RDC: Impamvu Guverinoma nshya igizwe n’abaminisitiri 57

Yanditswe na Rosine Ingabire
Kuya 13 Mata 2021 saa 09:02
Yasuwe :
0 0

Hashize iminsi mike Minisitiri w’Intebe wa Repubulika Iharanira Demokarasi ya Congo, Jean-Michel Sama Lukonde, ashyizeho Guverinoma igizwe n’ihuriro rishya ry’amashyaka rya Perezida Felix Tshisekedi ryiswe ‘Union sacrée’.

Union sacrée ni ihuriro ryavutse nyuma yo gushwana kwa FCC ya Joseph Kabila na Cash ya Tshisekedi mu mpera z’umwaka ushize. Iryo huriro ryashyizweho kugira ngo imigabo n’imigambi ya Tshisekedi ibashe gutambuka haba mu Nteko Ishinga Amategeko no muri Guverinoma.

Muri Guverinoma nshya yashyizweho, harimo Abaminisitiri basanzwe 56 na Minisitiri w’Intebe wa 57. RFI yatangaje ko ugereranyije na Guverinoma icyuye igihe, ari ikinyuranyo cy’abaminisitiri icumi kuko iya mbere yari igizwe n’abantu 67.

Kuri uyu wa Mbere, Minisitiri w’Intebe Jean-Michel Sama Lukonde yabwiye abanyamakuru ko icyifuzo cyari ukugira Guverinoma y’abaminisitiri 50 nk’uko byasabwe kenshi n’imiryango itegamiye kuri Leta, kugira ngo Leta izigame amafaranga menshi agenda ku bakozi.

Jean-Michel Sama Lukonde yavuze ko harebwe ku ngingo nyinshi zirimo kuba amashyaka yose agize Union sacrée ahagarariwe, kugiramo bamwe mu bagize sosiyete sivile n’ibindi. Union sacrée’ igizwe n’amashyaka 24, ikaba ariryo huriro rya mbere rinini ry’amashyaka icyo gihugu kigize.

Mu baminisitiri bagize Guverinoma nshya, batanu gusa nibo bahoze muri Guverinoma ya mbere, byumvikana ko abenshi ari bashya muri Guverinoma.

Bimwe mu byatumye Guverinoma itinda gutangazwa, Lukonde yavuze ko bari bagishaka uburyo muri Guverinoma hagaragaramo abagore. Kuri ubu, abagore bagize 27 % by’abagize Guverinoma.

Minisitiri w'Intebe Lukonde yagaragaje ko icyatumye batinda gushyiraho Guverinoma byatewe n'uko bari bakiga uko abagore bahagararirwa muri Guverinoma / Ifoto: Africa News

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .