RDC: Abayobozi bakuru barindwi bashobora gufatirwa ibihano na EU

Yanditswe na Deus Ntakirutimana
Kuya 12 Ukuboza 2016 saa 08:23
Yasuwe :
0 0

Umuryango w’Ubumwe bw’u Burayi (EU) ushobora gufatira ibihano Abayobozi barindwi bo muri Repubulika Iharanira Demokarasi ya Congo bashinjwa kubangamira inzira za demokarasi muri icyo gihugu.

Abo bayobozi ba hafi ba Kabila bashinjwa kubangamira demokarasi mu gihe cy’imvururu zivugwa muri Congo zazamuwe na manda ya Perezida Joseph Kabila itazarangirira igihe yari iteganyijwe, ni ukuvuga tariki ya 20 Ukuboza 2016.

Jeune Afrique yatangaje ko ibihano abo bayobozi bashobora guhabwa birimo ifatirwa ry’imitungo yabo ndetse no gukumirwa gukorera ingendo mu bihugu bigize uwo muryango.

Umwe mu badipolomate yavuze ko icyo kibazo kiri busuzumirwe mu nama ihuza ba Minisitiri bashinzwe ububanyi n’amahanga bo mu bihugu bigize uyu muryango ibera i Bruxelles mu Bubiligi kuri uyu wa Mbere tariki y 12 Ukuboza 2016.

Undi mudipolomate yatangaje ko ibyo bihano biteganyijwe biri hafi gutangwa, ariko ko umwanzuro wa nyuma ugomba gufatwa n’abo baminisitiri.

Biravugwa ko ibyo bihano byatangwa guhera tariki 20 Ukuboza 2016, umunsi nyir’izina manda ya Perezida Kabila yagombye kurangiriraho, mu gihe hategerejwe kureba niba inzira yo guhuza impande yatangiwe n’Abasenyeri Gatolika muri icyo gihugu izafasha kuvana icyo gihugu mu bibazo bihavugwa.

Abatavuga rumwe n’ubutegetsi bwa Kabila bakunze kumushinja ko ashaka kubugundira, nyuma y’imyaka 15 ayobora, kandi Itegeko Nshinga rikaba ritamwemerera kongera kwiyamamaza, ndetse n’amatora yagombaga kugaragaza umusimbura akaba yarimuwe mu gihe kitazwi.

Imishyikirano irimo gukorwa igomba kugeza igihugu ku ishyirwaho rya guverinoma y’inzibacyuho mu gihe hategurwa amatora.

Biravugwa ko abo bayobozi bazahabwa ibihano buri wese ku giti cye. EU yiteze ko amatora ya Perezida wa Congo yakorwa mu gihe cya vuba mu 2017 agafasha icyo gihugu kuva mu bibazo bya politiki bikirangwamo.

Abo bayobozi barindwi bavugwa bagizwe n’abakekwaho kugira uruhare rukomeye mu myigaragambyo y’abatavuga rumwe na leta yaguyemo abasaga 50 hagati ya 19 na 20 Nzeri 2016.

Imvururu zikomeje kubera muri icyo gihugu zihangayikishije Umuryango Mpuzamahanga kuko hari ubwoba ko zageza igihugu ku zikomeye nk’izahitanye ubuzima bwa benshi mu 1996 na 2003.

Mu itangazo ryashyizwe ahagaragara ku wa Gatanu w’icyumweru gishize, imiryango itandukanye itavuga rumwe na Leta irimo Human Rights Watch , ihuriro mpuzamahanga ry’imiryango iharanira uburenganzira bw’ikiremwamuntu (FIDH) ndetse n’uw’abanyamakuru batagira umupaka , yahamagariye u Burayi kurebera kuri Leta Zunze Ubumwe za Amerika zafatiye ibihano abasirikare batatu bakekwaho guhungabanya uburenganzira bwa muntu no kubangamira demokarasi muri icyo gihugu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza