RDC: Imirwano imeze nabi hagati y’ubwoko bw’abanande n’abahutu

Yanditswe na Muhonzire Sylvine
Kuya 14 Mata 2021 saa 11:25
Yasuwe :
0 0

Abaturage bakomeje guhangayikishwa n’imirwano iherekejwe n’ibikorwa by’ubugizi bwa nabi hagati y’abo mu bwoko bw’abanande n’abahutu batuye mu mujyi wa Goma uherereye muri Kivu y’Amajyaruguru muri Repubulika Iharanira Demokarasi ya Congo.

Iyi mirwano yatewe ahanini n’umutekano muke wari usanzwe uri muri ako gace, aho guhera mu mpera za Werurwe, hari kubera imyigaragambyo yo kwamagana ingabo z’Umuryango w’Abibumbye zishinzwe kubungabunga amahoro muri Congo (Monusco) zishinjwa kudakora akazi kazo ko kurinda abaturage, mu duce twa Beni, Butembo, na Goma ho muri Kivu y’amajyaruguru.

Abo mu bwoko bw’abanande bavuga ko ingabo za Monusco ntacyo zikora ngo zibarinde, kuko ngo bugarijwe n’ibitero bagabwaho n’imitwe yitwaje intwaro ya Mai Mai na FDLR bemeza ko ishyigikiwe n’abo mu bwoko bw’abahutu. Ngo Monusco iza ije gutwara imirambo y’abaguye muri ibyo bitero aho kurinda ko hari ababigwamo.

Ikinyamakuru La Libre Belgique cyatangaje ko ubushyamirane hagati y’amoko yombi bwatangiye tariki 11 Mata 2021, ubwo abacuruzi babiri bo mu bwoko bw’abahutu batwaye moto bagemuye ibicuruzwa byabo i Goma baciye mu Karere ka Kihisi gatuwe n’abanande benshi, maze barabatangira barabica na moto zabo barazitwika.

Bene wabo bamaze kubimenya, ku munsi ukurikiyeho kuwa Mbere bigabije agace gatuwemo n’abanande bararwana, baratemana ndetse batangira no gutwika inzu zabo z’ubucuruzi, abantu benshi bahaburira ubuzima abandi barakomereka.

Mu ijoro ryo kuwa mbere rishyira ku wa kabiri abaturage b’abanande batuye mu duce twa Kihisi na Buhene bavuye mu byabo, barahunga batinya ko bagabwaho ibitero by’imitwe yitwaje intwaro y’aba-Mai Mai na FDLR.

Guverineri wa Kivu y’Amajyaruguru, Carly Nzanzu yasabye ko imyigaragambyo ihagarara nyuma yo gusura ahakorewe ibikorwa by’urugomo hifashishijwe imihoro no gutwika inzu. Yasabye inzego zishinzwe umutekano guhosha imyigararambyo bakarinda abaturage.

Abo mu bwoko bw’abahutu bashyamiranye n’abanande ni abanyarwanda bari batuye mu gace ka Nyiragongo mbere y’uko inama y’i Berlin yagabanyije Afurika, ikomeka kuri Congo igakuye ku Rwanda.

Imirwano hagati y'abanande n'abahutu mu mujyi wa Goma yahitanye abatari bake abandi barakomereka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .