Iri tangazo ryatanzwe kuri televiziyo y’igihugu ku wa 17 Nzeri nimugoroba.

Mu myaka ibiri ishize, abantu barenga 20 barimo abatavuga neza ubutegetsi buriho ndetse n’abari hafi ya Perezida Mohamed Bazoum wahiritswe ku butegetsi, na bo bambuwe ubwenegihugu bwa Niger.

Mu mazina y’abantu batanu batangajwe harimo Ouhoumoudou Mahamadou wabaye Minisitiri w’Intebe mu gihe cya Perezida Mohamed Bazoum. Hari kandi abandi bantu bakoresha imbuga nkoranyambaga, bazwiho kunenga ubutegetsi bwa gisirikare buri i Niamey, ndetse bamwe muri bo bakaba baba hanze ya Niger.

Itangazo rya Leta ya Niger ryavuze ko abo bantu bakurikiranyweho ibyaha birimo gukwirakwiza amakuru ashobora guhungabanya umutekano rusange, gukorana n’ibihugu by’amahanga, kugira uruhare mu guca intege igisirikare ndetse no guhungabanya umutekano w’igihugu.

Kuva mu 2024, ubwo ubutegetsi bwa Niger bwashyiragaho urutonde rw’abantu bakekwaho ibikorwa by’iterabwoba cyangwa guhungabanya inyungu z’igihugu, abantu barenga 25 bamaze kwamburwa ubwenegihugu bwabo.

Muri abo harimo abahoze ari abayobozi muri Leta, abasirikare, abarwanashyaka ndetse n’abatavugarumwe n’ubutegetsi bwa CNSP. Harimo na Mayra Djibrine uyobora Alliance des Démocrates du Sahel, ihuriro ry’abatavuga rumwe n’ubutegetsi bo muri Mali, Niger na Burkina Faso risaba ko ibihugu byasubira ku miyoborere ishingiye ku Itegeko Nshinga.

Gusa kwamburwa ubwenegihugu bikorwa by’agateganyo. Amategeko ariho ateganya ko bishobora guhinduka umwanzuro wa burundu gusa mu gihe umuntu bireba yaba ahamwe n’icyaha agakatirwa igifungo kingana cyangwa kirenze imyaka itanu.

Gen Abdourahamane Tiani yategetse ko abantu batanu bamburwa ubwenegihugu by'agateganyo