00:00:00 IGIHE NETWORK KN KINYARWANDA EN ENGLISH FR FRANCAIS

RDC: Intambara yongeye gututumba hagati ya M23 na FARDC

Yanditswe na Mukwaya Olivier
Kuya 4 June 2022 saa 12:07
Yasuwe :

Umwuka w’intambara wongeye gututumba hagati y’ingabo za leta ya Repubulika Iharanira demokarasi ya Congo (FARDC) n’umutwe wa M23 nyuma y’agahenge kari kamaze icyumweru aho abaturage bongeye gusubira mu byabo.

Umuvugizi w’umutwe wa M23 Major Willy Ngoma yatangaje ko ingabo za leta ziteguye kubagabaho ibitero ku bufatanye na FDLR n’indi mitwe yitwaje intwaro ikorera mu burasirazuba bw’iki gihugu.

Ati "Ingabo za FARDC n’ibikoresho byinshi bari kumwe na FDLR bayobowe na Colonel Ruhinda basatiriye ibirindiro byo ku Mwaro na Gasiza naho abarwanyi ba Nyatura bambaye imyenda y’abarinzi ba Pariki begereye ibirindiro bya Bikenke kandi biragaragara ko biteguye kutugabaho ibitero’’.

Akomeza avuga ko FARDC igiye kubura imirwano yirengagije imyanzuro y’akanama gashinzwe amahoro ku Isi isaba ko ibiganiro by’amahoro byasubukurwa mu kurangiza intambara.

Ati’ ’Fardc igiye kubura imirwano birengagije imyanzuro abagize akanama k’umutekano mu muryango w’abibumbye bafashe basaba ko imirwano yahagarara ibiganiro bya Nairobi bigasubukurwa nk’uko byemejwe n’abakuru b’ibihugu bigize umuryango uhuza ibihugu by’Afurika y’iburasirazuba.

Major Willy Ngoma avuga ko ibyo bifuza atari imirwano ahubwo ari ibiganiro byarangiza burundu ikibazo cyabo.

Ati "Igisubizo ku byo dusaba si imirwano ahubwo ni ibiganiro byacyemura mu mizi ikibazo cyacu bikarangiza intambara burundu naho intambara ivamo utsinda n’utsindwa ariko ntiyavamo igisubizo gikwiye nk’uko byagiye bigenda mu bihe byashize’’.

Yashoje avuga ko M23 izaguma mu birindiro byayo kandi izakomeza kwirwanaho.

Intumwa y’umunyamabanga wa Loni muri RDC, Bintou Keita, aherutse kuvuga ko kuganira na M23 bitari mu byakemura ikibazo ahubwo icyiza ari ukuyirwanya igatsindwa.

Yavuze ko indi nzira ari iya politiki na gahunda isanzweho ya leta yo kwambura intwaro imitwe yitwaje intwaro no gusubiza abayigize mu buzima busanzwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .