Kuva amatora yatangira tariki ya 29 Ukwakira 2025, abaturage biganjemo urubyiruko bishoye mu mihanda mu mijyi itandukanye, banenga icyemezo Leta yafashe cyo gufunga aba banyapolitiki barimo Tundu Lissu w’ishyaka CHADEMA.

Iyi myigaragambyo yaranzwe n’urugomo rukomeye rwo gufunga imihanda hifashishijwe ibikoresho bitandukanye no gutwika amapine. Hari n’amaduka y’ibyamamare yatwitswe, bizira gushyigikira Perezida Samia.

Ishami ry’Umuryango w’Abibumbye rishinzwe uburenganzira bw’ikiremwamuntu, ryagaragaje ko abiciwe muri iyi myigaragambyo bagera ku 10, ariko CHADEMA yo yemeza ko barenga 700.

Kuri uyu wa 1 Ugushyingo 2025, Komisiyo y’Amatora ya Tanzania yatangaje ko Perezida Samia yatsinze amatora ku majwi 97,66%, inamuha icyemezo cy’intsinzi.

Nyuma yo guhabwa iki cyemezo, Perezida Samia yafashe ijambo, atangaza ko iyi myigaragambyo inyuranyije n’amategeko kandi ko abayikoze nta rukundo bari bafitiye igihugu.

Yagize ati “Ibyabereye mu Mujyi wa Dar es Salaam, Arusha, Mwanza, Mbeya na Msongwe ntibyari byiza kandi nta rukundo rw’igihugu byarimo. Urukundo ni ukubaka, si ugusenya igihugu cyubatswe mu byuya n’imbaraga z’abenegihugu.”

Yagaragaje ko iyi myigaragambyo yamubabaje cyane, asaba abaturage kwirinda ibyatuma umutekano w’igihugu uhungabana, bagatanga umusanzu wabo kugira ngo igihugu gitekane.

Perezida Samia yatangaje ko inzego z’umutekano zidashobora kwemera ko abantu basenya igihugu, bityo ko zigomba gukora ibishoboka kugira ngo amahoro n’ituze biboneke mu gihugu.

Byinshi byangirikiye muri iyi myigaragambyo yabereye mu mijyi itandukanye

Perezida Samia yasabye abaturage kwirinda gusenya igihugu