00:00:00 IGIHE NETWORK KN KINYARWANDA EN ENGLISH FR FRANCAIS

RDC igeze aharindimuka, Tshisekedi yahaye ikiraka abacancuro ba Wagner

Yanditswe na Musangwa Arthur
Kuya 26 Ukuboza 2022 saa 10:14
Yasuwe :

Ibintu bikomeje kujya iwandabaga muri Repubulika Iharanira Demokarasi ya Congo (RDC), nyuma yo kwimika imikoranire n’umutwe w’iterabwoba wa FDLR; Perezida Tshisekedi yinjiye mu mikoranire n’abacancuro b’Abarusiya n’Abafaransa, aho aba mbere bamaze iminsi itanu i Goma.

Amakuru yizewe aremeza ko RDC yahaye akazi abacancuro b’Abarusiya 100 bo mu mutwe wa Wagner, bageze i Goma kuwa 22 Ukuboza, bakurikirwa n’Abafaransa 103 bahoze mu mutwe w’aba- Légionnaires bari bakubutse i Bucharest muri Romanie, bakaba bacumbikiwe muri Hotel yitwa Mbiza.

Biteganyijwe ko abacancuro 300 bazaba bageze muri RDC muri Mutarama 2023. Hoteli bacumbikiwemo irinzwe bikomeye n’umutwe ushinzwe kurinda Perezida Tshisekedi.

Wagner Group ni umutwe washinzwe mu 2014, ugizwe n’abahoze mu gisirikare cy’u Burusiya, ukunze kwifashishwa kugarura umutekano mu bihugu bimwe na bimwe birimo ibya Afurika.

Amerika n’u Burayi bifata uwo mutwe nk’uw’abacancuro uhungabanya uburenganzira bwa muntu kandi witwara gisirikare.

Iyi turufu nshya ya Tshisekedi y’abacancuro, abakurikiranira hafi ibya RDC bemeza ko ari ikimenyetso simusiga cy’ubushake buke mu gukemura ikibazo cy’u Burasirazuba bwa Congo mu mahoro.

Albert Rudatsimburwa ukurikiranira hafi politiki yo mu biyaga bigari, avuga ko ‘Perezidansi ya RDC yahaye akazi abacancuro ba Wagner ishinja Amerika, u Bufaransa n’ibindi bihugu byo mu Burengerazuba bw’Isi nka Monusco kunanirwa kugarura amahoro’.

Ati “Ubu ngubu [Tshisekedi] arategura kurangiza intambara mu nzira za gisirikare binyuranye na gahunda z’akarere by’umwihariko iyo kohereza ingabo za Afurika y’Iburasirazuba”.

Abacancuro ba Wagner binjiye muri RDC nyuma y’uko Minisitiri w’Ingabo w’iki gihugu, Dr Gilbert Kabanda, agiriye uruzinduko mu Burusiya muri Kanama uyu mwaka. Icyo gihe yahawe ijambo asobanura imiterere y’ikibazo cy’umutekano muke mu Burasirazuba bwa RDC.

Perezida Tshisekedi kandi yanahuye na Perezida Joe Biden, ku rundi ruhande ari mu biganiro bikomeye n’u Burusiya byo guha ikiraka Wagner. Ibi bikagaragara nko gukeza abami babiri no gutarataza.

Ubwo Tshisekedi yari akubutse muri ibi biganiro i Washington D.C, hahise hatangira kumvikana urwungikane rw’amatangazo arebana na Congo Kinshasa y’ibihugu birimo Leta Zunze Ubumwe za Amerika, u Bufaransa, Espagne, u Budage n’ibindi bihugu byo mu burengerazuba bw’isi.

Ni amatangazo yibasira u Rwanda rushinjwa ko arirwo ruri inyuma y’umutwe wa M23, ndetse kimwe n’ikindi gihe cyose, ko rushobora gufatirwa ibihano.

Abasesenguzi basanga ibi bihugu byarasohoye ayo matangazo mu kurangaza abantu, ngo akeke ko ikibazo RDC ifite ari u Rwanda, aho kureba ibindi bihangayikishije kurushaho. Ni mu mugambi mugari wo kwagaza RDC ngo irarame bitware umutungo kamere wayo bikeneye cyane.

Bavuga kandi ko ‘aya matangazo ya Amerika n’ibindi bihugu by’u Burayi akurikiranye no gukuriraho RDC ibihano byo kugura intwaro, ari amayeri Tshisekedi yakoresheje ngo abashe kugura intwaro mu Burusiya no gukoresha abacancuro ba Wagner’.

Bati “Gukoresha icengezamatwara, imyigaragambyo y’abasivili bamagana Monusco, u Rwanda, Abanyaburayi ndetse no guha ikiraka Wagner, byatumye Tshisekedi abona icyo yashakaga. Abanyaburayi ntibazatinda kubona ko atari uwo kwizerwa”.

Mu gusohora amatangazo ubutitsa, ibihugu by’u Burayi na Amerika baranashaka kurengera inyungu zabo muri RDC, berekana ko bashyigikiye Tshisekedi mu cyizere cy’uko hazamubuza gukorana n’u Burusiya.

Rudatsimburwa ati “Abo mu Burengerazuba bw’Isi baguye mu mutego wa Tshisekedi basohora amatangazo nk’abari mu marushanwa bashinja u Rwanda gufasha M23, ariko birengagiza umuzi w’ibibazo bya RDC”.

