo y’ingufu ruvuga ko hari amakosa yabaye mu rubanza rwe.

Prince Epenge yamaganye uyu mwanzuro avuga ko ubutabera butakoze neza akazi kwabwo ndetse ko iyi ari intambwe ya mbere iganisha ku kugira umwere Kamerhe.

Ati “Icyo tuvuga ni uko ari ikinamico iri gukinwa. Muri RDC kurekurwa by’agateganyo bingana no kurekurwa burundu. Niba bavuga ko igihano cya Kamerhe cyakuweho, ibyo birumvikana ko byarangiye.”

Yakomeje ati “Perezida wa Repubulika yari yijeje abaturage ko leta izimakaza ubutabera ariko ikigaragara ni uko ibikorwa ari ikinyuranyo.”

Ku ikubitiro Vital Kamerhe yari yakatiwe igifungo cy’imyaka 20. Iki gihano cyaje kugabanywa kigezwa ku myaka 13 mu Rukiko rw’Ubujurire.

Uyu muyobozi w’ishyaka ‘Union pour la nation congolaise (UNC)’ yari akurikiranywe nka nyirabayazana w’inyerezwa rya miliyoni 57 z’amadolari ya Amerika afatanyije na Jammal Samih, umunya-Liban.

Ni umutungo wari ugenewe kubaka ibikorwaremezo birimo imihanda n’amavuriro i Mbandaka ndetse no gufasha mu ihangwa ry’imirimo.

Umwanzuro utesha agaciro igihano urukiko rwari rwashyiriyeho Vital Kamerhe watangiye kwibazwaho bamwe bavuga ko agiye kurekurwa burundu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .