Kuwa Gatanu w’icyumweru gishize nibwo Minisiteri y’Ubuzima yatangaje ko hari umurwayi wagaragayeho Ebola mu majyaruguru ya RDC, ndetse biza kwemezwa na OMS.

Umuvugizi wa OMS muri RDC, Eugene Kabambi yavuze ko bakiri gushakisha abantu 125 bafite aho bahuriye n’abagaragayeho Ebola mu Ntara ya Bas-Uele, iherereye ku mupaka na Centrafrique.

Yakomeje avuga ko batatu mu bantu 19 bari baketsweho kuba barwaye Ebola ndetse nyuma bikaza kwemezwa bamaze gupfa.

Nk’uko Reuters dukesha iyi nkuru yabyanditse, uburyo umurwayi wa mbere wahitanwe na Ebola yayanduye ntibiramenyekana, gusa mu bihe byashize benshi bayanduye bayikuye ku nyama.

Iyi ndwara yongeye kugaragara nyuma y’umwaka bitangajwe ko yamaze gucika burundu mu bihugu birimo Guinea, Sierra Leone na Liberia, aho yahitanye abagera ku 11 300 hagati ya 2013-2016.

Ebola yagaragaye bwa mbere mu 1976 muri RDC ahari n’umugezi wayitiriwe. Nubwo yagiye ikunda kuhagaragara ariko bagiye babasha kuyihashya idatwaye ubuzima bw’abantu benshi.

Mu Cyumweru gishize Ihuriro rigamije ikingira ry’indwara cyane mu bihugu bikennye, Gavi, ryatangaje ko hari inkingo za Ebola ibihumbi 300 zakozwe n’uruganda Merck & Co kandi ko biteguye gufasha Leta ya Congo mu guhangana n’iki cyorezo.

Abakozi mu ishami rishinzwe ubuzima muri Repubulika Iharanira Demokarasi ya Congo ubwo mu 2014 bari mu mahugurwa yo kurwanya virus ya Ebola

[email protected]