Ababikurikiranira hafi basanga mu gihe cya vuba Amerika n’u Burayi bazabona ko bibeshye gutesha agaciro gahunda z’akarere zo gushakira amahoro u Burasirazuba bwa RDC, bagakurikira icengezamatwara rya Tshisekedi, imvugo z’urwango, imyigaragambyo no kwegeka ibibazo by’igihugu cye ku Rwanda.

Gutesha agaciro gahunda z’akarere, akaga kuri RDC

Kuwa 15 Ukuboza, Umuyobozi wa EAC, Perezida Evariste Ndayishimiye n’Umuyobozi wa ICGLR, Perezida João Lourenço, bahuriye mu nama na Perezida Kagame, Yoweri Kaguta Museveni, , Samia Suluhu Hassan na William Ruto bareba ishyirwa mu bikorwa ry’imyanzuro ya Luanda na Nairobi ku bibazo byo burasirazuba bwa Repubulika Iharanira Demokarasi ya Congo (RDC).

Iyi nama yabereye muri Leta zunze Ubumwe za Amerika, ntabwo Perezida Tshisekedi yayitabiriye kuko yavuze ko ari bube ahura na Joe Biden muri White House.

Abasesenguzi bavuga ko Tshisekedi yabeshye kuko intego nyamukuru ‘yari ukwivana muri gahunda y’akarere yo gushakira amahoro Uburasirazuba bwa RDC, ahubwo akayoboka abacancuro b’Abarusiya n’Abafaransa’.

Ibi bituma bemeza ko mu gihe cya vuba Amerika n’u Burayi bazabona ko bibeshye gutesha agaciro gahunda z’akarere zo gushakira amahoro u Burasirazuba bwa RDC, bagakurikira icengezamatwara rya Tshisekedi, imvugo z’urwango, imyigaragambyo no kwegeka ibibazo by’igihugu cye ku Rwanda.

Kuwa 23 Ugushyingo 2022 nibwo i Luanda muri Angola habereye inama y’Abakuru b’Ibihugu yigaga ku bibazo by’umutekano muke mu Burasirazuba bwa RDC, yafashe imyanzuro ko inyeshyamba za M23 zigomba gushyira intwaro hasi mu maguru mashya.

Abitabiriye iyi nama bategetse ko ibitero byose bihagarikwa by’umwihariko ibyo M23 igaba ku ngabo za RDC na MONUSCO uhereye ku wa 25 Ugushyingo 2022 saa kumi n’ebyiri.

Iyi nama kandi yemeje ko abasirikare bo mu mutwe w’ingabo uhuriweho na EAC bakomeza koherezwa muri RDC naho inyeshyamba za M23 zikava mu duce zafashe zigasubra mu birindiro byazo bya mbere mu gace ka Sabyinyo ku ruhande rwa RDC maze hagashyirwaho agace zitagomba kurenga bigizwemo uruhare n’ingabo za EAC, iza MONUSCO n’iza leta.

Inkunga mu bya politiki n’ibya gisirikare yahabwaga M23 ngo igomba guhagarara ndetse indi mitwe yitwaje intwaro yaba iy’imbere mu gihugu no hanze yacyo yakoreraga mu Burasirazuba bwa Repubulika Iharanira Demokarasi ya Congo na yo igahagarika ibikorwa.

Imitwe y’iterabwoba nka FDLR-FOCA, inyeshyamba za Red-Tabara, ADF n’indi yose ikorera ku butaka bwa RDC yasabwe gushyira intwaro hasi igatangira gusubira iwabo nk’uko byafashweho umwanzuro mu biganiro bya Nairobi.

Nyuma y’inama ya Luanda, habaye ibiganiro by’abanye-Congo, mu cyumba cya hotel Safari Park Hotel i Nairobi, aho imitwe yitwaje intwaro 53 yaganiraga na Guverinoma ya RDC ku muti w’amahoro arambye mu Burasirazuba bw’iki gihugu.

Ibi biganiro byari bihurije hamwe imitwe yitwaje intwaro ikorera mu ntara za Kivu y’Amajyaruguru, Kivu y’Amajyepfo, Ituri, Maniema na Tanganyika. M23 ntabwo yatumiwe nubwo ari yo igaragara cyane nk’ihangayikishije Leta ya Congo.

Ibiganiro bya Nairobi byavuyemo imyanzuro irimo guhagarika imirwano kw’imitwe yitwaje intwaro, gushyiraho itsinda rihuriweho na RDC, EAC n’imitwe yitwaje intwaro kugira ngo hakurikiranwe uburyo abarwanyi b’iyi mitwe bafunzwe nta byaha bashinjwa bashobora kurekurwa ndetse iyi mitwe ikarekura abana bari mu gisirikare bakakivamo.

Umutwe wa M23 uherutse gushimangira ko witeguye gusubira inyuma ukava mu duce wafashe, aho ku ikubitiro wavuye muri Kibumba.

Ku rundi ruhande ariko imiryango mpuzamahanga itandukanye ikomeje gusabwa guhaguruka vuba na bwangu ikagira icyo ikora mu guhagarika Jenoside irimo gukorwa na Guverinoma ya Repubulika Iharanira Demokarasi ya Congo n’imitwe bafatanyije ya FDLR, Nyatura, APCLS na Mai-Mai.

Igikomeje kwibazwa kandi ni uburyo abacancuro, Monusco, ingabo za EAC, bazakorera hamwe na FARDC yifatanyije na FDLR, Nyatura, Mai-Mai n’indi mitwe irenga 130 iri muri RDC.

Wagner Group ni umutwe ugaragara mu bice bitandukanye bya Afurika aho uba wahawe ibiraka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .